Zabolo azalaka mpenza?

NDENGE nini otalelaka Zabolo? Okanisaka ete azali mpenza ekelamu moko oyo atindaka bato básala makambo ya mabe, to mpo na yo Zabolo elimboli kaka makambo ya mabe? Tosengeli nde kobangaka Zabolo, to kokanisa ete ezali se makanisi mpamba oyo euti na biyambayamba ya bato to mpe kotalela ye lokola moto moko ya lisapo? Liloba “zabolo” elakisi nde nguya moko boye oyo ekoki kosala bato mabe? Liloba yango emonisaka kaka bizaleli mabe oyo bato bazalaka na yango, ndenge basango mpe bapastɛrɛ mingi bateyaka yango lelo oyo?

Tokoki kokamwa te ete bato bazali na makanisi ndenge na ndenge mpo na kolimbola soki Zabolo azali nani. Kanisá mokakatano oyo tokoki kozala na yango mpo na koyeba malamumalamu moto moko oyo azali elombe mpo na komibomba! Mingimingi soki aboyi mpenza bato báyeba soki azali nani. Biblia emonisi ete Zabolo azali moto ya ndenge wana. Biblia ebengi ye mpe Satana mpe elobi boye: “Satana ye moko azali kokoba komibimisa lokola anzelu moko ya pole.” (2 Bakolinti 11:14) Atako azali moto mabe, Zabolo amibimisaka lokola moto malamu mpo na kokosa bato. Mpe soki alongi kondimisa bato ete azalaka te, yango ekokisaka mokano na ye.

Na bongo, Zabolo azali mpenza nani? Abandaki ntango nini mpe ndenge nini? Ndenge nini azali kotambwisa bato lelo oyo? Tokoki kosala nini mpo atambwisa biso te? Biblia eyebisi lisolo mobimba ya Zabolo, banda ebandeli na ye mpe epesi biyano ya solo na mituna yango.

[Elilingi na lokasa 3]

Ezali pɛtɛɛ te koyeba moto moko oyo aboyi mpenza bato báyeba soki azali nani!