Bilenge oyo bazali kosepelisa motema ya Yehova

Masolo oyo ebongisami mpenzampenza mpo na bilenge Batatoli ya Yehova. Yango wana, tozali kolendisa bilenge bábongisa yango malamumalamu mpe bápesa biyano mingi ntango bokotalela yango na Boyekoli ya Linɔ́ngi ya Mosɛnzɛli.

“Mwana na ngai, zalá na bwanya mpe sepelisá motema na ngai, mpo napesa moto oyo azali kotumola ngai eyano.”​—MASESE 27:11, NW.

1, 2. (a) Mpo na nini tolobi ete soki makambo ya mokili ezali kobenda yo, yango elingi koloba te ete obongi te mpo na kozala moklisto? (Baloma 7:21) (b) Ndakisa ya Asafa ezali koteya yo nini? (Talá etanda, lokasa 13.)

KANISÁ ete okei na zando to na magazini mpo na kosomba bilamba. Ntango ozali kotalatala, omoni elamba moko oyo esepelisi yo. Osepeli na langi na yango mpe na modɛlɛ na yango; lisusu, ezali ntalo mingi te. Kasi, liboso obimisa mbongo, otali yango lisusu malamumalamu. Omoni ete bansɔngɛ ya elamba yango enzuluká, mpe elamba yango mobimba batongá yango malamu te. Atako osepelaki na yango, omoni sikoyo ete ezali mpenza malamu te. Okondima mpenza kobimisa mbongo na yo mpo na kosomba elamba ya ndenge wana?

² Kokanisá ndakisa yango na likambo moko oyo yo elenge moklisto okoki kokutana na yango. Soki otaleli makambo ya mokili oyo malamu te, ekoki kobenda yo lokola kaka elamba oyo olingi kosomba. Na ndakisa, ekoki kozala ete baninga na yo ya kelasi babimaka mpo na kosala biyenga, bamɛlaka bangi, masanga, mokomoko azali na mwa moto na ye mpe basangisaka nzoto. Oyokaka mpe ntango mosusu mposa ya kosala makambo wana? Olingaka ata komeka mpamba bomoi wana ya bato oyo bazali na bonsomi ya kosala oyo balingi? Soki ezali bongo, kokanisa mbala moko te ete motema na yo esí ebebi mpe obongi kozala moklisto te. Kutu, Biblia yango moko elobi ete makambo ya mokili oyo ekoki mpenza kobenda ata moto oyo alingaka kosepelisa Nzambe.​—2 Timote 4:10.

3. (a) Mpo na nini kolanda makambo ya mokili oyo ezali na ntina te? (b) Ndenge nini moklisto moko amonisi ete ezali na ntina te kolanda makambo ya mokili oyo?

³ Sikoyo, talelá makambo ya mokili oyo malamumalamu, ndenge kaka okotalela malamumalamu elamba moko oyo esepelisi yo. Omituna motuna oyo: ‘Ebongiseli ya makambo ya ntango oyo ezali mpenza ndenge nini?’ Biblia elobi ete “mokili ezali koleka.” (1 Yoane 2:17) Ata likambo nini oyo ekoki kosepelisa moto na mokili oyo ezali se mpo na mwa ntango mokuse. Lisusu, moto oyo amipesi na makambo oyo Nzambe asepelaka na yango te, abukaka mbuma mabe mpenza. Ezalaka mpenza na litomba te. Moklisto moko oyo ayokaki oyo ye moko abengi “mpasi moto ayokaka soki abebisaki bolenge na ye na makambo ezangi ntina,” alobi boye: “Mokili ekoki komonana ngɛlingɛli mpe ekoki mpenza kobenda moto. Ezali mpe koluka komonisa yo ete okoki kosala makambo oyo ezali na mokili mpe ekosala yo eloko te. Kasi, ekoki kosalema bongo te. Mokili ekosalela yo tii ekolɛmba yo, na nsima esundoli yo.”a Na yango, mpo na nini kobebisa bolenge na yo na bomoi ezangi ntina ndenge wana?

