Misala oyo balongolaka bato mpambampamba te mpe oyo esepelisaka ekómi mpasi
ESAKOLA ya ONU mpo na ntomo ya moto (Déclaration universelle des droits de l’homme) elobi ete moto nyonso azali na “lotomo ya kozala na mosala.” Nzokande, ezalaka ntango nyonso bongo te. Kozwa mosala mpe koumela na yango etalelaka makambo mingi, na ndakisa nkita ya ekólo, ndenge makambo ya mombongo ezali kotambola na mokili mobimba, mpe bongo na bongo. Atako bongo, soki balongoli bato na mosala to bazali kokana kolongola bango, bato batambolaka na babalabala, basalaka mobulu mpe baboyaka kosala mpo na kosɛnga bakonzi bábongisa makambo. Bikólo oyo makambo wana esalemaka te ezali mingi te. Mokomi moko alobaki ete ata liloba “mosala yango moko ezali mpe ezalaka ntango nyonso liloba moko oyo ebɛtisaka bato mitema.”
Mpo na makambo mingi, mosala ezali na ntina mingi mpo na biso. Mosala esalisaka biso na kozwa mwa eloko ya kobikela, kasi epesaka biso mpe kimya ya makanisi. Moto alingaka ete na esika oyo afandi bámona ye ete azali na ntina mpe alingaka kozala na bomoi oyo ezali na ntina; akokisaka bamposa nyonso wana na ntango azali kosala. Mosala epesaka biso nzoto kilo. Yango wana, ata bato oyo bazali na mbongo mingi, oyo ekoki mpo na kokokisa bamposa na bango, to baoyo bakokisi bambula ya kozwa epaso balingaka kotika mosala te. Mosala ezali na ntina mingi mpe, soki bato bazali na misala te, mobulu ekɔtaka mingi na mboka.
Ezali mpe na bato oyo basalaka kasi bazali kokutana na mikakatano mingi na mosala mpe bazali kosepela lisusu na mosala na bango te. Na ndakisa, lokola makambo ya mombongo ekómi na kowelana makasi, bakompanyi mingi ezali kolongola ebele ya bato na mosala mpo ebimisaka mbongo mingi te. Yango ekoki kosala ete baoyo batikali bákóma kosala mingi, mpo basengeli kozwa mokumba ya baoyo balongoli bango.
Bamasini oyo ezali kobima sika, oyo bakanisaki ete ekokómisa bomoi pɛpɛlɛ mpe ekobongisa mosala, ebakisi lisusu mikakatano na mosala. Na ndakisa, bato oyo basalelaka ordinatɛrɛ, fax mpe Internet bakoki ata komema misala na bango na ndako na mpokwa, mpe mpo na yango, bazali lisusu kokesenisa te ndako mpe esika ya mosala. Mosali moko azalaki komona ete pageur électronique mpe telefone ya mabɔkɔ oyo kompanyi epesaki ye ekómaki lokola nsinga ezali komonana te oyo bakangaki ye na nkingo mpe patrɔ na ye azalaki kobenda yango na nsɔngɛ ndenge babendaka mbwa.
Na mokili oyo makambo ya nkita mpe ya mosala ezali kobongwana nokinoki, likambo oyo ezali kobangisa bato oyo basili kopusana na bambula ezali ete, ntango bazali naino na makasi ya kosala, bakoki komona bango lokola bato oyo babongi lisusu na mosala te. Chris Sidoti, oyo azalaká commissaire mpo na ntomo ya bato, alobaki mpo na likambo yango ete: “Ezali komonana ete bato bakómi kokanisa ete moto oyo abongi mpo na kosalela baordinatɛrɛ mpe bamasini mosusu ezali kaka moto oyo alekisi naino mbula 40 te.” Na yango, ebele ya basali ya malamu oyo bazalaki komonana ete bazali kosala mosala malamu, bakómi komonana na mikolo na biso ete babongi lisusu na mosala te mpo bapusani na mbula. Ezali mawa!
Yango wana tokoki kokamwa te ete na bambula oyo, bato babungisi bizaleli malamu na mosala mpe bazali lisusu sembo te na bakompanyi na bango. Zulunalo Libération oyo ebimaka na France, elobaki boye: “Lokola bakompanyi ekómi kolongola bato mpambampamba na mosala soki kaka nkita ebebi ata mwa moke, ntina ezali lisusu te ete bato bázala sembo na bakompanyi. Tokosala mosala, kasi kaka mpo na bolamu na biso moko, tokoluka bolamu ya kompanyi te.”
Atako mikakatano ya ndenge wana ezali se kokóma mingi, bato bazalaka kaka na mposa ya kozala na mosala. Na yango, ndenge nini moto akoki kotalela mosala na ndenge ya malamu na mokili oyo makambo ezali kobongwana nokinoki, mpe kobanga te ete akobungisa mosala mpe asepela na yango?
[Elilingi na lokasa 3]
Bamasini oyo ezali kobima sika ebakisi mikakatano na mosala