Ozali kotungisama na makanisi?

NA BOUMELI ya bambula mingi ya bomoi na ye, Lena atungisamaki mingi na makanisi. Alobaki boye: “Basangisaki na ngai nzoto na makasi mbala mingi ntango nazalaki naino mwana moke. Likambo yango esilisaki ngai mpenza valɛrɛ. Nazalaki komona ete nazali lisusu na ntina moko te.” Simone mpe akanisaki bolenge na ye mpe alobaki ete: “Nazalaki komona ete eloko moko ezali kozanga ngai mpe ete nazali na ntina moko te.” Bato mingi lelo oyo bakómi na makanisi ya ndenge wana, oyo esilisaka mpenza esengo ya moto. Ebongiseli moko oyo epesaka bana toli na telefone elobi ete bilenge mingi oyo babengaka bango balobaka ete: “Bazali na ntina moko te na bomoi.”

Bato mosusu ya mayele balobaka ete bato babandaka komimona mpamba soki bato mosusu bazali kozwa bango na kilo te. Moto akoki kokóma na makanisi yango soki bazali kogangelagangela ye, kotyola ye, kolobela ye mabe to kosalisa ye misala lokola nyama. Makambo wana nyonso ekoki kolɛmbisa moto, ata mpe kobebisa ye. Minganga bauti komona na bolukiluki na bango ete bato oyo bamimonaka mpamba bamindimaka bango moko te mpe bandimaka bato mosusu te, mpe bongo babebisaka boyokani to boninga na bato mosusu, kozanga ete báyeba yango. Na lapolo ya bolukiluki yango balobaki boye: “Tokoki koloba ete bato yango bazali ‘komitya’ lisusu nde na kati ya likambo oyo bazali koboya.”

Mbala mingi, bato oyo bakanisaka bongo bakweaka na oyo Biblia ebengi “ebele ya makanisi” na bango moko oyo ezali kotungisa bango. (Nzembo 94:19) Bamonaka ete bazali lisusu na valɛrɛ ata moke te. Soki basali likambo moko ya mabe, bamipesaka mbala moko foti. Ata soki bakumisi bango mpo na makambo ya malamu oyo basali, na makanisi na bango bamonaka ete ezali kaka lokumu ya kodefa, mpe mosika te bozoba na bango ekomonana. Lokola bakanisaka ete babongi te kozala na esengo, mingi bakómaka na ezaleli ya komiboma, oyo bamonaka ete bakoki kobongisa lisusu te. Lena, oyo tolobeli na ebandeli ya lisolo oyo, akómaki komiboma na nzala mpo azalaki komimona lisusu na valɛrɛ te, mpe alobaki ete, “nakokaki te kotika ezaleli yango.”

Bato oyo bazali komitungisa na “ebele ya makanisi” ndenge wana bakotikala kaka bongo bomoi na bango mobimba? Bakoki kosala eloko moko te mpo na kolonga makanisi yango? Biblia ezali na mitinda mpe batoli ya malamu mpenza oyo esalisi bato ebele bálonga etumba yango. Mitinda yango ezali nini, mpe ndenge nini esalisi bato oyo bazalaki kotungisama na makanisi bákóma na esengo na bomoi na bango? Lisolo oyo elandi ekolobela yango.