Komibatela mpo na “moto mabe”

4, 5. (a) Mwa moke liboso akufa, Yesu abondelaki Yehova mpo na kosɛnga likambo nini? (b) Mpo na nini ebongaki mpenza asɛnga likambo yango?

⁴ Lokola bilenge Batatoli ya Yehova bakangi ntina ete mokili oyo ezali na eloko moko te ya malonga, basalaka makasi mpo bázala baninga na yango te. (Yakobo 4:4) Yo mpe ozali na kati ya bilenge yango ya sembo? Soki ɛɛ, topesi yo mpenza longonya. Ya solo, koboya kolanda baninga mpe kokesana na bango ezali likambo ya pɛtɛɛ te; kasi moto moko akoki kosalisa yo.

⁵ Mwa moke liboso akufa, Yesu abondelaki Yehova ete ‘akɛngɛla’ bayekoli na ye “mpo na moto mabe.” (Yoane 17:15) Yesu asɛngaki likambo yango na ntina. Ayebaki ete ekozala likambo ya pɛtɛɛ te mpo bayekoli na ye bátikala sembo, bázala bilenge to mikóló. Mpo na nini? Ya liboso, lokola ye moko Yesu alobaki yango, “moto mabe,” Satana Zabolo, monguna ya makasi oyo amonanaka te, akobundisa bayekoli na ye. Biblia elobi ete elimo mabe wana ‘ezali kotambola epai na epai lokola nkɔsi oyo ezali konguluma, kolukáká kolya moto.’​—1 Petelo 5:8.

6. Nini emonisi biso ete Satana ayokelaka bilenge mawa te?

⁶ Banda kalakala, Satana ayokaka esengo ntango azali konyokola bato na ndenge ya nsɔmɔ mpenza. Kanisá kaka mpasi oyo Satana ayokisaki Yobo ná libota na ye. (Yobo 1:13-19; 2:7) Mbala mosusu okoki koyeba lisusu bansango oyo yo moko oyokaki, oyo ezali komonisa elimo mabe oyo Satana azali na yango. Zabolo azali kosala bokila, lokola azali koluka eloko ya kolya, azali koyokela bilenge mawa te. Na ndakisa, na ekeke ya liboso, Elode abomisaki bana nyonso ya mibali ya Beteleme oyo bazalaki na mbula kobanda mibale tii na nse. (Matai 2:16) Ekoki mpenza kozala ete Satana nde akɔtelaki Elode, kaka mpo na koluka koboma mwana oyo, mokolo mosusu akokóma Masiya oyo Nzambe alakaki, oyo akopesa Satana etumbu oyo Nzambe akatelaki ye! (Genese 3:15) Ezali polele ete Satana ayokelaka bilenge mawa ata moke te. Azali na mposa se moko: kolya bato mingi oyo akokoka. Sikoyo Satana angali nde kongala na likambo yango mpamba te basili kobengana ye na likoló mpe babwaki ye awa na mabelé, “azali na nkanda makasi, mpo ayebi ete azali na eleko moko ya ntango mokuse.”​—Emoniseli 12:9, 12.

7. (a) Na ndenge nini Yehova akeseni mpenza na Satana? (b) Yehova alingaka mpenza ete yo osepela na bomoi?

