Ekaniseli oyo etaleli mpe yo

NTANGO Yesu Klisto azalaki awa na mabelé, abandisaki ekaniseli moko oyo epesaka Nzambe nkembo. Ezali ekaniseli kaka moko oyo atindaki bayekoli na ye básalaka. Ezali Bolei ya Mpokwa ya Nkolo; babengaka yango mpe Elambo ya Nsuka.

Salá lokola ozali komona na makanisi makambo oyo elekaki tii ntango Yesu abandisaki ekaniseli yango. Yesu ná bantoma na ye bayei na Yelusaleme, bamati na ndako moko ya etaze mpo na kolya Pasika, fɛti moko ya Bayuda. Basilisi kolya bilei ya Pasika, oyo ezalaki mpate batumbá, ndunda ya mobesu, limpa batyá levire te, mpe komɛla vinyo ya motane. Yesu abimisi Yuda Mokeliota, ntoma oyo atikalaki sembo te mpe oyo nsima ya mwa ntango akotɛka Nkolo na ye. (Matai 26:17-25; Yoane 13:21, 26-30) Yesu atikali kaka ye ná bantoma na ye 11 ya sembo. Matai azali moko na bantoma yango.

Lisolo oyo Matai, moto oyo amonaki makambo yango na miso, akomaki eyebisi ndenge oyo Yesu abandisaki Bolei ya Mpokwa ya Nkolo: “Yesu akamataki limpa [batya levire te] mpe, nsima ya kopesa lipamboli, abukaki yango mpe, apesaki yango na bayekoli, alobaki ete: ‘Bókamata, bólya. Oyo elakisi nzoto na ngai.’ Lisusu, akamataki kɔpɔ [ya vinyo] mpe, kopesáká matɔndi, apesaki bango yango, kolobáká ete: ‘Bómɛla yango, bino nyonso; mpo yango elakisi “makila ya kondimana” na ngai, oyo ekosopama mpo na bato mingi mpo na bolimbisi ya masumu.’”​—Matai 26:26-28.

Mpo na nini Yesu abandisaki Bolei ya Mpokwa ya Nkolo? Mpo na nini asalelaki limpa ezangi levire ná vinyo ya motane? Esengeli ete bayekoli nyonso ya Klisto bályaka limpa mpe bámɛlaka vinyo? Mbala boni esengeli kokanisaka bolei yango? Mpe, likambo yango ezali mpenza na ntina mpo na yo?