Mituna ya batángi

Kobɛta masano ya video oyo ezali kolakisa bitumba ekoki nde kobebisa boyokani na biso ná Yehova?

Davidi, mokonzi ya Yisalaele ya kala, akomaki boye: “Yehova atalaka moto ya boyengebene mpe moto mabe, mpe ye oyo alingaka mobulu, molimo na ye eyini ye mpenza.” (Nzembo 11:5, NW) Liloba ya Liebele oyo ebongolami na “koyina” ekoki kolimbola “moto oyo azali monguna.” Na yango, moto nyonso oyo alingaka mobulu amikómisaka monguna ya Nzambe. Yango wana, motuna oyo tosengeli komituna yango oyo: Kobɛta masano mosusu ya video ekoki nde kotinda moto akóma kolinga mobulu?

Masano ya video oyo ezali kolakisa bitumba elendisaka kosalela mindoki. Mbala mingi masano yango eteyaka moto oyo azali kosalela yango mayele ya bitumba. Zulunalo moko (The Economist) elobaki boye: “Bakonzi ya basoda ya Amerika bazali kosalela mingi masano ya video mpo na kopesa bato formasyo ya bitumba. Masano mosusu ya video oyo basoda bayekolaka na yango ezali kaka masano oyo bazali kotɛkela bato nyonso.”

Toboyi te, bato oyo babɛtaka masano ya video babomaka bato ya solo te. Kasi masano ya ndenge wana ekoki kosala nini na mitema na bango? (Matai 5:21, 22; Luka 6:45) Okoki koloba nini mpo na moto oyo asakanaka na mbeli to na mondoki mpo na kosala lokola azali koboma bato? Okanisi boni soki moto yango alekisaka bangonga mingi pɔsɔ na pɔsɔ mpo na kotala masano ya ndenge wana mpe akómi lokola moombo na yango? Na ntembe te, okoloba ete moto yango akómi kolinga mobulu kaka ndenge moto oyo atalaka bafilme ya bato bazali bolumbu to bazali kosangisa nzoto akómaka na bamposa ya mabe.​—Matai 5:27-29.

Koyina ya ndenge nini Yehova ayinaka moto oyo alingaka mobulu? Davidi alobi ete Yehova ‘ayini ye mpenza.’ Na mikolo ya Noa, Yehova amonisaki koyina oyo ayinaka bato oyo balingaka mobulu. Yehova alobaki na Noa boye: “Nasili kokana kosilisa bato nyonso, mpo ete mokili etondi na yauli mpo na bango. Mpe nakobebisa bango na mokili elongo moko.” (Genese 6:13) Nzambe ya solo abomaki bato nyonso ya ntango wana mpamba te bazalaki kosala makambo ya mobulu. Abatelaki kaka Noa ná libota na ye​—bato mwambe oyo bazalaki kolinga makambo ya mobulu te.​—2 Petelo 2:5.

Bato oyo balingi kozala baninga ya Yehova ‘batulaka mipanga na bango ete ezala bitimweli, mpe makɔnga na bango ete ezala bikateli ya matiti.’ Na esika bato yango bálingaka mobulu, ‘bayekolaka etumba lisusu te.’ (Yisaya 2:4) Mpo na kozala moninga ya Nzambe, tosengeli ‘kokima oyo ezali mabe mpe kosala oyo ezali malamu.’ Tosengeli ‘koluka kimya mpe kolanda yango.’​—1 Petelo 3:11.

Tosengeli kosala nini soki tobɛtaka masano ya video oyo ezali kolakisa bitumba? Tosengeli kozwa ekateli makasi ya kosepelisa Yehova, elingi koloba kotika masano oyo ye ayinaka. Tosengeli mpenza kobondela Nzambe apesa biso elimo santu na ye mpo esalisa biso tótika likambo yango ya mabe oyo ekoki kobebisa elimo na biso. Tokoki kotika kobɛta masano ya ndenge wana soki totiki nzela ete bizaleli ya malamu lokola kimya, bolamu, mpe komipekisa esalisa biso tóndima makanisi ya Nzambe na bomoi na biso.​—Luka 11:13; Bagalatia 5:22, 23.