Tosengeli kobanga koya ya Klisto?

MALOBA “koya ya Klisto” etindaka yo okanisa nini? Okanisaka ete ekomemela bato makambo ya mabe, mpasi mpe etumbu to okanisaka ete ekoya kosukisa bampasi nyonso? Tosengeli kobanga koya ya Klisto to tosengeli nde kozela yango na mposa makasi?

Biblia elobi boye mpo na koya ya Klisto: “Talá! Azali koya elongo na mapata, mpe liso nyonso ekomona ye, . . . mpe mabota nyonso ya mabelé bakomibɛta na mpasi mpo na ye.” (Emoniseli 1:7) Yesu akoya mpo na kopesa bato ya sembo mbano mpe bato ya mabe etumbu.

Ntoma Yoane azalaki kobanga koya ya Klisto te; kutu azalaki kozela yango na mposa makasi. Ntango azwaki emonaneli ya koya yango mpe ya makambo oyo ekosala awa na mabelé, abondelaki boye: “Yaká, Nkolo Yesu.” (Emoniseli 22:20) Kasi, mpo na nini ‘mabota nyonso ya mabelé bakomibɛta na mpasi mpo na ye?’ Na ndenge nini “liso nyonso” ekomona ye? Koya ya Klisto ekokokisa makambo nini? Matomba nini tokoki kozwa banda sikoyo soki tozali na elikya na koya ya Klisto? Lisolo elandi ekopesa biyano na mituna yango.