Bilenge bósepelisaka baboti na bino

NTOMA YOANE oyo akómaki mobange akomaki boye: “Nazali na ntina ya botɔndi te koleka makambo oyo, ete nayokaka ete bana na ngai bazali kokoba kotambola na kati ya solo.” (3 Yoane 4) Atako bana oyo Yoane alobeli awa ezali baklisto, moboti oyo abangaka Nzambe akoki mpe koloba ndenge wana. Kaka ndenge baboti balukaka bolamu ya bana na bango, bana mpe basalaka bongo mpo na baboti na bango.

Salomo, Mokonzi ya Yisalaele, ayebaki oyo etamboli ya bana ekoki kosala epai ya baboti na bango. Akomaki boye: “Mwana ya mayele akosepelisa tata, nde mwana ya zoba azali [mawa, NW] epai ya mama na ye.” (Masese 10:1) Yango wana, bana nyonso, ezala baoyo bakoli, basengeli kotalela ndenge etamboli na bango ekoki kosala baboti na bango. Mpo na nini ebongi bongo?

Kanisá naino makambo nyonso oyo baboti na yo oyo babangaka Nzambe basalaki mpo na kobɔkɔla yo! Babandaki komitungisa mpe kobondela mpo na yo banda kala, liboso kutu obotama. Nsima ya kobotama na yo, baboti na yo basepelaki kosala boninga na yo mpe batɔndaki Nzambe mpo na libaku wana kitoko, elingi koloba mokumba ya kozala baboti. Basengelaki kokokisa bamposa na yo nyonso wana ozalaki mwana moke, mpe lokola bazali basambeli ya Yehova, bazalaki kosala yango na motema moko.

Lokola baboti na yo bazali baklisto ya solo, bazalaki kotánga Biblia mpe mikanda oyo elimbolaka yango mpo na kobɔkɔla yo malamu, mpe batunaki baboti oyo bakolisá bana mpo bápesa bango toli. Bakobaki mpe koyebisa Nzambe mikakatano na bango na nzela ya libondeli. (Basambisi 13:8) Ntango ozalaki kokola, baboti na yo bayebaki bizaleli na yo ya malamu, kasi bakangaki miso te na mabunga oyo ozalaki kosala. (Yobo 1:5) Mikakatano mosusu ebakisamaki ntango okómaki elenge. Ntango mosusu, ozalaki kokóma motó makasi mpe baboti na yo bazalaki kobondela, kotánga mpe kokanisa mingi mpo báyeba ndenge nini bakosalisa yo okoba kosambela Tata na yo ya likoló, Yehova.

Baboti na yo bakotika te kotalela yo lokola mwana. Atako osili kokola, bazali kaka komitungisa mpo na kolɔngɔnɔ na yo ya nzoto mpe ya makanisi, mpo na mayoki na yo mpe mpo na boyokani na yo ná Nzambe. Nzokande, ezala ntango ozalaki naino mwana mpe awa osili kokola, bayebi ete ozali na likoki ya kopona lolenge ya bomoi oyo olingi mpe bayebi te soki bomoi na yo ekozala ndenge nini. Nsukansuka, yo moko nde okopona lolenge ya bomoi oyo osepeli na yango.

Na yango, omoni te ete lokola baboti balingaka koyoka ete bana na bango “bazali kokoba kotambola na kati ya solo,” bakoyoka mpasi soki bana na bango baponi nzela mosusu? Ɛɛ, bana oyo basalaka makambo kaka ndenge motó na bango ezali kotinda bango, bapesaka baboti na bango mawa. Salomo akomaki boye: “Mwana ya zoba ayokisaka tata na ye mawa, pe apesaka mama na ye pasi na motema.” (Batoli [Masese] 17:25, Bible na lingala ya lelo oyo) Baboti bayokaka mawa makasi soki mwana aboyi kosambela Nzambe ya solo!

Emonani mpenza polele ete etamboli na bino bilenge ekoki kosepelisa baboti na bino, ata mpe bato mosusu, to kopesa bango mpasi. Etamboli na bino esimbaka mpenza mitema ya baboti na bino. Soki boboyi Nzambe mpe mitinda na ye, baboti na bino bakoyoka mawa makasi. Nzokande, soki botikali sembo mpe botosi Yehova, baboti na bino bakosepela. Bózwa ekateli ya kosepelisa mitema ya baboti na bino! Wana nde likabo eleki motuya oyo okoki kopesa na baoyo bazali kobɔkɔla, kobatela mpe kolinga yo!