Mateya ya ndenge nini ekoki kosalisa yo ozala malamu na bomoi?

ESILÁ kokómela yo oyoka ete makambo eleki yo motó? Kanisá naino mpasi oyo okokaki komibendela soki ozwaki ekateli ya mabe ata na moko ya makambo yango! Moto moko te azalaka na likoki ya kolonga mikakatano nyonso oyo ekoki kobima to kozwa ntango nyonso bikateli ya malamu. Yango wana, mateya ezali na ntina mingi. Epai wapi okoki kozwa mateya oyo ekobongisa yo mpo oyeba kozwa bikateli ya malamu na mikakatano oyo okoki kokutana na yango na bomoi?

Bilenge mpe mikóló mingi balobaka ete kotánga kelasi ezali na ntina mingi. Kutu, bato mosusu ya mayele balobaka ete “soki moto azali na diplome ya iniversite te, akozwa mosala ya [malonga] ata mokolo moko te.” Nzokande, ezali na makoki mosusu oyo bato basengeli kozala na yango oyo kelasi to bozwi ekoki kosalisa bango te mpo na kokóma na yango. Na ndakisa, kotánga bakelasi ya milai ekoki nde kosalisa yo ozala moboti, molongani to moninga ya malamu? Kutu, bato oyo mokili ekumisaka mpo na mayele na bango bakoki kozala na makambo ya mabe, kozala na esengo te na mabota na bango, to mpe komiboma.

Bato mosusu batyaka motema na mateya ya mangomba mpo esalisa bango, kasi balɛmbaka nzoto mpo balakisaka bango te makambo oyo basengeli na yango mpo na kosilisa mikakatano oyo bazali kokutana na yango. Na ndakisa, Emilia,a mwasi moko na Mexique, alobi boye: “Eleki sikoyo mbula 15, nakanisaki ete libala na biso ekoumela lisusu te. Tokómaki koswana ntango nyonso. Nasalaki nyonso mpo mobali na ngai atika masanga, kasi nakokaki te. Mbala mingi nazalaki kotika bana na biso ya mike bango moko na ndako mpo nakende koluka ye. Nakómaki na nsuka. Mbala mingi nazalaki kokende na ndako-nzambe mpo nayoka likambo moko oyo ekoki kosalisa ngai nalonga mokakatano wana. Atako na bantango mosusu bazalaki kotánga Biblia, nayokaki ata toli moko te oyo ekokaki kosalisa ngai na mokakatano na ngai; moto moko mpe te ayebisaki ngai likambo oyo nasengeli kosala. Kolekisa mwa ntango na ndako-nzambe mpe kozongelaka mwa mabondeli esalisaki ngai te.” Bato mosusu bakoki kolɛmba nzoto ntango bazali komona ete bakambi ya mangomba bango moko bazali kopesa ndakisa ya malamu te. Mpo na yango, bato mingi bazali lisusu kotya motema te ete lingomba ekoki kopesa bango mateya oyo basengeli na yango mpo bázala malamu na bomoi.

Yango wana, okoki komituna boye, ‘mateya ya ndenge nini nasengeli kolanda mpo nazala na bomoi ya malamu?’ Boklisto ya solo ekoki kopesa eyano na motuna wana ya ntina mingi? Tokolobela yango na lisolo oyo elandi.

[Maloba na nse ya lokasa]