Kozala sembo ezali na ntina?

KARL, oyo asalaka na kompanyi moko ya asiransi alobaki boye: “Mbongo oyo bozali kofuta na bakompanyi mosusu mpo na asiransi eleki mingi.a Soki boyei na kompanyi na biso, sanza na sanza bokobanda kotikala na dolare 20 na mbongo oyo bozali kofuta epai mosusu; 20 dolare ezali mbongo moke te!”

Jens azongiselaki ye boye: “Likambo olobi ekoki kozala solo. Kasi, ngai nafutaka asiransi na ngai kaka na kompanyi moko banda ebele ya bambula. Basalisaka ngai mingi mpe nalingi kozala sembo epai na bango.”

Karl azongisaki boye: “Kozala sembo ezali malamu mingi. Kasi, lokola olingi kaka kotikala sembo na kompanyi wana, okobungisa mbongo mingi!”

Karl alobaki lokuta te. Mbala mingi, kozala sembo epai ya moto mosusu ekoki kolya yo mbongo mingi. Elyaka mpe ntango, makasi, mpe esɛngaka otya makanisi mpe motema na yo nyonso epai na ye. Kozala sembo ezali mpenza na litomba?

Bato mingi bakumisaka yango, kasi basalelaka yango te

Na ankɛtɛ moko oyo ebongiseli moko ya Allemagne (Institut de sondage Allensbach) esalaki, bato mingi (96%) balobaki ete kozala sembo epai ya basusu ezali ezaleli moko ya malamu. Na ankɛtɛ mosusu oyo ebongiseli yango esalaki epai ya bilenge ya mbula 18 tii 24, mingi kati na bango (2/3) balobaki ete moto oyo azalaka sembo epai ya basusu azali moto oyo “afungwamá,” elingi koloba bamonaka ete kozala sembo ezali malamu.

Atako bato mingi bakumisaka ezaleli yango, ezalaka mpasi komona bato oyo bazali mpenza sembo. Na ndakisa, na bikólo mingi ya Mpoto, emonanaka mbala na mbala ete balongani to bato ya libota bazalaka sembo te moko epai ya mosusu. Mbala mingi, baninga bazalaka sembo te moko epai na mosusu. Mpe ezaleli yango, oyo ezalaki mpenza komonana epai ya bapatrɔ ná bato na bango ya mosala mpe epai ya bato ya mombongo ná bakiliya na bango ebungi mpenza. Mpo na nini?

Ntango mosusu, lokola bomoi ya lelo oyo ezali kosɛnga bato básalaka makambo nyonso mbangumbangu, bazali lisusu na ntango te ya komipesa mingi epai ya basusu. Ekoki mpe kozala ete bato oyo bakosá bango to basundolá bango balingaka lisusu te komipesa makasi epai ya basusu. Bamosusu kutu balingaka lisusu te kosala na bato mosusu boninga ya makasi, oyo ekosɛnga bango bázala sembo epai ya bato yango.

Ezala mpo na ntina boye to boye, kozala sembo ezali ezaleli oyo bato mingi bakumisaka, kasi basalelaka yango te. Yango wana, mituna yango oyo: Kozala sembo ezali mpenza na ntina? Soki ezali na ntina, epai ya nani tosengeli kozala sembo, mpe na makambo nini? Wapi matomba ya kozala sembo?

[Maloba na nse ya lokasa]

[Likanisi ya paragrafe na lokasa 3]

Kozala sembo ezali ezaleli oyo bato mingi bakumisaka, kasi basalelaka yango te