Ntembe oyo etaleli mpe yo

OZALI na moninga to ndeko moko oyo olingaka mingi? Okanisi boni soki moto moko alobi ete osepelaka na moninga to ndeko yango kaka mpo na bolamu oyo ozwaka epai na ye? Na ntembe te okoyoka mpasi na motema, ntango mosusu mpe okosilika. Yebá ete Satana Zabolo alobaki likambo moko ya ndenge wana mpo na bikelamu nyonso oyo balingaka Yehova Nzambe.

Kanisá likambo oyo elekaki ntango Satana akosaki Adama ná Eva, mobali ná mwasi ya liboso, mpo bábuka mobeko ya Nzambe mpe bálanda nzela na ye ya botomboki. Lokola Adama ná Eva balandaki nzela ya Satana, yango emonisaki nde ete moto akotikala sembo epai ya Yehova kaka soki azali kozwa bolamu? (Genese 3:1-6) Mbula soki 2 500 nsima ya botomboki ya Adama, Satana abimisaki lisusu ntembe yango; na mbala wana ezalaki mpo na mobali moko nkombo na ye Yobo. Lokola likambo oyo Satana alobaki mpo na Yobo emonisi ntembe yango polele, tótalela malamumalamu lisolo yango.

“Nakomilongwela sembo na ngai te”

Yobo azalaki ‘moto malamu bɛ mpe ya sembo, oyo azalaki kotosa Nzambe mpe aboyaki mabe.’ Kasi, Satana alobaki ete soki Yobo azali sembo, ezali mpamba te. Atunaki Yehova boye: “Yobo akotosaka Nzambe bobele mpamba?” Na nsima, Zabolo alobaki ete Yehova azalaki kobatela Yobo mpe kopambola ye, yango wana Yobo azalaki sembo. Abakisaki boye: “Tiká ete osembola lobɔkɔ na yo sasaipi mpe omama nyonso ezali na ye mpe akolakela yo mabe na miso na yo.”​—Yobo 1:8-11.

Mpo na kosilisa ntembe yango, Yehova atikaki Satana ameka Yobo. Zabolo abimiselaki mobali yango ya sembo bampasi ndenge na ndenge kaka mpo atika kosalela Nzambe. Bibwele ya Yobo ezikaki, misusu eyibamaki, babomaki baombo na ye, mpe bana na ye nyonso bakufaki. (Yobo 1:12-19) Satana alongaki nde kokweisa Yobo? Te! Atako Yobo ayebaki te ete Satana nde azalaki komeka ye, alobaki boye: “[Yehova] apesaki, [Yehova] asili kolongola. Nkombo ya [Yehova] esanzolama.”​—Yobo 1:21.

Satana azongaki lisusu liboso ya Yehova, mpe Yehova alobaki na ye boye: ‘[Yobo] azali kokanga boyengebene na ye makasi ata opesi ngai simbisi ete nabebisa ye na ntina te.’ (Yobo 2:1-3) Satana abɛtelaki mpenzampenza nde bosembo ya Yobo ntembe​—ezaleli oyo esɛngaka kokangama na Nzambe mpe kolanda ntango nyonso nzela ya boyengebene. Liboso ya makambo nyonso wana oyo Satana abimiselaki ye, Yobo atikalaki kaka sembo. Kasi, Zabolo atikaki ye naino te.

Na nsima, Satana abakisaki likambo mosusu na ntembe na ye, oyo etaleli sikoyo bato nyonso. Alobaki na Yehova boye: “Loposo mpo na loposo! Moto akopesa nyonso ezali na ye mpo na bomoi na ye. Osembola lobɔkɔ na yo sasaipi mpe omama mikuwa na ye mpe mosuni na ye mpe akolakela yo mabe na miso na yo.” (Yobo 2:4, 5) Lokola Zabolo asalelaki liloba “moto” na esika atánga nkombo ya Yobo, yango emonisi ete abɛtelaki bosembo ya bato nyonso ntembe. Na maloba mosusu, Satana alobaki boye: ‘Moto akosala nyonso mpo na kobikisa bomoi na ye. Soki otikeli ngai nzela, nakosala ete bato nyonso bápesa Nzambe mokɔngɔ.’ Satana alobaki solo ete moto moko te akotikala sembo epai ya Nzambe?