⁷ Satana akeseni mpenza na Yehova; Satana azali na “nkanda makasi,” nzokande, Yehova azali na “mawa monene.” (Luka 1:78) Yehova atondi mpenza na bolingo. Kutu, lokola Mozalisi azali mpenza na ezaleli yango, Biblia elobi ete: “Nzambe azali bolingo.” (1 Yoane 4:8) Talá bokeseni monene kati na nzambe ya ebongiseli ya makambo ya ntango oyo ná Nzambe oyo ozwi libaku malamu ya kosambela! Satana alukaka kolya, nzokande, Yehova “alingi te moto ata moko abomama.” (2 Petelo 3:9) Bomoi ya moto mokomoko​—ata mpe oyo ya yo—​ezali na motuya mingi na miso ya Yehova. Ntango Yehova azali kolendisa yo na nzela ya Liloba na ye ete ozala moto ya mokili te, ezali te ete aboyi osakana to alingi ete ozala lokola moto ya bolɔkɔ. (Yoane 15:19) Azali nde kokɛngɛla yo mpo na moto mabe. Tata na yo ya likoló alingi ete yo ozwa eloko ya malamu koleka bisengo ya ntango mokuse ya mokili oyo. Mposa na ye ezali ete ozwa “bomoi ya solosolo,” elingi koloba bomoi ya seko na paladiso awa na mabelé. (1 Timote 6:17-19) Yehova alingi ete yo ozala malamu, mpe azali kolendisa yo omityela mokano wana. (1 Timote 2:4) Lisusu, Yehova azali kosɛnga yo likambo moko. Likambo nini?

“Sepelisá motema na ngai”

8, 9. (a) Eloko nini okoki kokabela Yehova? (b) Lokola lisolo ya Yobo emonisi yango, ndenge nini Satana atumolaka Yehova?

⁸ Esilá kokómela yo osomba eloko moko mpo na kokabela moninga moko mpe ntango opesi ye yango omoni na elongi na ye ete asepeli mingi mpe azali na botɔndi mpo na yango? Na ntembe te ozwaki ntango mpo na kokanisa eloko oyo ebongaki na ye. Sikoyo, talelá naino motuna oyo: Eloko nini okoki kokabela Mozalisi na yo, Yehova Nzambe? Na ntango omoni motuna oyo, okoki mbala mosusu kokanisa ete likambo yango ekoki kosalema te. Eloko nini Mozwi-ya-Nguya-Nyonso akoki kozala na mposa na yango epai ya moto? Eloko nini yo moto okoki kopesa ye oyo ye azangi? Biblia epesi eyano na Masese 27:11 (NW): “Mwana na ngai, zalá na bwanya mpe sepelisá motema na ngai, mpo napesa moto oyo azali kotumola ngai eyano.”

⁹ Na ntembe te oyebi, na nzela ya boyekoli na yo ya Biblia, ete Satana Zabolo nde atumolaka Yehova. Alobaka ete moto moko te asalelaka Nzambe na bolingo, ezalaka kaka mpo na koluka matomba na ye moko. Satana alobi ete soki Nzambe atiki bato bányokwama, bakotika mbala moko losambo ya solo. Na ndakisa, kanisá makambo oyo Satana ayebisaki Yehova mpo na moto ya sembo Yobo: “Yo otiki lopango kozingela mpo na ndako na ye mpe na biloko na ye nyonso epai na epai? Opamboli mosala na mabɔkɔ na ye mpe bibwele na ye esili kofuluka mingi kati na mokili. Nde tiká ete osembola lobɔkɔ na yo [sikoyo] mpe omama nyonso ezali na ye mpe akolakela yo mabe na miso na yo.”​—Yobo 1:10, 11.

10. (a) Likambo nini ezali komonisa biso ete ezali kaka bosembo ya Yobo te nde Satana atyelaki ntembe? (b) Ntembe oyo etali bokonzi etali yo na nini?

