Mituna ya batángi

Ezali mabe koboma nyama ya ndako oyo ezali kobɛla makasi to oyo enuni mingi?

Bato mingi basepelaka kobɔkɔla banyama ndenge na ndenge na ndako. Banyama mosusu ekómaka baninga mpenza ná bankolo na yango. Na ndakisa, bambwa etosaka mpenza bankolo na yango mpe elingaka bango makasi. Yango wana, tokoki kokamwa te soki bato balingaka nyama ya ndenge wana makasi, mingimingi soki baumeli na yango ebele ya bambula.

Nzokande, banyama ya ndako mingi ezalaka na bomoi molai mpenza te. Mbwa mosusu ekoki koumela mbula 10, mosusu ata tii mbula 15, ndenge moko mpe na nyau. Soki nyama ya ndako enuni, ekoki kozwa bamaladi to mpe kolɛmba, mpe yango ekoki kosala bankolo na yango mpasi, soki bakanisi ntango ezalaki naino elenge mpe makasi. Ezali mabe soki obomi nyama ya ndenge wana mpo etika konyokwama?

Moklisto asengeli kosala banyama makambo oyo eyokani na mokano ya Nzambe. Ntembe ezali te ete konyokola banyama eyokani te na mokano ya Nzambe, mpamba te Liloba na ye elobi ete: “Moyengebene akobatela bomoi ya bibwele na ye.” (Masese 12:10) Kasi, yango elingi koloba te ete Nzambe atalelaka banyama ndenge oyo atalelaka bato. Ntango Nzambe akelaki bato, amonisaki ete bokeseni monene ezali na kati ya bato mpe banyama. Na ndakisa, apesaki bato elikya ya kozala na bomoi libela na libela, kasi apesaki banyama elikya yango ata moke te. (Baloma 6:23; 2 Petelo 2:12) Mozalisi azali na lotomo ya koyebisa biso ndenge tosengeli kotalela banyama.

Genese 1:28 eyebisi biso ndenge tosengeli kotalelaka banyama. Nzambe alobaki na bato ya liboso ete: “Bózala na bokonzi likoló ya mbisi na mai, mpe ya ndɛkɛ na likoló, mpe likoló ya nyama nyonso ya bomoi ekotambolaka na mokili.” Lisusu, Nzembo 8:6-8 elobi ete: “[Nzambe] otii biloko nyonso na nse ya makolo na ye [moto]; bampate nyonso mpe bangɔmbɛ mpe banyama ya zamba; ndɛkɛ ya likoló mpe mbisi ya mai.”

Nzambe amonisaki polele ete moto asengelaki kosalela banyama mpe koboma yango na ndenge oyo ebongi. Na ndakisa, akokaki kosala bilamba na mposo na yango. Nsima ya Mpela ya ntango ya Noa, Nzambe apesaki mpe bato ndingisa ya kolya misuni ya nyama, mpe na ndenge yango abakiselaki bango biloko mosusu ya kolya likoló ya ndunda oyo apesaki bango na ebandeli.​—Genese 3:21; 4:4; 9:3.

Yango epesi moto ndingisa te ya koboma banyama na nko kaka mpo na lisano. Na Genese 10:9 (NW), Biblia elobi ete Nimilode azalaki “mobomi makasi ya nyama.” Kasi kaka vɛrsɛ yango elobi lisusu ete mpo na yango azalaki “kotɛmɛla Yehova.”

Na yango, atako moto azali na bokonzi likoló ya banyama, asengeli te kosalela bokonzi yango na ndenge ya mabe, kasi asengeli nde kosalela yango na boyokani na mitinda ya Liloba ya Nzambe. Yango ekoki mpe kosɛnga ete atika te nyama enyokwamaka na bobange, na mpota ya monene to na maladi oyo emonani ete ekobika na yango te. Na likambo ya ndenge wana, moklisto asengeli kopona oyo akosala. Akoki kopona koboma nyama yango soki amoni ete elikya ezali lisusu te ete ekobika.