Omibongisa mpo na milenere oyo ezali mpenza na ntina!

BOYANGELI ya Mbula Nkóto ya Klisto ekopesa bato bolamu mingi mpenza. Yesu akoyangela mokili na bolingo mpe akosilisa mpasi ya bato mpe bakokóma bato ya kokoka. Kanisá naino soki likambo yango esalemi epai na yo. Ozala nzoto mobimba kolɔngɔnɔ! Kanisá ete ntɔngɔ nyonso ozali kolamuka na nzoto makasi koleka ndenge olamukaki lobi. Bamilio ya bato: mibali, basi mpe bana, bazelaka bámona ntango wana ya esengo. Bato yango batyaka elikya mpe babondelaka mpo na yango. Makambo oyo bayekoli na Biblia endimisi bango ete bakoki komona bolamu wana.

Liboso Boyangeli ya Mbula Nkóto ya Yesu Klisto ebanda, asengeli naino kolongola bato nyonso oyo baboyi bokonzi na ye na mokili. Yesu akolongola bato yango na etumba oyo Biblia ebengaka Armagedon. (Emoniseli 16:16) Baklisto ya solo awa na mabelé bakobunda etumba wana te. Ezali etumba ya Nzambe. Ekosalema kaka na mboka moko te. Biblia elobi ete ekozala tii na nsuka ya mokili. Baoyo baboyi bokonzi ya Klisto bakobomama. Moto moko te kati na bango akobika!—Yilimia 25:33.

Na nsima, Yesu akotala likambo ya Satana Zabolo na bademo na ye. Salá lokola ozali komona makambo oyo moto akomaki mokanda ya Emoniseli amonaki: “Namonaki anzelu [Yesu Klisto] kokita na likoló, azalaki na lifungola na libulu mozindo, na monyɔlɔlɔ monene na lobɔkɔ na ye. Asimbi dalagona, ye nyoka yango na kalakala, oyo azali Motɛmɛli, Satana, mpe akangi ye na monyɔlɔlɔ mbula nkóto.” (Emoniseli 20:1, 2) Na nsima, bakoboma Satana na bademo na ye mpo na libela.​—Matai 25:41.

“Ebele monene, oyo moto te akoki kotánga motuya na bango,” bakobika na Armagedon. (Emoniseli 7:9) Klisto akomema bango na “mitó ya mai ya bomoi” mpo bámela ndenge balingi, lokola mobateli ya mpate atambwisaka bampate na ye bisika oyo ezali na mai mpo bázala na bomoi. (Emoniseli 7:17) Lokola Satana na bademo na ye bakozala lisusu te mpo na kopekisa bango bákola na elimo, bato oyo bakobika na Armagedon bakozwa lisalisi mokemoke mpo bálongwa na masumu mpe bákóma bato ya kokoka!

Ntango Klisto akoyangela mokili, bomoi ekokóma malamu mpenza. Yehova Nzambe akotinda Yesu Klisto asilisa makambo nyonso oyo epesaka biso mpasi mpe oyo eyokisaka biso mawa. “Akolongola mpisoli nyonso na miso na bango, mpe kufa ekozala lisusu te, na mawa, na kolela, na mpasi, lisusu mpe te; mpo ete makambo na liboso masili koleka.” (Emoniseli 21:4) Mosakoli Yisaya abakisi boye: “Bongo miso na bakufeli miso makofungolama, mpe matoi na [bato bakufá matoi, NW] makozipolama; bongo, motɛngumi akopombwa lokola mboloko, mpe lolemo na ebubu ekoyemba na esengo.” (Yisaya 35:5, 6) Mpe lisusu bato oyo bakufá, bato “minene na mike,” bakozonga na bomoi mpe bakokufa lisusu te!—Emoniseli 20:12.

Sikoyo, “ebele monene” ya bato oyo bakobika na Armagedon bazali koyanganisama. Bazali komibongisa mpo na Boyangeli ya Mbula Nkóto ya Klisto. Atako bayebi te ntango oyo boyangeli yango ekobanda, bazali na elikya ete ekobanda na ntango oyo Nzambe aponaki. Yo mpe okoki kozala na kati ya bato yango, kasi osengeli mpe komibongisa. Komibongisa yango esɛngi te ete otɛka biloko na yo mpo okende na mboka mosusu. Osengeli nde koyekola Biblia mpo oyeba Yehova Nzambe malamu mpe oyeba mikano na ye. Batatoli ya Yehova bakoki kolakisa yo ndenge oyo yo na libota na yo mobimba bokoki kozwa bolamu yango soki boyekoli Biblia. Bakosala yango na esengo mpe bakosɛnga yo mbongo te. Bato oyo babimisaka zulunalo oyo bakozala na esengo ya kosalisa yo soki olingi koyeba makambo mosusu.

[Etanda na lokasa 7]

Mbula nkóto: Ekozala solo to ezali maloba ya elilingi?

Lokola makambo mingi na mokanda ya Emoniseli ekomamá na maloba ya elilingi, motuna moko ezali kotunama: Boyangeli ya Mbula Nkóto ya Klisto oyo Emoniseli elobeli, ekoumela mpenza mbula nkóto to ezali nde maloba ya elilingi?

Ezali na makambo oyo ezali kondimisa biso ete ekoumela mpenza mbula nkóto. Makambo lokola oyo: Boyangeli ya Mbula Nkóto ya Klisto ezali ntango oyo bakosambisa bato, Paulo abengi yango ete mokolo. (Misala 17:31; Emoniseli 20:4) Ntoma Petelo akomaki ete mpo na Yehova, mokolo moko (ngonga 24) ezali lokola mbula nkóto. (2 Petelo 3:8) Yango emonisi ete “mokolo” ya kosambisa ekoumela mpenza mbula nkóto. Mpe lisusu, na Emoniseli 20:3, 6, 7, mbala misato mobimba tozali kotánga kaka “mbula nkóto” te, kasi “mbula yango nkóto.” Yango emonisi mpenza ete ezali ekoumela mpenza mbula nkóto.