¹⁰ Ndenge oyo Biblia emonisi yango, Satana atyaki ntembe mpo na bosembo ya basaleli nyonso ya Yehova, bakisa mpe oyo ya yo, kasi ya Yobo kaka te. Kutu, Satana alobaki na Yehova likambo moko oyo etaleli bato nyonso: “Moto [nyonso, kasi Yobo kaka te] akopesa nyonso ezali na ye mpo na bomoi na ye.” (Yobo 2:4) Ozali komona mokumba oyo ozali na yango na kati ya ntembe yango? Ndenge Masese 27:11 emonisi yango, Yehova azali koloba ete ezali na eloko moko oyo okoki kopesa ye: okoki kopesa ye libaku ya koyanola moto oyo azali kotumola ye, elingi koloba Satana. Kanisá naino likambo yango! Nkolo Mokonzi ya molɔ́ngɔ́ azali kopesa yo libaku ya kozala na likambo ya koloba na ntembe oyo eleki bantembe mosusu nyonso na monene. Talá mokumba monene mpe libaku malamu oyo apesi yo! Okoki kosala likambo oyo Yehova azali kosɛnga yo? Yobo asalaki yango. (Yobo 2:9, 10) Yesu mpe asalaki yango mpe ebele ya bato mosusu, oyo mingi na bango bazalaki bilenge. (Bafilipi 2:8; Emoniseli 6:9) Yo mpe okoki kosala yango. Kasi, kokanisa te ete okoki koloba ete oboyi kokɔta na likambo yango. Misala na yo ekomonisa soki ozali na ngámbo ya Satana ná matumoli na ye to na ngámbo ya Yehova mpo na kopesa ye libaku ya kopesa eyano. Okopona ngámbo nini?

Yehova atyelaka yo likebi!

11, 12. Soki oponi kosalela Yehova to te, yango esalaka ye nini? Limbolá.

¹¹ Yehova akoki mpenza komitungisa na koyeba soki okopona ngámbo nini? Ebele ya bato oyo batikalaki sembo bakoki kaka te mpo na kopesa ye libaku ya kopesa Satana eyano? Ya solo, Zabolo alobaki ete moto ata moko te akosalela Yehova na bolingo mpe eyebani banda kala ete alobaki solo te. Kasi, Yehova alingi ete yo opona ngámbo na ye na ntembe oyo etaleli bokonzi, mpamba te azali kotyela yo likebi. Yesu alobaki ete: “Ezali likambo ya malamu te mpo na Tata na ngai oyo azali na likoló ete moko ya bana oyo ya mike abeba.”​—Matai 18:14.

¹² Ezali polele ete Yehova azali kotya miso na ye epai na yo mpo na kotala ngámbo oyo okopona. Lisusu, okoki kosepelisa ye to koyokisa ye mawa na kotalela ngámbo oyo okopona. Biblia ezali komonisa polele ete soki bato bazali kosala makambo ya malamu, yango esepelisaka motema ya Yehova, kasi soki bazali kosala makambo ya mabe, yango eyokisaka ye mawa. Na ndakisa, ntango Bayisalaele bazalaki mbala na mbala kotomboka, Yehova ‘ayokaki mawa.’ (Nzembo 78:40, 41, NW) Liboso ya Mpela ya mikolo ya Noa, ntango “masumu ya bato ezalaki mingi na mokili,” Yehova ayokaki “motema mpasi.” (Genese 6:5, 6, NW) Kanisá naino likambo ya ndenge wana. Soki olandi nzela ya mabe, okoki koyokisa Mozalisi na yo mpasi na motema. Yango elakisi te ete Nzambe azali na bolɛmbu to ayebi kokanga motema te. Kasi, elakisi nde ete alingaka yo mpe azali koluka bolamu na yo. Ntango ozali kosala makambo ya malamu, motema ya Yehova esepelaka. Ayokaka esengo mpamba te azwaka lisusu likoki ya kopesa Satana eyano, lisusu mpo epesaka ye likoki ya kopesa yo mbano. Mposa na ye ezali ete azala mopesi-mbano. (Baebele 11:6) Yehova Nzambe azali mpenza Tata na yo ya bolingo!

