Basalaki mokano ya Yehova

Eliya akumisi Nzambe ya solo

AZALAKI moto oyo akanelamaki mingi koleka na Yisalaele. Akokaki kobomama soki mokonzi azwaki ye. Moto yango oyo balukaki kokanga ezalaki nani? Eliya, mosakoli ya Yehova.

Mokonzi Ahaba mpe mwasi na ye mopakano, Yezabele, bapalanganisaki losambo ya Baala kati na Yisalaele. Mpo na yango, Yehova anɔkisaki mbula te na mokili, ekómaki sikawa na mbula ya minei. Yezabele mokonzi-mwasi oyo azalaki na nkanda makasi asalaki mwango mpo na kobomisa basakoli ya Yehova, kasi Ahaba akanelaki mingimingi Eliya. Mbula misato liboso, Eliya ayebisaki Ahaba ete: “Mamwɛ mpe mbula ikozala na bilanga oyo te bobele na liloba na ngai!” (1 Mikonzi 17:1) Mpe kozanga mbula ekóbaki kino ntango wana.

Kati na ezalela wana ya mpasi, Yehova ayebisaki Eliya ete: “Kendá komimonisa epai na Ahaba mpe nakotinda mbula likoló na mabelé.” Atako bomoi na ye ezalaki na likama monene, Eliya atosaki etindá ya Yehova.​—1 Mikonzi 18:1, 2.

Banguna mibale bakutani

Ntango amonaki Eliya, Ahaba atunaki ye ete, “Ezali nde yo, yo mokakatanisi na Yisalaele?” Eliya ayanolaki na mpiko nyonso ete, “Ngai nakokakatanisa Yisalaele te, kasi yo mpe libota na tata na yo, zambi otiki malako na Yehova mpe obili Babaala.” Bongo Eliya apesaki etindá ete Yisalaele mobimba báyangana na Ngomba Kalemele, elongo na “basakoli nkámá minei na ntuku mitano na Baala mpe basakoli nkámá minei na Asela.” Na nsima, Eliya atunaki bibele ete: “Kino ntango nini bino bokotambolatambola na nzela mibale ikeseni?a Soko [Yehova] azali Nzambe [ya solo, NW], bilá ye; nde soko Baala, bilá ye.”​—1 Mikonzi 18:17-21.

Bato bafandaki nyɛɛ. Ntango mosusu bandimaki ete bazalaki na mbeba mpo ete basambelaki bobele Yehova te. (Exode 20:4, 5) To ekoki kozala ete lisosoli na bango esilaki kobeba na boye ete bamonaki lisumu moko te na etamboli na bango na kokaboláká bosembo na bango kati na Yehova mpe Baala. Ata soki ezalaki lolenge nini, Eliya ayebisaki bato ete bámema bana ngɔmbɛ mibale—moko mpo na basakoli ya Baala mpe mosusu mpo na ye. Bangɔmbɛ yango mibale esengelaki kobongisama mpo na mbeka, kasi bakopelisa mɔ́tɔ te. Eliya alobaki ete, “Bokobyanga nkombo na nzambe na bino mpe ngai nakobyanga nkombo na [Yehova]; Nzambe oyo akozongisa na mɔ́tɔ, ye azali Nzambe [ya solo, NW].”​—1 Mikonzi 18:23, 24.

Yehova akumisami

Basakoli ya Baala “batambolatambolaki [zingazinga] na etumbelo esalaki bango.” Banda ntɔ́ngɔ́ kino midi bangangaki ete: “Ɛ Baala, zóngisela biso!” Kasi Baala azongisaki eyano te. (1 Mikonzi 18:26) Na nsima, Eliya abandaki kosɛka bango ete: “Bónganga na mongongo makasi mpo ete azali nzambe!” (1 Mikonzi 18:27) Basakoli ya Baala babandaki kútu komizokisa na mipanga mpe na makɔnga—ezaleli oyo bapakano bazalaki komonisa mpo ete banzambe na bango báyokela bango mawa.b—1 Mikonzi 18:28.

Ekómaki sikawa nsima ya midi, mpe basambeli ya Baala bakóbaki ‘komitambwisa lokola basakoli’—maloba yango, na esika oyo mazali kopesa likanisi ya kosala makambo lokola bato ya ligboma mpe kozanga komipekisa. Na mpokwa, Eliya alobaki na bato nyonso ete: “Bɛlɛmá epai na ngai.” Bato nyonso bazalaki kotala na likebi lolenge Eliya atongaki lisusu etumbelo ya Yehova, atimolaki libulu zingazinga na yango, akataki mwana na ngɔmbɛ biteni mikemike, mpe atyaki yango likoló na etumbelo esika moko na nkoni mpo na kotumba. Na nsima, basopaki mai mingi likoló na mwana na ngɔmbɛ, na etumbelo, mpe na nkoni, mpe libulu etondaki na mai (na ntembe te mai ya mbu oyo bazwaki na Mai Monene ya Méditerranée). Na nsima, Eliya abondelaki Yehova ete: “Eyebana lelo oyo ete yo ozali Nzambe kati na Yisalaele mpe ete ngai nazali moombo na yo mpe ete ngai nasali makambo oyo bobele na liloba na yo. Zongiselá ngai, Ɛ [Yehova], zongiselá ngai, ete bato oyo báyeba ete yo, ɛ [Yehova] ozali Nzambe mpe ete yo ozali kobutwisa mitema na bango nsima.”​—1 Mikonzi 18:29-37.

Na mbala moko, mɔ́tɔ ekitaki na likoló mpe “elyaki mbeka na kotumba mpe nkoni mpe mabanga mpe mputulu mpe mai mazalaki kati na libulu.” Bato oyo bazalaki kotala bagumbamaki nokinoki, mpe balobaki ete: “Yehova azali Nzambe [ya solo, NW]! Yehova azali Nzambe [ya solo, NW]!” Na etindá ya Eliya, bakangaki basakoli ya Baala mpe bamemaki bango na lobwaku ya Kisono, kuna babomaki bango.​—1 Mikonzi 18:38-40.

Liteya mpo na biso

Eliya amonisaki mpiko oyo tokoki komona ete eleki mpiko ya bato. Nzokande, Yakobo, moko na bakomi ya Biblia andimisi biso ete “Eliya azalaki moto na mayoki lolenge moko na biso.” (Yakobo 5:17) Azalaki mpe kobanga mpe komitungisa. Na ndakisa, ntango na nsima Yezabele alapaki ndai ya kobekola mpo na kobomama ya basakoli ya Baala, Eliya akimaki mpe abondelaki Yehova na konganga ete: “Ekoki! Sasaipi, ɛ [Yehova], longolá bomoi na ngai.”​—1 Mikonzi 19:4.

Yehova abomaki Eliya te. Nzokande, na motema mawa nyonso asungaki ye. (1 Mikonzi 19:5-8) Basaleli ya Nzambe na mikolo na biso bakoki komindimisa ete Yehova akosala motindo moko ntango bakutani na mitungisi makasi, mbala mosusu na ntina na botɛmɛli. Ɛɛ, soki babondeli Yehova ete asunga bango, akoki kopesa bango ‘nguya oyo eleki nguya ya bato,’ na boye ete ata soki ‘bakozwa bopusi bipai nyonso,’ bakozanga te likoki ya ‘koningana.’ Na bongo, bakozwa lisungi mpo na koyika mpiko, lokola Eliya azwaki.​—2 Bakolinti 4:7, 8.

[Maloba na nse ya lokasa]