Mituna ya batángi

Ntoma Paulo alingaki koloba nini ntango akomaki ete basi basengeli “kofanda nyɛɛ na kati ya masangá”?

Paulo akomelaki baklisto ya lisangá ya kolinti ete: “Lokola na masangá nyonso ya basantu, tiká basi báfanda nyɛɛ na kati ya masangá, mpo bapesi bango nzela ya koloba te.” (1 Bakolinti 14:33, 34) Mpo tósimba maloba wana ya Paulo malamumalamu, tótalela mokapo ya 14 mobimba.

Na 1 Bakolinti mokapo ya 14, Paulo alobelaki makambo etali makita ya lisangá ya boklisto. Amonisaki makambo oyo tosengeli kolobelaka na makita yango mpe apesaki toli ndenge makita yango esengeli kotambwisama. (1 Bakolinti 14:1-6, 26-34) Lisusu, amonisaki ntina ya makita ya boklisto, elingi koloba “mpo lisangá etongama.”​—1 Bakolinti 14:4, 5, 12, 26.

Toli ya Paulo oyo ete, “báfanda nyɛɛ” ezali komonana mbala misato na 1 Bakolinti mokapo ya 14. Na esika yango moko moko, toli epesameli na bituluku ekeseni ya bato na kati ya lisangá, kasi na bisika yango nyonso, alobi yango mpo na ntina moko ete “makambo nyonso esalema na ndenge ya lokumu mpe na molɔngɔ.”​—1 Bakolinti 14:40.

Ya liboso, Paulo alobaki boye: “Soki moto moko azali koloba na monɔkɔ moko boye, tiká yango esuka na bato mibale to misato kaka, mpe moto na moto na ngala na ye; mpe moto moko abongola yango. Kasi soki mobongoli azali te, tiká ete moto wana afanda nyɛɛ na kati ya lisangá mpe aloba epai na ye moko mpe epai ya Nzambe.” (1 Bakolinti 14:27, 28) Yango emonisi te ete moto yango asengelaki te koloba na makita, kasi ezalaki nde na bantango mosusu oyo asengelaki kofanda nyɛɛ. Kutu, mokano ya makita oyo ezali ya kolendisana, ekokaki kokokisama te soki moto yango alobaka na monɔkɔ oyo moto ata moko te akokaki koyoka.

Ya mibale, Paulo akomaki boye: “Tiká ete basakoli mibale to misato báloba, mpe bamosusu básosola ndimbola. Kasi soki emoniseli moko eyei epai ya moto mosusu ntango afandi wana, tiká ete oyo ya liboso afanda nyɛɛ.” Maloba yango ezalaki komonisa te ete bapekisaki moto wana ya liboso kosakola na lisangá, kasi asengelaki nde kofanda nyɛɛ na bantango mosusu. Na nsima, moto oyo azali na emoniseli ya kokamwa akokaki koyebisa yango na lisangá mpe mokano ya makita oyo ezali ete “bato nyonso bálendisama” ekokisama.​—1 Bakolinti 14:26, 29-31.

Ya misato, Paulo ayebisaki kaka basi baklisto boye: “Tiká basi báfanda nyɛɛ na kati ya masangá, mpo bapesi bango nzela ya koloba te, kasi tiká nde bázala na botosi, ndenge Mobeko elobi.” (1 Bakolinti 14:34) Mpo na nini Paulo apesaki basi baklisto toli wana? Mpo makambo esalema na molɔngɔ na lisangá. Alobi boye: “Na yango, soki balingi koyeba likambo moko boye, tiká bátuna yango epai ya mibali na bango moko na ndako, mpo ezali nsɔni mpo na mwasi koloba na kati ya lisangá.”​—1 Bakolinti 14:35.

Ekoki kozala ete bandeko basi mosusu bazalaki kotya ntembe makasi na makambo oyo ezalaki kolobama na kati ya lisangá. Toli ya Paulo esalisaki bandeko basi báboya elimo wana ya mobulu mpe bándima na komikitisa nyonso etɛlɛmɛlo na bango na kati ya ebongiseli ya Yehova oyo etali bokonzi, mingimingi mpo na oyo etali mibali na bango. (1 Bakolinti 11:3) Lisusu, ntango bandeko basi bazalaki kofanda nyɛɛ bazalaki komonisa ete bazali na mposa te ya kokóma bateyi na kati ya lisangá. Ntango Paulo akomelaki Timote, amonisaki ete ezali malamu te mwasi ateya na kati ya lisangá: “Nazali te kopesa mwasi nzela ya koteya, to ya kozala na bokonzi likoló ya mobali, kasi nde ya kofanda kimya.”​—1 Timote 2:12.

Yango emonisi nde ete mwasi moklisto asengeli ata moke te koloba na makita ya boklisto? Te. Na mikolo ya Paulo, ekoki kozala ete elimo santu ezalaki kotinda basi baklisto na mabaku mosusu bábondela to básakola na kati ya lisangá. Na mabaku wana, mpo na komonisa ete bazalaki koyeba esika na bango, bazalaki kozipa motó.a (1 Bakolinti 11:5) Lisusu, ezala na mikolo na Paulo to mpe oyo ya biso, bandeko basi mpe bandeko mibali balendisami na koyambola elikya na bango. (Baebele 10:23-25) Longola koyambola elikya na bango na mosala ya kosakola, bandeko basi bayambolaka mpe elikya na bango mpe balendisaka basusu na makita ntango bapesaka biyano oyo ebongisami malamu soki baponi bango, mpe ntango bandimaka kosala bilakiseli na likita ya mosala to masolo na Eteyelo ya mosala ya Teokrasi.

Na yango, basi baklisto ‘bafandaka nyɛɛ’ mpo básala te makambo oyo ezali mpo na ndeko mobali mpe báteya lisangá te. Batyanaka ntembe te na bandeko mibali oyo bazali na mokumba ya koteya na lisangá. Soki bazali kokokisa mokumba na bango na kati ya lisangá, basi baklisto bakosala ete kimya ezala mpe “makambo nyonso [na makita ya lisangá] esalema mpo na kotonga.”​—1 Bakolinti 14:26, 33.

[Maloba na nse ya lokasa]