Mituna ya batángi
Soki Adama azalaki moto ya kokoka, ebandaki boni asala lisumu?
Adama akokaki kosala lisumu mpo Nzambe akelaki ye na bonsomi ya kopona. Kozala moto ya kokoka ezali na bombanda te ná bonsomi ya kopona. Mpo na koloba solo, kaka Nzambe nde akoká na makambo nyonso. (Deteronome 32:3, 4; Nzembo 18:30; Malako 10:18) Nzokande, kokoka ya bato to ya biloko ezalaka kaka na ndelo. Na ndakisa, mbeli ekoki kokata mosuni malamu, kasi okoki mpe komɛla na yango supu? Eloko ezalaka ya kokoka kaka soki ezali kosala malamu mosala na yango.
Kasi, mpo na nini Nzambe akelaki Adama? Mokano ya Nzambe ezalaki ya kobimisa, na nzela ya Adama, bikelamu mosusu ya mayele, oyo bazali na bonsomi ya kopona. Mpo na kokolisa bolingo na bango mpo na Nzambe mpe mpo na banzela na ye, bato basengelaki kotosa mibeko na ye. Bato bakelamaki na botosi te, kasi bango moko nde basengelaki kopona soki bakotosa to te. (Deteronome 10:12, 13; 30:19, 20) Yango wana, soki Adama azangaka likoki ya koboya kotosa, alingaki kozala moto ya kokoka te. Adama asalelaki bonsomi na ye ya kopona ndenge nini? Biblia elobi ete alandaki mwasi na ye oyo abukaki mobeko ya Nzambe, oyo epekisaki bango kolya mbuma ya “nzete ya koyeba malamu mpe mabe.”—Genese 2:16; 3:1-6.
Tokoki nde koloba ete Nzambe akelaki Adama na bolɛmbu moko, oyo esalaki ete azanga likoki ya kozwa bikateli ya malamu to kolonga komekama? Liboso ya botomboki ya Adama, Yehova atalaki biloko nyonso oyo akelaki awa na mabelé, bakisá mpe mwasi ná mobali ya liboso, mpe amonaki ete “ezalaki malamu mingi.” (Genese 1:31) Yango wana, ntango Adama asalaki lisumu, Yehova amonaki te ete akelaki ye na mbeba moko boye, kasi apesaki nde Adama foti. (Genese 3:17-19) Adama atikaki te ete bolingo mpo na Nzambe mpe mpo na mitinda na ye etinda ye atosa Nzambe liboso ya makambo mosusu nyonso.
Tóbosana mpe te ete ntango Yesu azalaki awa na mabelé, azalaki mpe moto ya kokoka ndenge Adama azalaki. Na bokeseni ya bana mosusu ya Adama, mama ya Yesu azwaki zemi na ye na nzela ya elimo santu, yango wana Yesu abotamaki na bolɛmbu moko te oyo ekokaki kopekisa ye kolonga komekama. (Luka 1:30, 31; 2:21; 3:23, 38) Yesu aponaki ye moko kotikala sembo epai ya Tata na ye ata na ntango ya komekama makasi. Lokola Adama asalelaki bonsomi na ye ya kopona ntango aboyaki kotosa mobeko ya Yehova, foti ezalaki ya ye moko.
Kasi, mpo na nini Adama aboyaki kotosa Nzambe? Akanisaki nde ete soki asali bongo akokóma malamu koleka? Te, mpo ntoma Paulo akomaki ete “Adama akosamaki te.” (1 Timote 2:14) Kasi, Adama aponaki kolanda mwasi na ye, oyo alyaki mbuma ya nzete oyo Nzambe apekisaki bango. Alingaki kosepelisa mwasi na ye na esika ya kotosa Mozalisi. Ntango Eva alakisaki ye mbuma yango, Adama asengelaki kokanisa ndenge kozanga botosi ekokaki kobebisa boyokani na ye na Nzambe. Lokola azalaki na bolingo mozindo te mpo na Nzambe, Adama akokaki kolonga komekama te, ezala oyo eutaki epai ya mwasi na ye.
Adama abotaki nsima ya kosala lisumu, yango wana bana na ye nyonso bazali bato ya kozanga kokoka. Atako bongo, biso mpe tozali na bonsomi ya kopona lokola Adama. Yango wana, tosengeli kokanisaka na mozindo bolamu nyonso oyo Yehova asalelá biso mpe kokolisa bolingo na biso mpo na ye, mpo ebongi mpenza tótosa mpe tósambela ye.—Nzembo 63:6; Matai 22:36, 37.