Ndenge oyo tomonisaka ete tolingaka Nzambe

MPO moto alinga Nzambe, esengeli kaka te ayekola makambo na ye. Basaleli ya Nzambe na mokili mobimba bayebi malamu ete moto akómaka na bolingo ya solosolo mpo na Nzambe ntango ayebi malamumalamu bomoto na ye; mpe bolingo yango ekómaka lisusu makasi ntango azali koyeba mpenza makambo oyo Yehova alingaka, oyo ayinaka, oyo asepelaka na yango mpe oyo azali kosɛnga epai na biso.

Na bolingo na ye, Yehova apesi biso Liloba na ye, Biblia, oyo na kati na yango amimonisi epai na biso. Na Biblia, tomonaka makambo ndenge na ndenge oyo Yehova asalaki. Ndenge kaka tosepelaka ntango moto oyo tolingaka atindeli biso mokanda, ndenge moko mpe tosepelaka soki tomoni na Biblia makambo ya sika oyo ezali komonisa biso bomoto ya Yehova.

Kasi, lokola tomonaka yango na mosala na biso ya kosakola, ezali te moto nyonso oyo ayekoli makambo ya Nzambe nde akómaka kolinga ye. Yesu alobaki na Bayuda mosusu ya ntango na ye oyo bazangaki botɔndi boye: “Bozali kolukaluka na kati ya Makomami, mpamba te bozali kokanisa ete na nzela na yango bokozwa bomoi ya seko; . . . kasi nayebi malamu ete bozali te na bolingo ya Nzambe na kati na bino.” (Yoane 5:39, 42) Bato mosusu balekisaka bambula mingi na koyekola misala ya Yehova, kasi bakómaka na bolingo mingi te mpo na ye. Mpo na nini? Mpo bamanyolaka te ndimbola ya makambo oyo bayekolaka. Nzokande, ebele ya bato mosusu ya sembo oyo tozali koyekola na bango Biblia bazali komona mpenza ete bolingo na bango mpo na Nzambe ezali se kobakisama. Mpo na nini? Mpamba te, ndenge moko na biso, bango mpe bazali kolanda ndakisa ya Asafa. Na ndenge nini?

Tómanyolaka na botɔndi nyonso

Asafa azwaki mokano ya kokolisa bolingo mpo na Yehova na kati ya motema na ye. Akomaki boye: “Nazali koloba kati na motema na ngai mpenza . . . Tiká nakanisa lisusu yango esalaki Ya; tiká nakanisa misala na yo ya kokamwa, yango ya kalakala. Nakobanzaka mpe mosala na yo nyonso, [nakotalela, NW] yango nyonso esali yo.” (Nzembo 77:6, 11, 12) Moto akolisaka bolingo ya Nzambe na motema na ye ntango azali kobanza to komanyola banzela ya Yehova lokola mokomi ya nzembo.

Lisusu, soki tozali kokanisa makambo ya malamu oyo tokutaná na yango na mosala ya Yehova, yango ekokolisa lisusu boyokani na biso na ye. Ntoma Paulo alobaki ete tozali “bato oyo bazali kosala elongo” na Nzambe; nzokande bato oyo basalaka elongo bakómaka na boninga makasi mpenza. (1 Bakolinti 3:9) Ntango tozali komonisa Yehova bolingo na maloba mpe na misala, yango esepelisaka ye mpenza. (Masese 27:11) Soki mpe tosɛngi Yehova asalisa biso tólonga mokakatano moko mpe asalisi biso, tomonaka mpenza ete azali na biso, mpe bolingo na biso mpo na ye ekómaka lisusu makasi.

Bato mibale bakómaka baninga makasi ntango mokomoko azali koyebisa moninga ete asepelaka na ye. Ndenge moko mpe, soki tozali koyebisa Yehova ntina oyo tomipesi na ye, tokokóma lisusu kolinga ye makasi. Tokomona mpenza ete tozali kokokisa maloba ya Yesu oyo: “Osengeli kolinga Yehova Nzambe na yo na motema na yo mobimba mpe na molimo na yo mobimba mpe na makanisi na yo nyonso mpe na makasi na yo nyonso.” (Malako 12:30) Tokoki kosala nini mpo tólingaka Yehova ntango nyonso na motema na biso mobimba, na molimo na biso mobimba, na makanisi na biso nyonso mpe na makasi na biso nyonso?

Kolinga Yehova na motema na biso mobimba

Biblia elobelaka motema ya elilingi, oyo ezali bomoto ya kati, elingi koloba bamposa, bizaleli, makanisi mpe mayoki na biso. Na bongo, kolinga Yehova na motema na biso mobimba elimboli ete, koleka makambo mosusu nyonso, tozali na mposa ya kosepelisa Nzambe. (Nzembo 86:11) Tomonisaka bolingo ya ndenge wana ntango tozali komitambwisa na ndenge oyo esepelisaka ye. Tosalaka makasi mpo na komekola Nzambe na ‘koyina oyo ezali mabe mpe kokangama na oyo ezali malamu.’​—Baloma 12:9.

Bolingo na biso mpo na Nzambe emonanaka mpe na ndenge totalelaka makambo nyonso. Na ndakisa, tokoki kosepela na mosala na biso mingi to komipesa mpenza na yango; kasi tosengeli nde kotya motema na biso mobimba na mosala yango? Te. Lokola tolingaka Yehova na motema na biso mobimba, tozali libosoliboso basaleli ya Nzambe. Ndenge moko mpe, tosengeli kosepelisa baboti na biso, molongani na biso, mpe patrɔ na biso; kasi, tokomonisa ete tolingaka Yehova na motema na biso mobimba soki tozali koluka libosoliboso kosepelisa ye. Na makambo nyonso, Yehova abongi mpenza kozwa esika ya liboso na motema na biso.​—Matai 6:24; 10:37.

