Pusaná penepene na Nzambe
Ayebaka mpasi na biso
KOZALA motema mawa elimboli koyeba mpasi ya moto mpe komitya na esika na ye. Ezaleli yango ezali na ntina mingi. Yehova Nzambe azali ndakisa eleki malamu ya motema mawa. Amityaka na esika ya basaleli na ye ntango bazali na mpasi. Ndenge nini toyebi yango? Motema mawa ya Yehova emonanaki polele na maloba mpe misala ya Yesu, ntango azalaki awa na mabelé. (Yoane 5:19) Na ndakisa, tótalela lisolo oyo ezali na Yoane 11:33-35.
Ntango Lazalo, moninga ya Yesu akufaki, Yesu akendaki na engumba oyo Lazalo azalaki kofanda. Malia ná Malata, bandeko ya Lazalo, bazalaki na mawa mingi. Yesu alingaki libota yango mingi. (Yoane 11:5) Yesu asalaki nini? Lisolo elobi boye: “Yesu, ntango amonaki [Malia] azali kolela mpe Bayuda oyo bayaki na ye elongo bazali kolela, atungisamaki makasi na elimo mpe abulunganaki; mpe alobaki ete: ‘Bolalisi ye wapi?’ Balobaki na ye ete: ‘Nkolo, yaká komona.’ Yesu alelaki na mai na miso.” (Yoane 11:33-35) Mpo na nini Yesu alelaki? Lazalo, moninga na ye akufaki, kasi Yesu alingaki kosekwisa ye. (Yoane 11:41-44) Ezalaki nde na likambo mosusu oyo esimbaki mayoki ya Yesu?
Tángá lisusu maloba ya bavɛrsɛ oyo ezali likoló. Omoni ete ntango Yesu amonaki Malia mpe bato oyo bazalaki kolela elongo na ye, “atungisamaki makasi” mpe “abulunganaki.” Maloba ya Grɛki oyo basaleli na bavɛrsɛ yango emonisaka mayoki ya makasi mpenza.a Makambo oyo Yesu amonaki esimbaki mpenza motema na ye. Mpisoli oyo atangisaki emonisaki ete ayokaki mawa makasi na motema. Tomoni ete mpasi ya basusu esimbaki mpenza motema ya Yesu. Esilá kokómela yo olela mpo omoni moto mosusu azali kolela?—Baloma 12:15.
Motema mawa ya Yesu esalisi biso tómona ndenge oyo Tata na ye Yehova ayokaka. Tóbosana te ete Yesu amekolaki bizaleli ya Tata na ye na ndenge ya kokoka; yango wana alobaki boye: “Moto oyo amoni ngai amoni mpe Tata.” (Yoane 14:9) Yango wana, ntango tozali kotánga ete “Yesu alelaki na mai na miso,” tosengeli kondima ete Yehova amityaka na esika ya basambeli na ye oyo bazali na mpasi. Kutu, bavɛrsɛ mosusu ya Biblia emonisi mpe likambo yango. (Yisaya 63:9; Zekalia 2:8) Yehova azali mpenza Nzambe ya motema mawa!
Moto nyonso asepelaka na bato ya motema mawa. Ntango tolɛmbi nzoto to tozali konyokwama na makanisi, tolingaka kozala pembeni ya moto oyo akoki koyeba mpasi na biso mpe komitya na esika na biso. Tosengeli mpenza kopusana penepene na Yehova, Nzambe ya motema mawa oyo amityaka na esika na biso ntango tozali na mpasi mpe ayebaka kolela na biso!—Nzembo 56:8.
[Maloba na nse ya lokasa]
a Liloba ya Grɛki oyo ebongolami ete “alelaki na mai na miso” mbala mingi elimbolaka “kolela na nse ya motema,” nzokande liloba oyo esalelami mpo na kolobela kolela ya Malia mpe ya bato mosusu ekoki kolimbola “kolela na mongongo makasi to koganga.”