Masoló ya Basakoli ya Bokonzi
Lisungi epai na baoyo “bazali na mposa ya komɛla” na Russie
YESU alobaki ete: “Esengo epai na baoyo bazali na mposa na kolya mpe komɛla boyengebene, zambi bakotondisama.” (Matai 5:6, NW) Masoló oyo malandi mazali komonisa lolenge oyo Batatoli ya Yehova bazali kosalisa mpo na kokokisa mposa ya elimo ya ebele ya bato na Russie, epai kuna bonsomi ya losambo ezalaki te na boumeli ya mibu koleka 70.
▪ Mwasi moko na nkombo Valentina azalaki na mituna kitoko ya Biblia oyo azwaki biyano na yango te na boumeli ya bambula mingi. Na ndakisa, azalaki komituna ete: ‘Yesu azalaki kosambela nani?’ Asosolaki ete Yesu asengelaki kosambela moto mosusu oyo aleki ye, mpe alingaki koyeba nkombo na Ye.
Akendaki na Lingomba Ortodoksi ya Russie. Nzokande, na lingomba yango azwaki biyano te na mituna na ye. Lokola mposa na ye ekokisamaki te, akendaki na lingomba Protestá kasi lisusu azwaki biyano ya polele te. Koyebáká te esika mosusu oyo akokaki kokenda, Valentina abandaki kotánga Biblia, komekáká kozwa biyano ye moko—kasi litomba emonanaki te. Abondelaki mpo na kozwa lisalisi.
Mwa moke na nsima, Batatoli ya Yehova babɛtaki na ekuke na ye. Balakisaki ye kati na Biblia ete nkombo ya Nzambe ezali bongo Yehova. Na yango, ayebaki sikawa nani oyo Yesu azalaki kobondela! Abandaki koyekola Biblia pɔ́sɔ na pɔ́sɔ elongo na Batatoli. Mbala mingi azalaki kofanda butu mobimba mpo na kotánga mikanda mikolimbolaka Biblia oyo mibimisami na la Société Watch Tower mpe koluka mikapo kati na Biblia. Mosika te, Valentina amonaki ete azwi solo. Nsima ya basanza misato akómaki kobima na mosala ya kosakola, mpe nsima ya basanza mosusu mibale, azwaki batisimo. Bolukiluki na ye oyo ezalaki kosalema na mabondeli mpo na solo ezwaki mbano.
▪ Motatoli moko asalaki mobembo na bísi mpo na kosakola na etúká moko mosika. Na boumeli ya mobembo asololaki na elenge mwasi moko na ntina na bilaka ya Biblia, kasi elenge mwasi yango amonisaki bosepeli te. Nsima ya basanza mibale, Motatoli yango asalaki mobembo lisusu bobele na etúká wana mpo na kosala lisukúlu ya bato nyonso. Nsima ya lisukúlu asololaki na mopaya moko mpe atunaki ye ete: “Moto moko asilá kosolola na yo na ntina na nsango malamu na Biblia?” Moto yango ayanolaki ete: “Ɛɛ, yo osilá kosolola na ngai.” Motatoli akanisaki ete azalaki kosala lisɛki. Kasi elenge mobali yango alimbwelaki ye ete esilaki koleka basanza mibale alandaki lisoló kati na Motatoli moko mpe elenge mwasi moko, na boumeli ya mobembo na bísi. “Nalingaki koyeba makambo mosusu mingi, kasi okitaki, mpe nakanisaki ete nakomona Batatoli ya Yehova lisusu te. Na nsima, na esika ya mosala, nakutanaki na mobali moko oyo ayekolaka Biblia elongo na Batatoli. Mpe, na bongo, ngai oyo!”
Mobali yango ná mwasi na ye babandaki koyekola Biblia. Nsima ya mwa ntango mokuse, asosolaki ete mosala na ye ezalaki na boyokani te na mitindá ya Biblia. Lokola alingaki kobatela lisosoli malamu liboso ya Yehova, azwaki mosala mosusu. Sikawa azali koyebisa epai na basusu Bokonzi ya Nzambe na mabaku nyonso. Mwasi na ye mpe azali kosala bokóli kati na boyekoli na ye ya Biblia.
Kati na teritware monene ya Russie, Batatoli ya Yehova bazali na esengo ya koyebisa na bato ya motema sembo ete: “‘Yaka!’ Tiká ete moto na mposa na komɛla aya, mpe oyo azali na mposa akamata mai na bomoi lokola likabo.”—Emoniseli 22:17.