Kolinga Yehova na molimo na biso mobimba

Na kati ya Biblia, liloba “molimo” elimbolaka libosoliboso bomoto na biso mobimba mpe bomoi na biso. Na yango, kolinga Yehova na molimo na biso mobimba elimboli ete tozali kosalela bomoi na biso mobimba mpo na kosanzola ye mpe mpo na komonisa ete tolingaka ye.

Ya solo, tokoki kozala na mposa ya makambo mosusu na bomoi, na ndakisa koyekola mosala moko boye, kosala mombongo to kobala mpe kobota bana. Kasi tokomonisa ete tolingaka Yehova na molimo na biso mobimba soki tozali “koluka liboso bokonzi mpe boyengebene na ye” na kosala makambo na ndenge ye alingaka mpe na kotya eloko na eloko na esika na yango na bomoi na biso. (Matai 6:33) Kosambela Nzambe na molimo na biso mobimba esɛngaka mpe tózala na molende. Tomonisaka Yehova ete tolingaka ye ntango tosakolaka nsango ya Bokonzi na molende, topesaka biyano ya kolendisa na makita ya lisangá to ntango tosalisaka bandeko na biso baklisto. Na makambo nyonso, tozali kotika te ‘kosala mokano ya Nzambe na molimo mobimba.’​—Baefese 6:6.

Yesu amonisaki ete alingaka Nzambe na molimo na ye mobimba na ndenge amiboyaki ye moko. Atyaki mokano ya Nzambe liboso ya bamposa na ye moko. Yesu asɛngaki biso tólanda ndakisa na ye. Alobaki boye: “Soki moto alingi kolanda ngai, tiká amiboya ye moko mpe amema nzete na ye ya mpasi mpe alanda ngai ntango nyonso.” (Matai 16:24, 25) Komiboya biso moko elimboli komipesa. Yango elingi koloba ete tolingi Nzambe mingi mpe tomikabi mobimba epai na ye, ndenge baombo na Yisalaele ya kala bazalaki kosala; Moombo oyo alingi nkolo na ye mingi, azalaki komikaba epai na ye mpo na libela. (Deteronome 15:16, 17) Soki tomipesi epai ya Yehova, yango ekomonisa mpenza ete tolingaka ye.

Kolinga Yehova na makanisi na biso nyonso

Kolinga Yehova na makanisi na biso nyonso elimboli kosala nyonso oyo tokoki mpo na koyeba bomoto ya Yehova, mikano na ye mpe masɛngami na ye. (Yoane 17:3; Misala 17:11) Tomonisaka bolingo na biso mpo na Yehova ntango tozali kosalela mayele na biso nyonso mpo na kosalisa bato mosusu bálinga Yehova mpe ntango tozali kokolisa mayele na biso ya koteya. Ntoma Petelo alobaki boye: “Bóbongisa makanisi na bino mpo na mosala.” (1 Petelo 1:13) Lisusu, tosalaka nyonso mpo na koluka bolamu ya bato mosusu, mingimingi baninga na biso basaleli ya Nzambe. Tolukaka koyeba soki bazali malamu mpe topesaka bango longonya soki basali likambo moko ya malamu to tobɔndisaka bango na ntango ya mpasi.

Tomonisaka Yehova ete tolingaka ye na makanisi na biso nyonso ntango tozali kotika ye atambwisa makanisi na biso. Tolukaka kotalela makambo ndenge ye atalelaka yango, tolukaka koyeba likanisi na ye ntango tozali kozwa bikateli, mpe tondimaka mpenza ete lolenge na ye ya kotalela makambo nde eleki malamu. (Masese 3:5, 6; Yisaya 55:9; Bafilipi 2:3-7) Kasi, ndenge nini tokoki kosalela makasi na biso ntango tozali kokoba komonisa bolingo na biso mpo na Yehova?

Kolinga Yehova na makasi na biso nyonso

Na lisangá ya boklisto, bilenge mingi basalelaka makasi na bango mpo na kosanzola Yehova. (Masese 20:29; Mosakoli 12:1) Lolenge moko oyo ebele ya bilenge baklisto bamonisaka ete balingaka Yehova na makasi na bango nyonso ezali kosala mosala ya mobongisi-nzela. Bamama mingi basalaka mosala ya kosakola ntango bana na bango bakei kelasi. Bankulutu ya sembo bamonisaka ete balingaka Yehova na makasi na bango nyonso mpamba te, longola mokumba oyo bazali na yango ya kokokisa bamposa ya mabota na bango, bakendaka mpe kotala bandeko na bandako na bango. (2 Bakolinti 12:15) Yehova apesaka nguya na baoyo nyonso batyelaka ye elikya mpo básalela makasi na bango nyonso mpo na kosanzola ye, mpe na bongo, komonisa bolingo na bango epai na ye.​—Yisaya 40:29; Baebele 6:11, 12.

Bolingo ekómaka makasi soki bazali kolona yango malamu. Yango wana, totikaka te kozwa ntango ya komanyolaka. Tokanisaka makambo oyo Yehova asalá mpo na biso mpe ntina oyo ebongi tómipesa mobimba epai na ye. Biso bana ya Adama, bato ya kozanga kokoka, tobongi ata moke te na “makambo oyo Nzambe abongisá mpo na baoyo balingaka ye,” kasi tokoki komonisa ete tolingaka Yehova na bomoto na biso mobimba. Tiká ete tókoba kosala bongo!​—1 Bakolinti 2:9.

[Elilingi na lokasa 20]

Misala na biso nde emonisaka ete tolingaka Nzambe