Ebele ya mapamboli sikoyo

13. Na ndenge nini kosalela Yehova ememelaka moto mapamboli ata sikoyo?

¹³ Kosalela Yehova ekopesa mapamboli kaka na mikolo ekoya te. Ebele ya bilenge Batatoli ya Yehova bazali na esengo mpe na bomoi ya malamu sikoyo mpe bazali kozwa yango mpamba te. Mokomi ya nzembo akomaki ete: “Bilakeli ya [Yehova] ezali alima, ekosepelisa motema.” (Nzembo 19:8) Yehova ayebi koleka moto mosusu nyonso makambo oyo ezali malamu mpo na biso. Na nzela ya mosakoli Yisaya, Yehova alobaki boye: “Ngai nazali [Yehova], Nzambe na yo, ye oyo akolakisa yo mpo na litomba, ye oyo akokamba yo na nzela ekoki na yo kotambola na yango. Soko oyokaki malako na ngai! mbɛlɛ kimya na yo ezalaki lokola ebale mpe boyengebene na yo lokola mbonge na mai-na-monana.”​—Yisaya 48:17, 18.

14. Ndenge nini malako ya Biblia ekoki kosalisa yo na kokima mpasi ya kokɔta nyongo?

¹⁴ Soki ozali kotosa malako ya Biblia, yango ekosalisa na koboya makambo mingi oyo epesaka mpasi mpe mawa. Na ndakisa, Biblia elobi ete bato oyo baloni bolingo ya mbongo “bamitɔbɔlitɔbɔli na ebele ya bampasi.” (1 Timote 6:9, 10) Oyebi bilenge mosusu oyo bakutanaki na makambo oyo ezali komonisa ete mokapo yango elobi solo? Bilenge mosusu bazali kokɔta banyongo ya mineneminene mpo balingi kozala na midɛlɛ ya sika ya bilamba ya ntalo mpe baapareyi oyo ezali kobima sika. Kokɔta banyongo mineneminene mpo na kozala na biloko oyo okoki kosomba te ezali komitya na boombo ya mpasi!​—Masese 22:7.

15. Ndenge nini kotosa malako ya Biblia ezali kobatela yo na bampasi oyo ezwaka bilenge oyo bamipesi na pite?

¹⁵ Tólobela mpe likambo ya pite. Mbula na mbula, na mokili mobimba, ebele ya bilenge basi oyo babali naino te bazali kokumba bazemi. Bamosusu kati na bango bazali kobota bana ya balabala mpe bazali kokoka te kobɔkɔla bango. Bamosusu bazali kolongola bazemi yango mpe bazali komibendela mikakatano mpamba te lisosoli na bango ezali ntango nyonso kotungisa bango. Ezali mpe na bilenge oyo bazali kozwa bamaladi mabe lokola sida. Kasi, mpo na elenge oyo ayebi Yehova, likambo eleki mabe ezali nde kobebisa boninga na ye na Yehova.b (Bagalatia 5:19-21) Yango wana, Biblia ezali koloba ete: “Bókima pite.”​—1 Bakolinti 6:18.

Ozali kosalela “Nzambe ya esengo”

16. (a) Nini ezali kondimisa biso ete Yehova alingi yo osepela na bolenge na yo? (b) Mpo na nini Yehova atyeli yo malako oyo osengeli kolanda?

¹⁶ Biblia elobi ete Yehova azali “Nzambe ya esengo.” (1 Timote 1:11) Alingi ete yo mpe ozala na esengo. Kutu, Liloba na ye elobi ete: “Sepela na bolenge na yo. Zala na esengo na tango ozali nanu elenge.” (Mosakoli 11:9, Bible na Lingala ya lelo oyo) Kasi, Yehova atalaka kaka makambo ya lelo te, akoki mpe komona matomba oyo moto ya etamboli malamu akozwa na nsima to mpe mbuma mabe oyo moto ya etamboli mabe akobuka na nsima. Yango wana azali kopesa yo toli oyo: “Kanisá [Mozalisi na yo Monene, NW] na mikolo ya bolenge na yo, naino mikolo mabe eyei te, naino [bambula] ekómi te wana okolobaka ete, Nazali na esengo na yango te.”​—Mosakoli 12:1.

