Mituna ya batángi

Batatoli ya Yehova bakanisaka ete kaka bango nde bakobika?

Batatoli ya Yehova bandimaka ete bazali na lingomba ya solo. Soki ezalaki bongo te, balingaki kotika lingomba yango mpe koluka lingomba mosusu. Lokola bandimi ya mangomba mingi, Batatoli ya Yehova bazalaka na elikya ete bakobika. Kasi, bandimaka mpe ete ezali mokumba na bango te ya kokata nani asengeli kobika. Nzambe nde azali Mosambisi. Ye nde akataka nani akobika.​—Yisaya 33:22.

Liloba ya Nzambe emonisi ete baoyo bakobika basengeli kaka te kolinga kobika kasi mpe kotosa malako ya Mobikisi. Tózwa ndakisa: Moto moko abungi na kati ya zamba. Azali kolukaluka nzela, kasi azali komona yango te. Akobika to akokufa? Yango etaleli ndenge oyo akolanda lisalisi oyo bakopesa ye. Soki azali na lolendo, akoki koboya lisalisi ya mobikisi, elingi koloba moto oyo ayei kosunga ye. Kasi, soki azali na komikitisa, akondima lisalisi yango mpe akobika.

Ndenge moko mpe, bato oyo batosaka malako ya Yehova Nzambe, Mobikisi ya bato, bango nde bakobika. Lobiko ezali likabo ya Nzambe, kasi bato nyonso te nde bakozwa yango. Yesu, Mwana ya Nzambe, alobaki boye: “Ezali te bato nyonso oyo balobaka na ngai, ‘Nkolo, Nkolo,’ nde bakokɔta na bokonzi ya likoló, kasi moto oyo azali kosala mokano ya Tata na ngai oyo azali na likoló.”​—Matai 7:21.

Batatoli ya Yehova bandimaka ete Nzambe akobikisa kaka bato oyo bazali komonisa kondima na mbeka ya lisiko ya Yesu mpe bazali kosalela mateya nyonso ya Yesu. (Misala 4:10-12) Tótalela makambo misato ya ntina mingi oyo Liloba ya Nzambe elobeli, oyo moto asengeli kosala mpo na kobika.

(1) Yesu ayebisaki bayekoli na ye boye: “Na ndenge wana bato nyonso bakoyeba ete bozali bayekoli na ngai, soki bozali na bolingo na kati na bino.” (Yoane 13:35) Ndenge Yesu ye moko apesaki bomoi na ye mpo na basusu ezali komonisa ntina ya bolingo. Bato oyo balingaka basusu bamonisaka ezaleli moko ya ntina mingi mpo na kozwa lobiko.

(2) Na libondeli moko, Yesu alobaki epai ya Tata na ye boye: “Nayebisi bango nkombo na yo.” (Yoane 17:26) Yesu ayebaki ete Tata na ye apesaka motuya mingi na nkombo na ye, Yehova. Yesu abondelaki ete nkombo ya Tata na ye “esantisama.” (Matai 6:9) Kosantisa nkombo ya Nzambe elimboli koyeba yango mpe kotalela yango ete ezali na motuya mpe ezali mosantu. Na ndakisa ya Yesu, baoyo balingi kobika basengeli kosalelaka nkombo ya Nzambe. Basengeli mpe koyebisaka bato mosusu nkombo ya Nzambe mpe bizaleli na ye. (Matai 28:19, 20) Kutu, kaka baoyo babelelaka nkombo ya Nzambe nde bakobika.​—Baloma 10:13.

(3) Yesu ayebisaki Ponsi Pilato boye: “Bokonzi na ngai ezali ya mokili oyo te.” (Yoane 18:36) Lelo oyo, bato mingi te bazali komonisa kondima na Bokonzi ya Nzambe to guvernɛma oyo Yesu akotambwisa. Bazali nde kotya elikya na bango na biyangeli ya bato. Nzokande, baoyo bakobika basengeli komitya na ngámbo ya Bokonzi ya Nzambe mpe koteya bato mosusu ndenge Bokonzi yango ekosikola bato nyonso ya sembo.​—Matai 4:17.

Nsima ya koyoka makambo mosusu oyo moto asengeli kokokisa mpo na kobika, bayekoli ya Yesu balobaki boye: “Nani akoki ntango mosusu kobika?” Yesu apesaki eyano ete: “Makambo oyo ekoki kosalema te epai ya bato ekoki kosalema epai ya Nzambe.” (Luka 18:18-30) Batatoli ya Yehova basalaka makasi bákokisa masɛngami yango mpo na kobika. Basalaka mpe makasi mpo na kosalisa basusu bábika.