Yehova atikelaki Zabolo nzela apesa Yobo maladi moko ya mabe. Yobo anyokwamaki mingi na boye ete, asɛngaki liwa. (Yobo 2:7; 14:13) Atako bongo, Yobo alobaki boye: “Kino nakokufa, nakomilongwela sembo na ngai te.” (Yobo 27:5) Yobo alobaki bongo mpamba te alingaki Nzambe mingi, mpe eloko moko te ekokaki kosilisa bolingo yango. Yobo amonisaki ete azali moto ya sembo. Biblia elobi boye: “[Yehova] apambolaki mikolo ya nsuka ya Yobo koleka yango ya ebandeli.” (Yobo 42:10-17) Ezali na bato mosusu oyo basalaki lokola Yobo? Bambula nyonso oyo eleki emonisi nini?

Ndenge oyo ntembe yango esukaki

Na mokanda ya Baebele mokapo 11, ntoma Paulo atángi bankombo ya basi mpe mibali ya sembo oyo bazalaki na bomoi liboso Yesu aya awa na mabelé, na ndakisa Noa, Abalayama, Sala, mpe Moize. Na nsima, alobi boye: “Ntango ekozanga ngai soki nakobi mpo na kolobela [basusu].” (Baebele 11:32) Basaleli ya Nzambe oyo batikalaki sembo bazali ebele mpenza, yango wana Paulo abengaki bango ‘lipata monene ya batatoli.’ (Baebele 12:1) Ya solo, banda kalakala, ebele ya bato baponaki kotosa Yehova Nzambe.​—Yosua 24:15.

Yesu Klisto, Mwana ya Nzambe nde asukisaki mpenza ntembe oyo Satana abimisaki ete akoki kosala ete bato nyonso bápesa Nzambe mokɔngɔ. Eloko moko te ebebisaki bosembo ya Yesu epai ya Nzambe, ata mpasi makasi ya liwa. Liboso akata motema, Yesu agangaki boye: “Tata, na mabɔkɔ na yo natiki elimo na ngai.”​—Luka 23:46.

Ntango nyonso oyo eleki emonisi ete Zabolo alongi te komema bato nyonso na kotika kosalela Nzambe ya solo. Ebele ya bato bazwi boyebi ya Yehova mpe ‘bazali kolinga ye na motema na bango mobimba, na molimo na bango mobimba, mpe na makanisi na bango nyonso.’ (Matai 22:37) Bosembo na bango epai ya Yehova emonisi ete Satana akosaki ntango alobaki ete moto moko te akotikala sembo epai ya Nzambe. Soki otikali sembo, yo mpe okomonisa ete Zabolo akosaki.

Osengeli kosala nini?

Nzambe azali na mokano ete “bato ya ndenge nyonso bábika mpe bákóma na boyebi ya sikisiki ya solo.” (1 Timote 2:4) Ndenge nini okoki kozwa boyebi yango? Bongisá ntango mpo na koyekolaka Biblia mpo ‘oyeba Nzambe kaka moko ya solosolo, mpe moto oyo atindaki, Yesu Klisto.’​—Yoane 17:3.

Satana abɛtelaki bosembo ya bato ntembe ntango alobaki ete basalelaka Nzambe mpo bazali kozwa bolamu. Makambo oyo oyekoli esengeli kosimba motema na yo mpo etinda yo osalela Nzambe na bosembo. Mpo na yango, osengeli kosuka kaka te na koluka koyeba makambo oyo Biblia elobi. Osengeli komanyolaka likoló ya makambo oyo ozali koyekola. (Nzembo 143:5) Ntango ozali kotánga Biblia to mokanda moko oyo elimbolaka Biblia, osengeli kozwaka ntango ya komituna mituna lokola oyo: ‘Makambo yango ezali koteya ngai nini mpo na Yehova? Bizaleli nini ya Nzambe ezali komonana awa? Na makambo nini ya bomoi na ngai nasengeli komonisa bizaleli yango? Makambo nini Nzambe alingaka to aboyaka? Makambo yango ezali kobakisa nini na ndenge oyo natalelaka Nzambe?’ Komanyola ndenge wana ekosalisa yo olinga lisusu mingi Mozalisi na yo mpe ozala na botɔndi epai na ye.

Kozala sembo epai ya Nzambe esuki kaka na mateya to na bindimeli te. (1 Mikonzi 9:4) Kotikala sembo epai ya Yehova Nzambe esɛngaka kozala na etamboli ya malamu na makambo nyonso ya bomoi. Kozala sembo epai ya Nzambe elingi koloba te ete okozanga makambo mosusu ya malamu na bomoi na yo. Yehova azali “Nzambe ya esengo,” mpe alingi ete ozala na bomoi ya esengo. (1 Timote 1:11) Sikoyo, tótalela mwa misala oyo osengeli koboya mpo na kozala na etamboli ya pɛto, mpe na ndenge yango, Nzambe andima yo mpe ozala na bomoi ya esengo.