17, 18. Elenge moko alobaki nini mpo na komonisa ete ayokaka esengo ndenge asalelaka Yehova, mpe ndenge nini yo mpe okoki koyoka esengo yango?

¹⁷ Lelo oyo, ebele ya bilenge bazali na esengo mingi lokola bazali kosalela Yehova. Na ndakisa, Lina, elenge mwasi moko ya mbula 15, alobi boye: “Nazali komitungisa na likambo moko te. Nazali nzoto kolɔngɔnɔ mpamba te namɛlaka likaya te mpe namɛlaka bangi te. Nazali kozwa toli ya malamu na lisangá, yango ezali kosalisa ngai na koboya masɛnginya ya Satana. Esengo na ngai ezali komonana ata na elongi na ngai mpo nazali na baninga ya malamu oyo nakutanaka na bango na Ndako ya Bokonzi. Oyo eleki malamu, nazali na elikya oyo ekokani na mosusu te ya bomoi ya seko awa na mabelé.”

¹⁸ Lokola Lina, ebele ya bilenge baklisto bazali kobunda etumba makasi mpo na kondima, mpe yango ezali kopesa bango esengo. Atako bakutanaka ntango mosusu na mikakatano, bomoi na bango ezali mpenza na ntina mpe bazali mpenza na elikya. Yango wana, landá kosalela Nzambe oyo alingi mpenza bolamu na yo. Sepelisá motema na ye, mpe akopesa yo esengo sikoyo mpe mpo na libela!​—Nzembo 5:11.

[Maloba na nse ya lokasa]

Ozali koyeba lisusu?

• Likama nini ozali na yango liboso ya “moto mabe,” Satana?

• Ndenge nini okoki kosepelisa motema ya Yehova?

• Ndenge nini Biblia emonisi ete Yehova atyelaka yo likebi?

• Tángá mwa mapamboli oyo ezwamaka na kosalela Yehova.

[Etanda/​Elilingi na lokasa 13]

Etikalaki moke moto moko ya sembo asala libunga

Asafa, moto moko ya libota ya Levi, azalaki alangá-nzembo monene na tempelo ya Yehova na Yisalaele ya kala. Kutu, asalaki banzembo mosusu oyo bazalaki koyemba na ntango ya losambo. Atako azwaki libaku malamu ya kozala na mikumba wana, na eleko moko boye Asafa akómaki kosepela na makambo mabe oyo bato mosusu bazalaki kosala. Azalaki komona ete bato yango bazali kozwa etumbu te atako bazalaki kobuka mibeko ya Nzambe. Na nsima, Asafa alobaki boye: “Makolo na ngai ebandaki kolongwa na nzela, etikalaki kaka moke matambe na ngai esɛlumwa. Mpo nazalaki kolula bato oyo bamikumisaka, ntango nazalaki komona kimya ya bato mabe.”​—Nzembo 73:2, 3, NW.

Na nsima, Asafa akendaki na ndako ya Nzambe mpe abondelaki mpo na likambo yango. Ayokaki lokola nde miso na ye ya elimo efungwami mpe akangaki ntina ete Yehova ayini mabe mpe ete nsukansuka, bato mabe bakobuka oyo bazali kolona, ndenge moko mpe, bato ya sembo bakobuka oyo bazali kolona. (Nzembo 73:17-20; Bagalatia 6:7, 8) Bato mabe bazali mpenza na esika ya mosɛlu. Ata ndɛlɛ, bakokwea ntango Yehova akoboma ebongiseli mabe oyo.​—Emoniseli 21:8.

[Bililingi na lokasa 15]

Yehova alingi ete yo ozala mpenza malamu, nzokande Satana azali na mposa ya kolya yo

[Elilingi na lokasa 16]

Bilenge mingi bazali mpenza na esengo ndenge bazali kosalela Yehova elongo na baklisto mosusu