Ozali komikundola?

Omonaki ete masolo oyo mautaki kobima na Linɔ́ngi ya Mosɛnzɛli mabongi mpo na yo? Boye mpo na nini te komeka boyebi na yo na mituna milandi?

◻ Bokeseni nini ezali kati na “mokolo na Nkolo” mpe “mokolo na Yehova”? (Emoniseli 1:10; Yoele 2:11)

“Mokolo na Nkolo” ezali eleko oyo bimonaneli 16 bilobelami kati na mokanda ya Emoniseli mikapo 1 kino mokapo 22 bizali kokokisama mpe lisusu kokokisama ya makambo minene oyo Yesu asakolaki kati na eyano oyo apesaki na motuna ya bayekoli na ye na ntina na elembo ya kozala na ye. Mokolo ya Yehova, mokolo ya nsɔmɔ mingi, ekozala nsuka ya mokolo ya Nkolo ntango Yehova akopesa etumbu na mokili ya Satana oyo esili kobeba. (Matai 24:3-14; Luka 21:11)—15/12, lokasa 11.

◻ Tángá mwa makambo ya kosepelisa mazwami kati na Biblia ya Makarios?

Nkombo Yehova ezali komonana mbala koleka 3 500 na Biblia ya Makarios. Nganga-mayele moko na mikanda ya mangomba na ekólo Russie alobaki ete: “Libongoli na ye ezali sembo na makomi ya Liebele, mpe maloba ya libongoli mazali pɛto mpe mayokani na lisolo.”​—15/12, lokasa 27.

◻ Nini ezali “solo” oyo Yesu alobaki ete ekosikola biso? (Yoane 8:32)

Na liloba “solo,” Yesu alingaki koloba makambo nyonso mapemami na Nzambe—mingi mpenza makambo matali mokano ya Nzambe—oyo matyami kati na Biblia.​—1/1, lokasa 3.

◻ Yehu mpe Yonadaba ya mikolo na biso ezali banani?

Yehu azali elilingi ya Yesu Klisto, oyo amonisami awa na mabelé na “Yisalaele na Nzambe,” elingi koloba baklisto bapakolami. (Bagalatia 6:16; Emoniseli 12:17) Lolenge moko Yonadaba abimaki mpo na kokutana na Yehu, “ebele monene” bauti na mabota babimi mpo na kosunga bamonisi ya Yesu awa na mabelé. (Emoniseli 7:9, 10; 2 Mikonzi 10:15)—1/1, lokasa 13.

◻ ‘Kotambola elongo na Nzambe’ elimboli nini? (Genese 5:24; 6:9)

Yango elimboli ete baoyo basalaki bongo, lokola Enoka mpe Noa, bamitambwisaki na lolenge oyo emonisaki ete bazali na kondima makasi epai na Nzambe. Basalaki makambo oyo Yehova atindaki bango mpe batambwisaki bomoi na bango engebene makambo oyo bayebaki na ntina na ye na kotaleláká boyokani na ye elongo na bato.​—15/1, lokasa 13.

◻ Mpo na nini moto asengeli kozwa bibongiseli liboso na koyebáká ete liwa ekoki kokómela ye?

Tokoki koloba ete kozwa bibongiseli motindo wana ezali likabo mpo na libota na ye. Ezali komonisa bolingo. Ezali komonisa mposa ya ‘koleisa basangani ya ndako na ye’ ata ntango azali na bango lisusu te. (1 Timoté 5:8)—15/1, lokasa 22.

◻ “Kondimana ya kala” ekokisaki makambo nini? (2 Bakolinti 3:14)

Ezalaki na makambo oyo ezalaki bililingi ya kondimana ya sika mpe, na nzela ya bambeka na yango oyo ezalaki kopesama mbala na mbala, emonisaki ete moto azali na mposa makasi ya kosikolama na lisumu mpe na liwa. Ezalaki “molakisi na biso kino ekoya Klisto.” (Bagalatia 3:24)—1/2, lokasa 14.

◻ Na makambo nini kondimana ya sika ezali kondimana ya seko? (Baebele 13:20)

Ya liboso, na bokeseni na kondimana ya Mibeko, kondimana mosusu ekokitana yango te. Ya mibale, matomba ya mosala na yango makoumela libela. Mpe ya misato, bayangelami na bokonzi ya Nzambe oyo bakofanda awa na mabelé bakokoba kozwa matomba na ebongiseli ya kondimana ya sika na boumeli ya boyangeli ya mbula nkóto.​—1/2, lokasa 22.

◻ Matomba nini mautaka na ezaleli ya kozala na botɔ́ndi?

Esengo oyo moto ayokaka mpo ete azali na botɔ́ndi na motema na ye ezali kobakisela ye bolamu mpe kimya. (Kokanisá na Masese 15:13, 15.) Lokola ezali ezaleli malamu, kozongisa matɔ́ndi ezali kobatela ye ete azala na mayoki mabe te lokola nkanda, zuwa, mpe likunya. 15/2, lokasa 4.

◻ Babotami na elimo bakɔtisami na kati na kondimana nini?

Kondimana ya sika, oyo Yehova asali elongo na Yisalaele ya elimo, mpe kondimana mpo na Bokonzi, oyo Yesu asali elongo na bayekoli oyo bazali kolanda matambe na ye. (Luka 22:20, 28-30)—15/2, lokasa 16.

◻ Bayisalaele basengelaki koyangana na bilambo misato nini ya minene?

Elambo ya Mampa mazangi mfulu, nokinoki nsima ya Elekeli ya 14 Nisana; Elambo ya Bapɔsɔ, na mokolo ya 50 nsima ya 16 Nisana; Elambo ya Kolɔkɔta, to Elambo ya Mingombo, na sanza ya nsambo. (Deteronome 16:1-15)—1/3, nkasa 8, 9.

◻ Mpo na nini koyangana na makita ya boklisto ezali libaku malamu?

Yesu alobaki ete: “Wana mibale to misato bayangani mpo na nkombo na ngai, ngai nazali kati na bango.” (Matai 18:20; 28:20) Lisusu, mwango monene mpo na kopesa bilei ya elimo ezali bongo makita ya lisangá mpe mayangani. (Matai 24:45)—1/3, lokasa 14.

◻ Nkombo Nimilodi eutaki wapi?

Banganga-mayele mingi bazali kokanisa ete Nimilodi ezali nkombo oyo bapesaki ye na mbotama na ye te. Kasi, bakanisi ete ezali nkombo oyo bapesaki ye nsima mpo na kokokanisa ye na ezaleli na ye ya botomboki ntango emonanaki.​—15/3, lokasa 25.

◻ Libota ezali na ntina nini epai na bato?

Libota ezali ebongiseli ya ntina mpo na bato. Lisolo ya bato emonisi ete ntango libota ebebi, makasi ya masangá mpe bikólo ezali kolɛmba. Na yango, libota ezali na bopusi monene na nguya ya lisangá ya bato mpe na bolamu ya bana mpe mabota oyo makoya.​—1/4, lokasa 6.

◻ Tángá makambo misato oyo mamonisi ete Biblia ezali mpenza Liloba ya Nzambe?

(1) Ezali na boyokani na makambo ya siansi; (2) Ezali na mitinda misilaka ngala te oyo mibongi kosalelama na bomoi na mikolo na biso; (3) Ezali na bisakweli ya sikisiki oyo bikokisamaki, lokola emonisami na makambo masalemá kala.​—1/4, lokasa 15.