Masolo ya basakoli ya Bokonzi

Libota moko ya sembo ezali kokumisa nkombo ya Yehova

NA MABELÉ mobimba, Batatoli ya Yehova, bilenge mpe mikóló, bayebani ete bazali bato ya bosembo. Tótalela bandakisa oyo euti na bakɔntina misato.

Olusola, elenge mwasi moko ya mbula 17 oyo afandaka na Nigeria, azalaki kokende na kelasi mokolo moko mpe amonaki potɔmɔni moko na nse. Alɔkɔtaki yango mpe amemaki yango epai ya mokambi ya eteyelo; mokambi atángaki mbongo yango, ezalaki soki dolare 45. Mokambi ya eteyelo azongisaki potɔmɔni yango epai ya molakisi oyo akweisaki yango. Mpo na komonisa botɔndi na ye, molakisi yango apesaki Olusola dolare soki 7 mpe ayebisaki ye afuta na yango kelasi. Ntango bana mosusu ya kelasi bayokaki likambo yango, basɛkaki Olusola makasi. Mwa bapɔsɔ na nsima, mwana-kelasi moko abungisaki mbongo, mpe basɛngaki balakisi báluka mbongo yango epai ya bana kelasi nyonso. Molakisi alobaki na Olusola boye: “Yo tɛlɛmá awa. Nayebi ete yo okoki koyiba te, mpo ozali Motatoli ya Yehova.” Bamonaki mbongo yango epai ya bana mibale kati na baoyo basɛkaki Olusola mpe bapesaki bango etumbu makasi. Olusola akomaki boye: “Nazali na esengo mingi ndenge nayebani lokola Motatoli ya Yehova, moto oyo akoki koyiba te; mpe yango ezali kokumisa nkombo ya Yehova.”

Mokolo moko Marcelo, moto moko ya Argentine, amonaki mwa sakosi moko na nse, pene na porte ya nsima ya ndako na ye. Azwaki mwa sakosi yango, akɔtaki na yango na ndako mpe ye ná mwasi na ye bafungolaki yango. Likambo ya kokamwa, bakutaki ebele ya mbongo, bakarte ya kredi, mikanda ya kobimisa mbongo na banki, oyo moko na yango ezalaki ya ba euro 250 000. Bamonaki mpe nimero ya telefone. Babengaki mokóló sakosi yango mpe bayebisaki ye aleka na esika Marcelo asalaka mpo bázongisela ye sakosi na ye ná biloko nyonso oyo ezalaki na kati. Ntango mokóló sakosi yango ayaki, azalaki motema likolólikoló. Patrɔ ya Marcelo ayebisaki ye atika kobanga mpo Marcelo azali Motatoli ya Yehova. Mokóló sakosi yango apesaki Marcelo kaka dolare soki 6 lokola mbano. Mokonzi ya Marcelo asepelaki na likambo yango ata moke te mpo amonaki ete bosembo ya Marcelo ebongi na likabo ya moke ndenge wana te. Yango epesaki Marcelo nzela ya koyebisa bango ete lokola azali Motatoli ya Yehova, asengeli ntango nyonso kozala sembo.

Lisolo oyo elandi euti na Kirghizistan. Rinat, mwana mobali moko ya mbula 6, alɔkɔtaki pɔtɔmɔni ya mwasi moko oyo azalaki kofanda mosika te na bango. Pɔtɔmɔni yango ezalaki na dolare soki 25. Rinat azongiselaki mwasi yango pɔtɔmɔni na ye, kasi ntango mwasi yango atángaki mbongo na ye, ayebisaki mama ya Rinat ete dolare 5 ezangi. Rinat alobaki ete azwi mbongo wana te. Na nsima, bakendeki bango nyonso koluka mbongo yango mpe bamonaki yango pene na esika oyo Rinat alɔkɔtaki pɔtɔmɔni yango. Mwasi yango akamwaki. Atɔndaki mpenza Rinat ná mama na ye, libosoliboso mpo bazongiselaki ye mbongo na ye oyo ebungaki, mpe ya mibale mpo na ndenge mama na ye azali kobɔkɔla ye na mitinda ya boklisto.