Mituna ya Batángi

“Linɔ́ngi ya Mosɛnzɛli” ya 15 Augústo 1996 elobaki ete: “Na eteni ya nsuka ya bolózi, ‘mosuni’ oyo ekokima na ngámbo ya Yehova ekobikisama.” Yango elingi nde koloba ete nsima na eteni ya liboso ya bolózi monene, bato mingi ya sika bakoya na ngámbo ya Yehova?

Wana ezali soko moke te likanisi oyo limonisamaki.

Na mikolo mizali koya, maloba ya Yesu oyo mazwami na Matai 24:22 makokokisama libosoliboso ntango bato bakobikisama na eteni ya liboso ya bolózi monene oyo ezali koya, elingi koloba na kobomama ya mangomba. Lisoló yango elobaki boye: “Tómikundola ete ‘mosuni,’ elingi koloba batikali bapakolami mpe ‘ebele monene,’ bakosila kobikisama na ntango Babilone Monene ekobomama nokinoki mpe na mobimba mpenza na eteni ya liboso ya bolózi monene.”

Basembwi wana bakozala na likámá te na ntango Yesu mpe mampinga na ye ya likoló bakokokisa mokumba na bango na eteni ya nsuka ya bolózi wana. Kasi banani bakobika na eteni wana ya bolózi monene? Emoniseli 7:9, 14 emonisi ete ebele monene ya baoyo bazali na elikya ya kofanda na mabelé bakobika. Ekozala boni mpo na baklisto bapakolami na elimo? Na Linɔ́ngi ya Mosɛnzɛli ya 15 Augústo 1990, “Mituna ya batángi” elobelaki ntina oyo tokoki te koyebisa na bosikisiki ntango oyo batikali bapakolami bakomemama na likoló. Na ntina yango, lisoló oyo liuti kobima sika (15 Augústo 1996) lipesaki likanisi ya sikisiki te na likambo yango, lilobaki kaka ete: “Bobele bongo, na eteni ya nsuka ya bolózi, ‘mosuni’ oyo ekokima na ngámbo ya Yehova ekobikisama.”

Na likambo litali koyeba soki bato ya sika bakoyekola solo mpe bakomitya na ngámbo ya Nzambe nsima ya ebandeli ya bolózi monene, ekozala malamu tótalela maloba ya Yesu na Matai 24:29-​31. Nsima wana bolózi monene ekobanda, elembo ya Mwana na moto ekomonana. Yesu alobaki ete mabota nyonso na mabelé bakomibɛtabɛta mpe bakolela. Alobaki eloko moko te oyo emonisi ete bato bakofungola miso na makambo yango, bakobongola mitema, bakomitya na ngámbo ya Nzambe, mpe bakokóma bayekoli ya solo.

Bobele bongo, kati na lisese ya bampate mpe bantaba, Mwana na moto amonani mpe akaboli bato na lisambisi litongami na makambo oyo basalaki to oyo basalaki te na ntango eleki. Yesu alobaki eloko moko te oyo emonisi ete bato oyo bazalaki komonisa bizaleli ya bantaba uta kala bakobongwana nokinoki mpo na kokóma bampate. Akoya kosambisa na kotalela bizaleli oyo bato bango moko basilaki komonisa.​—Matai 25:31-​46.

Nzokande, awa lisusu, tosengeli te koloba sikisiki ete likanisi yango lizali sé bongo. Basaleli ya Nzambe, ezala bapakolami to ebele monene, bayebi oyo basengeli kosala sikawa​—kosakola mpe kozalisa bayekoli. (Matai 28:19, 20; Malako 13:10) Oyo ezali ntango ebongi na biso kolanda toli oyo ete: “Awa ezali biso kosalana na ye mosala, tokobondela bino ete bóyamba ngɔlu na Nzambe mpamba te. Mpo ete alobi ete, Na ntango ebongi, nayoki yo, mpe na mokolo na kobika nasungi yo. Talá, ntango ebongi ezali [sikawa]; talá mokolo na kobika ezali [sikawa].”​—2 Bakolinti 6:1, 2.