Losambo ya malamu mpo na yo
MOKOMI ya nzembo Asafa alobaki boye: “Ezali malamu ete nabɛlɛma na Nzambe.” Asafa alingaki kolanda bato oyo bakipaka Nzambe te mpo na koluka bomɛngo. Kasi, na nsima akanisaki matomba ya kozala moninga ya Nzambe mpe amonaki ete yango nde ezali malamu mpo na ye. (Nzembo 73:2, 3, 12, 28) Losambo ya solo ezali malamu mpo na yo? Ezali na litomba nini?
Kosambela Nzambe ya solo ekosalisa yo otika kolukaka kaka matomba na yo moko. Na ndenge oyo “Nzambe ya bolingo” asalá biso, bato oyo balukaka kaka matomba na bango moko bakoki kozala na esengo ata mokolo moko te. (2 Bakolinti 13:11) Yesu ateyaki likambo moko ya ntina mingi ntango alobaki boye: “Esengo ya kopesa eleki oyo ya kozwa.” (Misala 20:35) Yango wana tozalaka na esengo ya kosalela baninga to bandeko na biso. Kasi, kosalela Nzambe nde ezali esengo oyo eleki nyonso. Ezali na moto mosusu te oyo abongi tólinga ye koleka Nzambe. Bamilio ya bato ya ndenge nyonso bamoni ete kosambela Nzambe mpe kosala oyo azali kosɛnga ezali bomoi ya esengo mpenza.—1 Yoane 5:3.
Mokano na yo na bomoi
Losambo ya solo ezali mpe malamu mpo na yo mpamba te ekosalisa yo ozala na mokano na bomoi. Omoni te ete mbala mingi moto azalaka na esengo soki ayebi ete azali kosala likambo moko ya malonga? Bato mingi bazalaka na mikano na bomoi na bango, ezala na likambo etali libota, baninga, mosala, to komisepelisa. Lokola toyebaka te oyo ekoya lobi, mbala mingi mikano nyonso wana epesaka moto esengo te. (Mosakoli 9:11) Kasi, losambo ya solo ekosalisa yo ozala na mokano moko ya malamu koleka, oyo ekokoba kopesa yo esengo ata soki makambo mosusu ezali kotambola malamu te.
Losambo ya solo esɛngaka koyeba Yehova mpe kosalela ye na motema moko. Baoyo bazali kolanda losambo ya solo bapusanaka mpenza penepene na Nzambe. (Mosakoli 12:13; Yoane 4:23; Yakobo 4:8) Okoki koloba ete ezali mpasi koyeba Nzambe tii akóma moninga na yo. Kasi, soki otángi masolo ya makambo oyo asalelá bato mpe soki otali biloko oyo akelá, okozanga te komona bizaleli na ye. (Baloma 1:20) Longolá yango, soki ozali kotánga Liloba ya Nzambe, okoki koyeba ntina oyo tozali awa na mabelé, ntina oyo Nzambe atiki tómonaka mpasi, ndenge oyo akosilisa bampasi mpe, oyo mbala mosusu eleki nyonso, ndenge oyo okoki kopesa mabɔkɔ na kokokisama ya mokano ya Nzambe. (Yisaya 43:10; 1 Bakolinti 3:9) Koyeba makambo wana ekoki mpenza kobongola lolenge na yo ya kotalela bomoi!
Ndenge ya kokóma moto malamu
Losambo ya solo ezali malamu mpo na yo mpamba te ekosalisa yo okóma moto malamu. Soki ozali kosalela Nzambe na ndenge ya solo, okokóma na bizaleli oyo ekosalisa yo oyokanaka malamu na basusu. Okoyekola epai ya Nzambe mpe Mwana na ye kosala makambo na bosembo, koloba na boboto mpe kopesa nzoto na yo kilo. (Baefese 4:20–5:5) Soki oyebi Nzambe malamu mpenza mpe okómi kolinga ye, okoluka komekola ye. Biblia elobi boye: “Bókóma bamekoli ya Nzambe, lokola bana balingami, mpe bókoba kotambola na kati ya bolingo.”—Baefese 5:1, 2.
Ezali esengo te kozala esika moko na bato oyo bazali komekola bolingo ya Nzambe? Likambo ya esengo, okoki kosambela Nzambe ya solo kaka yo moko te. Losambo ya solo ekosangisa yo ná bato mosusu oyo balingaka oyo ezali sembo mpe malamu. Kasi, ntango mosusu okosepela te na likanisi ya kozala na lingomba moko boye. Kasi, ndenge tomonaki na lisolo ya liboso, mabe ya mangomba ezali te mpo basangani esika moko, kasi ezali mpo mangomba yango ezali kotambwisama na ndenge oyo ebongi te mpe na mikano ya malamu te. Mangomba mingi ezali kolanda mikano ya mabe. Kasi, basaleli ya Nzambe batambwisami na Yehova ye moko, na mokano ya malamu mpenza. Biblia elobi ete: “Nzambe azali Nzambe, ya mobulu te, kasi ya kimya.” (1 Bakolinti 14:33) Lokola bamilio ya bato mosusu, yo mpe okoki komona ete kozala na lisangá ya boklisto, oyo ezali kotambola na molɔngɔ mpenza, ekobongola mpenza lolenge na yo ya kotalela bomoi.
Elikya oyo okoki kozala na yango
Makomami mosantu ezali komonisa ete Nzambe azali koyanganisa basambeli ya solo mpo bábika na nsuka ya mokili oyo mpe básangola mabelé ya sika epai “boyengebene ekofanda.” (2 Petelo 3:13; Emoniseli 7:9-17) Na yango, losambo ya malamu mpo na yo ezali oyo ekopesa yo elikya, eloko oyo osengeli kozala na yango mpo na kozala na esengo. Bato mosusu balikyaka ete bakozala na esengo soki mboka na bango ezwi guvɛrnema ya malamu, soki bazwi misala ya malamu to soki bakómi nzoto kolɔngɔnɔ to soki bazwi mbongo ya malonga na nsuka ya mosala na bango. Kasi, mingi te kati na makambo wana ekoki kopesa moto elikya ya solosolo ya kozala na esengo. Nzokande, ntoma Paulo akomaki boye: “Totye elikya na biso epai ya Nzambe moko ya bomoi.”—1 Timote 4:10.
Soki oluki malamu mpenza, okoyeba soki banani basambelaka Nzambe ya solo. Na mokili ya lelo, oyo ekabwani, bolingo mpe bomoko ya Batatoli ya Yehova ezali kokesenisa bango mpenza na bato mosusu nyonso. Bauti na bikólo mingi mpe bazali bato ya lolenge nyonso; kasi, lokola balinganaka bango na bango mpe balingaka Nzambe, bazali mpenza na bomoko. (Yoane 13:35) Bazali kobenga yo oya komona na miso esengo oyo bango bazali na yango. Asafa akomaki boye: “Ezali malamu ete nabɛlɛma na Nzambe.”—Nzembo 73:28.
[Elilingi na lokasa 7]
Okoki kokóma moninga ya Nzambe