Mpisoli na kati ya molangi ya mposo ya nyama

ELENGE mobali yango azalaki kokimakima na esobe. Lokola mpasi elekelaki ye, mai ya miso etondaki ye na elongi mpe abondelaki Yehova, Nzambe na ye, amonisela ye boboto mpe motema mawa. Alobaki boye: ‘Tyá mpisoli na ngai kati na molangi na yo [ya mposo ya nyama, NW].’ (Nzembo 56:8) Elenge mobali yango ezali Davidi, oyo na nsima akómaki mokonzi na Yisalaele. Kasi molangi ya mposo ya nyama oyo Davidi alobelaki ezali nini, mpe ndenge nini Nzambe akoki kotya mpisoli na biso na kati na yango?

Davidi ayebaki molangi ya mposo ya nyama malamu mpenza. Bazalaki kosalela yango mpo na kotya mai, mafuta, vinyo to mpe manteka. Tii lelo, bato oyo batambolatambolaka na esobe ya Sahara, lokola Ba-Touareg, basalelaka milangi yango, oyo esalemi na mposo ya ntaba to ya mɛmɛ. Milangi yango ekokaki kokɔtisa ebele ya mai, na kotalela bonene ya nyama. Milangi ya mposo ya nyama ekendá nsango ete ebombaka malili ya mai, ata na molunge makasi ya esobe. Na ntango ya kala, bazalaki mbala mingi komema yango likoló ya banyama lokola mpunda to kamela. Lelo oyo, okoki komona batye milangi yango liboso ya motuka.

Maloba wana oyo Davidi alobaki mpo na molangi ya mposo ya nyama ekoki mpe kozala na ntina mpo na biso. Ndenge nini? Biblia elobi ete na mikolo na biso Satana nde azali mokonzi ya mokili oyo, mpe azali na “nkanda makasi.” Yango wana, mabelé mobimba etondi na mpasi. (Emoniseli 12:12) Mpo na ntina yango, ebele ya bato, mingimingi baoyo bazali koluka kosepelisa Nzambe, bazali kotungisama na makanisi mpe na nzoto lokola Davidi. Ezali mpe bongo mpo na yo? Na mpiko nyonso, ata bazali “kolela,” basaleli wana ya Nzambe ya sembo batikaka soki moke te kozala sembo. (Nzembo 126:6) Bakoki mpenza kozala na elikya ete Tata na bango ya likoló amonaka kaka te minyoko oyo bazali kokutana na yango, kasi mpe mpasi oyo yango ezali kobimisela bango. Ayebaka mpenza mpasi ya basaleli na ye mpe abosanaka te mpisoli mpe mpasi na bango; mpe na ndenge ya elilingi, abombaka yango na kati ya molangi na ye ya mposo ya nyama.