Kimá pite mpe ekobo

Yehova ye moko apesi mibeko mpo na libala na Liloba na ye, Biblia, oyo elobi ete: “Moto akotika tata na ye mpe mama na ye mpe akosangana na mwasi na ye, mpe bango bakozala mosuni moko.” (Genese 2:21-24) Lokola bato oyo babalani bakómi “mosuni moko,” moto na moto akokumisa libala, oyo ezali ebongiseli ya Nzambe, soki azali kosangisa nzoto kaka na molongani na ye. Ntoma Paulo alobaki boye: “Tiká libala ekumisama na kati ya bato nyonso, mpe mbeto ya libala ezala na mbindo te, mpo Nzambe akosambisa bato ya pite mpe bato ya ekobo.” (Baebele 13:4) Maloba “mbeto ya libala” elimboli kosangisa nzoto ya mwasi ná mobali oyo babalani liboso ya Leta. Soki moko na bango asangisi nzoto ná moto mosusu, asali ekobo mpe Nzambe akopesa ye etumbu.​—Malaki 3:5.

Mobeko ya Nzambe elobi nini mpo na pite, elingi koloba kosangisa nzoto liboso ya kobala? Yango mpe ezali kobuka mobeko ya Yehova. Biblia elobi boye: “Talá eloko oyo Nzambe alingi . . . ete bóboya pite.” (1 Batesaloniki 4:3) Kosangisa nzoto mibali na mibali to basi na basi, kosangisa nzoto na ndeko ya libota, to kosangisa nzoto na nyama ezali mpe masumu na miso ya Nzambe. (Levitike 18:6, 23; Baloma 1:26, 27) Moto nyonso oyo alingi kosepelisa Nzambe mpe kozala na esengo ya solosolo asengeli koboya pite mpe ekobo.

Ezali boni mpo na moto oyo azali kolamusa bamposa ya nzoto, nzokande abali naino te? Yango mpe esepelisaka Yehova te. (Bagalatia 5:19) Esengeli mpe koboya kokanisaka makambo ya mbindo. Yesu alobaki boye: “Moto nyonso oyo azali kokoba kotala mwasi tii na koyoka ye mposa asili kosala ekobo elongo na ye na kati ya motema na ye.” (Matai 5:28) Maloba yango etaleli mpe kotala bolumbu ya bato na mikanda, na televizyo, to na Internet; to kotánga mikanda oyo ezali na masolo ya kosangisa nzoto; mpe koyoka miziki oyo elendisaka makambo ya nsɔni. Moto oyo azali koboya makambo nyonso wana asepelisaka Nzambe mpe azalaka na bomoi ya esengo.

Likambo mosusu ya mabe ezali kozala selesele na moto oyo azali molongani na yo te. Soki moto moko oyo abalá azali selesele na moto oyo azali molongani na ye te, azali kobuka mitinda ya Biblia mpe yango ezali komonisa ete azangi botosi epai ya Yehova. (Baefese 5:28-33) Ezali mpe mabe soki moto oyo abalá te azali koloba na moto mosusu maloba ya bolingo kaka mpo na kosakana. Ekozala boni soki moto oyo ozali kosalela bajɛstɛ ya bolingo aloni makanisi na motema na ye ete ozali kosepela na ye mpo bóbalana? Kanisá mpasi oyo yango ekoki kosala ye na motema. Longola yango, kozala selesele na moto oyo azali molongani na yo te ekoki komema na pite to na ekobo. Nzokande, soki moto azali komitambwisa malamu liboso ya moto oyo azali molongani na ye te, akopesa nzoto na ye kilo.​—1 Timote 5:1, 2.

Makambo mosusu oyo esepelisaka Nzambe

Lelo oyo, na mikili mingi, masanga etɛkamaka bipai nyonso. Komɛla masanga ezali mabe? Biblia epekisi te komɛla mwa vinyo, biɛrɛ, to masanga mosusu. (Nzembo 104:15; 1 Timote 5:23) Kasi, komɛla mingi to kolangwa ezali mabe na miso ya Nzambe. (1 Bakolinti 5:11-13) Na ntembe te, okosepela te soki komɛla masanga mingi epesi yo maladi to mpe epanzi libota na yo.​—Masese 23:20, 21, 29-35.

Yehova azali “Nzambe ya solo.” (Nzembo 31:5, NW) Biblia elobi ete “ekoki kosalema te ete Nzambe akosa.” (Baebele 6:18) Soki olingi ete Nzambe asepela na yo, osengeli koboya kolobaka lokuta. (Masese 6:16-19; Bakolose 3:9, 10) Biblia epesi baklisto toli oyo: “Bólobanaka solo mokomoko na bino elongo na mozalani na ye.”​—Baefese 4:25.

