Mituna ya batángi

Mwasi moklisto oyo azali sembo asengeli kokende tii wapi na koboya koboma libala oyo mobali na ye azali kosɛnga?

Ntango libala ya bato ya liboso esalemaki, Nzambe alobaki ete mobali na mwasi basengeli “kokangama” esika moko. (Genese 2:18-24, NW ) Ntango bato bazalaki lisusu na kokoka te, mikakatano ekɔtaki na mabala mingi, kasi mposa ya Nzambe ezali kaka ete mwasi na mobali bákabwana te. Ntoma Paulo akomaki boye: “Epai na baoyo basili kobalana, nazali na liloba (kasi ezali ngai moko te, euti na Nkolo) ete mwasi alongwa na mobali te. Kasi soko akolongwa, atikala kozanga mobali soko azongi na mobali na ye te. Ekoki na mobali kolongola mwasi na ye te.”—1 Bakolinti 7:10, 11.

Maloba wana ezali komonisa ete, mbala mosusu, na kati ya libala ya bato ya kozanga kokoka, moko na bango akoki kozwa ekateli ya kotika moninga. Na ndakisa, ntoma Paulo alobaki ete soki moko akei, bango mibale basengeli ‘kobala lisusu te.’ Mpo na nini? Mpamba te, moko akei kasi, na miso ya Nzambe, bango mibale bakangani kaka esika moko. Ntoma Paulo alobaki bongo mpamba te, ntango Yesu apesaki malako mpo na libala ya baklisto, alobaki ete: “Ye nani akolongola mwasi na ye, soko mpo na pite [na Greke, pornéïa] te, mpe akobala mosusu, azali kosala ekobo.” (Matai 19:9) Likambo kaka moko oyo Makomami epesi nzela na koboma libala ezali “pite,” elingi koloba kosangisa nzoto na lolenge ya mbindo. Kasi, na likambo oyo ntoma Paulo alobeli, ezala mwasi to mobali, moko te asali ekobo, yango wana ntango mobali to mwasi akei, libala ekufi te na miso ya Nzambe.

Na nsima, ntoma Paulo alobaki likambo ya moto oyo azali moklisto ya solo oyo mwasi to mobali na ye azali mondimi te. Ntoma Paulo apesi toli oyo: “Nde soki ye oyo azangi kondima alingi kolongwa, tiká ete alongwa. Na likambo yango ndeko mobali to ndeko mwasi akangani te. Mpo ete Nzambe abyangi biso mpo na kimya.” (1 Bakolinti 7:12-16) Mwasi moklisto oyo azali sembo akosala nini soki mobali na ye azali mondimi te atiki ye, mpe akei tii na Leta mpo na koboma libala?

Mbala mosusu, mwasi akoki kosepela kofanda na mobali na ye. Ekoki mpe kozala ete alingi kaka mobali na ye, akoki kotalela mposa na ye ya kozala na moninga mpe mposa ya kosangisa nzoto, mpe ayebi ete ye na bana bazali na mposa na ye mpo na kosunga bango na bamposa ya mosuni. Mbala mosusu azali mpe na elikya ete ata ndɛlɛ, mobali na ye akokóma mondimi mpe akobika. Kasi, soki mobali yango asali nyonso mpo na koboma libala (na ndenge oyo eyokani te na Makomami), mwasi akoki ‘kotika ye akende,’ ndenge ntoma Paulo akomaki. Ezali se bongo soki mobali oyo azali mondimi kasi aboi kotosa likanisi ya Nzambe mpo na libala mpe azali kaka na mposa ya kokabwana na mwasi na ye.

Soki ekómi bongo, mwasi asengeli kotalela makambo nyonso malamumalamu mpe koluka komibatela mpe kobatela bana na ye. Na ndenge nini? Lokola azali mama moboti mpe alingaka bana na ye, akolinga kotikala na bango mpo na kobatela bango mpe koteyaka bango ntango nyonso bizaleli malamu, mpe kopesa bango mateya ya Biblia mpo bázala na kondima. (2 Timote 3:15) Koboma libala ekoki kopekisa ye kosala makambo oyo azali na lotomo na yango. Yango wana, akoki kozwa bato oyo bakoloba mpo na ye liboso ya bazuzi mpo na kobatela lotomo ya kobatela bana na ye to kokendaka kotala bango mpe kondimisama ete mobali na ye azali na mokumba ya kokokisa bamposa ya libota oyo alingi kosundola. Mibeko ya mboka mosusu esɛngaka mwasi oyo aboyi koboma libala atya sinyatili na mikanda ya Leta oyo ezali kopesa ndingisa epai na mwasi, ndenge ekomami na mikanda, ete akamata bana mpe mobali na ye apesaka mbongo ya kolya na bana, atako ye mpenza andimi ete libala na bango ekufa. Na bamboka mosusu mpe, maloba oyo ezali na mikanda ya Leta emonisaka ete mwasi andimi koboma libala; yango wana, soki mobali na ye asalaki ekobo, lokola mwasi atii sinyatili na mikanda yango elakisi ete aboyi mobali na ye.

