“Bópusana penepene na Nzambe, mpe Ye akopusana penepene na bino”
Liboso mpe nsima moto ya mobulu akómi na elikya kitoko
“LILOBA ya Nzambe ezali na bomoi mpe ezali na nguya mpe epeli makasi koleka mopanga nyonso ya mino mibale . . . mpe ezali na likoki ya kososola makanisi mpe mikano ya motema.” (Baebele 4:12) Na maloba yango, ntoma Paulo amonisaki ete liloba ya Nzambe ezali na nguya ya kosimba mitema mpe makanisi ya bato. Nguya yango emonanaki mpenza na ekeke ya liboso ya ntango na biso (T.B.). Atako na ntango wana bato mingi bazalaki kolinga makambo ya mabe, baoyo bakómaki baklisto balataki bomoto ya sika.—Baloma 1:28, 29; Bakolose 3:8-10.
Nguya ya kobongola mitema oyo liloba ya Nzambe ezali na yango, ndenge oyo ekomami na Biblia, ezali mpe komonana lelo oyo. Tólobela ndakisa ya engambe mobali moko na nkombo Richard. Richard azalaki moto ya nkanda mingi, yango wana azalaki kobunda na moto oyo ameki kaka kotumola ye. Azalaki moto ya mobulu mpenza. Kutu, akómaki koyekola lisano ya makɔfi. Amipesaki mingi na lisano yango mpe akómaki moko na babundi makasi (poids lourds) ya etúká ya Westphalie, na Allemagne. Richard azalaki mpe komɛla masanga mingi mpe mbala mingi azalaki kobunda bitumba ya bato ebele. Kutu, mokolo mosusu na etumba ya ndenge wana, moto moko akufaki mpe etikalaki moke Richard akɔta bolɔkɔ.
Ndenge nini azalaki kofanda ná mwasi na ye? Richard alobi ete: “Liboso ngai ná Heike tóyekola Biblia, moto na moto azalaki kosala makambo na ye na ndenge alingi. Heike azalaki kolekisa ntango mingi elongo na baninga na ye basi mpe ngai nazalaki kolekisa ntango na masano oyo nazalaki kolinga mingi—mingimingi lisano ya makɔfi, surfing, mpe plongée.”
Ntango Richard ná Heike babandaki koyekola Biblia na Batatoli ya Yehova, Richard akómaki kotungisama mingi mpamba te azalaki kokanisa ete akokoka kobongwana te mpo na kolanda mitinda ya Liloba ya Nzambe. Kasi ntango ayebaki Yehova Nzambe malamumalamu, Richard akómaki na mposa makasi ya kosepelisa ye. Richard ayaki koyeba ete Nzambe andimaka te bato oyo balingaka mobulu to basepelaka na masano ya mobulu. Richard ayebaki ete “molimo ya [Yehova] eyinaka mpenza moto oyo alingi mobulu.”—Nzembo 11:5, NW.
Longola yango, Richard ná Heike basepelaki mingi na elikya ya kozala na bomoi libela na libela na paladiso awa na mabelé. Bazalaki mpenza na mposa ya kozala elongo na paladiso! (Yisaya 65:21-23) Maloba “bópusana penepene na Nzambe, mpe ye akopusana penepene na bino” esimbaki mpenza motema ya Richard. (Yakobo 4:8) Amonaki mpenza ntina ya kotosa toli ya Biblia oyo elobi ete: “Kolula moto ya mobulu te, kolanda mpe ata nzela na ye moko te. Mpamba te Yehova ayini mpenza moto ya mobulu, kasi azali moninga ya bayengebene.”—Masese 3:31, 32, NW.
Richard azalaki na mposa makasi ya kobongwana; kasi amonaki ete akokoka kosala yango na makasi na ye moko te. Amonaki ete asengeli kobondela Nzambe asalisa ye. Na bongo, asalelaki maloba ya Yesu epai ya bantoma na Ye ete: “Bóbondelaka ntango nyonso, mpo bókɔta na kati ya komekama te. Ya solo, elimo ezali na molende, kasi mosuni ezali na bolɛmbu.”—Matai 26:41.
Ntango Richard ayebaki ndenge oyo Nzambe atalelaka mobulu mpe nkanda makasimakasi, amonaki mpenza ete Nzambe alingaka lisano ya makɔfi te. Na lisalisi ya Yehova mpe na bilendiseli ya bato oyo bazalaki koyekola na ye Biblia, Richard atikaki mpenza mobulu. Atikaki lisano ya makɔfi mpe bitumba mpe azwaki ekateli ya kobongisa bomoi ya libota na ye. Richard, oyo azali sikoyo nkulutu moko ya boboto na lisangá moko ya Batatoli ya Yehova, alobi ete: “Solo ya Biblia oyo nayekoli esalisi ngai nayebaka kokanisa naino liboso ya kosala likambo.” Abakisi boye: “Sikoyo, ngai ná mwasi na ngai ná bana na biso tomonisanaka bolingo mpe limemya. Yango etye bomoko na kati ya libota na biso.”
Bato oyo bayebi Batatoli ya Yehova malamu te balobaka ete babebisaka mabota ya bato. Nzokande, ndakisa ya bato lokola Richard ezali komonisa ete maloba wana ezali solo te. Likambo ya solo ezali ete solo ya Biblia ekoki kotya kimya na kati ya mabota ya baoyo bazalaki bato ya mobulu mpe kopesa bango elikya kitoko.—Yilimia 29:11.
[Likanisi ya paragrafe na lokasa 9]
“Elikya ya paladiso awa na mabelé epesaki ngai mposa ya kobongwana”
[Etanda na lokasa 9]
Mitinda ya Biblia ezali kobongola bato
Biblia ekoki kobongola mpenza bomoi ya bato. Talá mwa ndambo ya mitinda oyo esalisaki bato ya mobulu bábongwana:
“Ye oyo akosilika noki te aleki bato ya makasi, mpe ye oyo akokanga motema na ye aleki [moto oyo abɔtɔli mboka mobimba, NW].” (Masese 16:32) Nkanda makasi ezali bolɛmbu kasi ezali bokasi te.
“Bososoli ya moto ya mayele [ekokitisa, NW] nkanda na ye.” (Masese 19:11) Kozala na bososoli mpe na mayele esalisaka moto atalela makambo na bozindo, asuka te na makambo ya mpambampamba oyo ekoki kobimisa mobulu mpe yango epekisaka ye atomboka.
‘Zalá moninga ya moto ya nkanda te, ete oyekola nzela na ye te.’ (Masese 22:24, 25) Baklisto balingaka te kozala baninga ya bato oyo balingaka kosilika pambapamba.