Likambo mosusu ya mabe ezali kobɛta masano ya mbongo. Atako bato mingi basalaka yango, kobɛta masano ya mbongo ezali lokoso, mpamba te esɛngaka kolonga bato mosusu mpo na kozwa mbongo na bango. Yehova asepelaka te na bato oyo bazali na “lokoso ya litomba ezangi sembo.” (1 Timote 3:8) Yango wana, soki olingi kosepelisa Yehova, osengeli koboya masano nyonso ya mbongo, ata mpe mondenge na lisano ya mbangu ya bampunda. Soki otiki kobɛta masano yango, okoki kozala na mbongo na mabɔkɔ mpo na kokokisa bamposa ya libota na yo.

Koyiba, elingi koloba kozwa eloko oyo ezali ya yo te, ezali mpe lolenge mosusu ya lokoso. Biblia elobi ete: “Okoyiba te.” (Exode 20:15) Ezali mabe kosomba eloko oyo oyebi malamu ete ezali ya moyibi to mpe kozwa eloko ya moto kozanga ndingisa na ye. Biblia elobi boye: “Tiká moyibi ayiba lisusu te, kasi tiká nde asala mosala makasi, kosaláká na mabɔkɔ na ye oyo ezali mosala ya malamu, mpo azala na eloko ya kokabela moto oyo azali kokelela.” (Baefese 4:28) Bato oyo balingaka Yehova bayibaka ngonga ya mosala te, kasi basalaka na bosembo. Bazalaka na “mposa ya komitambwisa na bosembo na makambo nyonso.” (Baebele 13:18) Lisusu, moto oyo azali na lisosoli ya malamu azalaka na kimya ya makanisi.

Ndenge nini Nzambe atalelaka moto oyo azalaka kandakanda? Biblia elobi boye: “Zalá moninga ya moto ya nkanda te; tambolá elongo na moto ya nkanda monene mpe te.” (Masese 22:24) Mbala mingi, soki moto ayebi kopekisa nkanda na ye te, etindaka ye na kosala makambo ya mobulu. (Genese 4:5-8) Na oyo etali koluka kozongisa mabe na mabe, Biblia elobi boye: “Bózongisa mabe na mabe na moto te. Bókanisaka nde kozongisa makambo ya malamu mingi na miso ya bato nyonso. Soki likoki ezali, na meko oyo yango etaleli bino, bózala na kimya elongo na bato nyonso. Bózongisa bino moko te mabe na oyo asali bino mabe, balingami, kasi bótikela nde nkanda esika; mpo ekomamá ete: ‘Kozongisa mabe ezali likambo na ngai; ngai nakozongisa, Yehova alobi bongo.’” (Baloma 12:17-19) Soki tolandi toli yango, bomoi na biso ekozala na kimya mingi mpe yango ekobakisa esengo na biso.

Okoki kolonga

Okoki kolonga kotikala sembo epai ya Nzambe ata soki bazali kopusa yo na makasi osala makambo ya mabe? Ɛɛ. Yebá ete Nzambe alingi olonga komonisa ete Satana abukaki lokuta ntango alobaki ete bato basalelaka Nzambe mpo na bolamu oyo apesaka bango, mpamba te Liloba na Ye elobi boye: “Mwana na ngai, zalá na mayele mpe sepelisá motema na ngai, ete nazongisela ye monɔkɔ oyo akopamela ngai.”​—Masese 27:11.

Okoki kobondela Nzambe apesa yo makasi ya kosala oyo ezali malamu na miso na ye. (Bafilipi 4:6, 7, 13) Mpo na yango, zalá na ekateli makasi ya kokóma na boyebi mingi ya Biblia, Liloba ya Nzambe. Soki ozali komanyola makambo oyo ozali koyekola mpe ozali na botɔndi mpo na yango, okolinga Nzambe mingi mpe yango ekopusa yo osepelisa ye. Na mokanda ya 1 Yoane 5:3, Biblia elobi boye: “Bolingo ya Nzambe elakisi boye, ete tótosaka bakomandema na ye; kutu bakomandema na ye ezali kilo te.” Batatoli ya Yehova ya mboka na bino bakosepela kosalisa yo oyekola Biblia. Tolendisi yo okutana na bango to otinda mokanda epai ya babimisi ya zulunalo oyo.

[Elilingi na lokasa 4]

Yobo atikalaki sembo ntango amekamaki

[Elilingi na lokasa 7]

Kokolisa boyebi na yo ya Liloba ya Nzambe ekolendisa ekateli na yo ya kosala oyo ezali malamu