Bato mingi na mboka to na lisangá, bakoyeba makambo nyonso te, na ndakisa, koyeba soki libala na bango ekufi na ndenge oyo Makomami esɛngi. Kasi liboso ete makambo ekóma mosika, ekozala malamu mwasi ayebisa mokɛngɛli-mokambi to mpe nkulutu mosusu na lisangá makambo nyonso (malamu akoma yango na mokanda). Na ndenge yango, makambo yango ekozala polele soki mokakatano mosusu ebimi na nsima.

Tózonga na makambo Yesu alobaki, ete: “Ye nani akolongola mwasi na ye soko mpo na pite te, mpe akobala mosusu, azali kosala ekobo.” Soki mobali asalaki mpenza ekobo kasi alingi kotikala na mwasi na ye, mwasi (oyo asali eloko te ndenge Yesu alobaki) asengeli kopona soki akolimbisa mpe akozala kaka na mwasi na ye to akoboya ye. Soki andimi kolimbisa mpe kotikala na mobali na ye, asali mabe te.—Hosea 1:1-3; 3:1-3.

Soki mobali oyo asalaki ekobo alingi koboma libala, mwasi akoki kozala na mposa ya kolimbisa ye, na elikya ete bakozongana. Ezali likambo na ye moko, na kotalela lisosoli to makambo na ye mosusu, mpo na kopona soki akoboya koboma libala to akolimbisa mobali na ye. Mibeko ya bamboka mosusu esɛngaka ete mwasi oyo aboyi koboma libala atya sinyatili na mikanda ya Leta oyo ezali kopesa ndingisa epai na mwasi ete akamata bana mpe mobali apesaka mbongo ya kolya na bana; mpe mikanda yango emonisaka te ete mwasi yango andimi koboma libala. Nzokande, na bamboka mosusu, basɛngaka mwasi oyo aboyi koboma libala atya sinyatili na mikanda oyo ezali koloba ete andimi koboma libala. Kotya sinyatili na mokanda ya ndenge yango ekomonisa solosolo ete mwasi aboyi mobali na ye oyo asali ekobo.

Yango wana, mpo mindɔndɔ ebima na nsima te, ekozala malamu mpo na mwasi, apesa bankulutu ya lisangá mokanda moko oyo ezali komonisa makambo nyonso oyo ezali koleka mpe mposa oyo ye na mobali na ye bazali komonisa. Akoki komonisa ete asololaki na mobali na ye ete andimi kolimbisa ye mpe kozala mwasi na ye. Yango ekomonisa ete alingaki te libala na bango ekufa; na esika ya koboya mobali na ye, azalaki ntango nyonso na mposa ya kolimbisa ye. Nsima ya komonisa polele ete alingaki kolimbisa ye mpe kotikala na mobali na ye, soki atii sinyatili na mikanda mpo na kobongisa makambo ya mbongo emonisi te ete aboyi mobali na ye.a

Soki mwasi amonisi polele ete alingi kolimbisa mobali na ye ata nsima ya koboma libala; ezala mwasi to mobali, moko te azali na bonsomi ya kobala moto mosusu. Soki mwasi, oyo mobali na ye asali ekobo, alingaki kolimbisa kasi mobali aboyi, na nsima mwasi yango azwi ekateli ya koboya mobali yango mpo na etamboli wana ya mbindo, na ntango yango bango mibale bakómi na bonsomi. Yesu amonisaki ete mwasi to mobali oyo molongani na ye asali ekobo azali na lotomo ya kozwa ekateli ya ndenge yango.—Matai 5:32; 19:9, Luka 16:18.

[Maloba na nse ya lokasa]