Ntina mitano ya kobanga Nzambe kasi bato te

ELENGE moko akamwaki mpe asepelaki makasi. Makambo oyo ayokaki ekamwisaki ye makasi. Lisolo na ye na Batatoli ya Yehova mibale eteyaki ye makambo ya sika. Banda bambula mingi, azalaki komituna ntina oyo Nzambe atiki nzela na bampasi, kasi sikoyo azwaki eyano ya Biblia na motuna yango. Ayebaki te ete Biblia ezali na makambo kitoko ndenge wana mpe ete ekoki kopesa moto esengo.

Ntango Batatoli bakendaki, mwa miniti na nsima, nkolo-ndako oyo azalaki kofutela akɔtelaki ye na ndako mpe atunaki ye na nkanda ete, “Ozalaki kosolola na banani?”

Lokola nsɔmɔ ekangaki ye, elenge yango azangaki likambo ya koloba.

Nkolo-ndako yango agangaki ete, “Nayebi bato wana malamu, soki oyambi bango lisusu, nakobimisa yo awa mpe okokende kofutela epai mosusu!”

Akangaki porte na makasi mpe abimaki.

Bayekoli ya Klisto bayebi ete bakokutana na botɛmɛli

Likambo oyo ekómelaki elenge wana ezali likambo ya sika te. Biblia, Liloba ya Nzambe, elobi boye: “Baoyo nyonso bazali na mposa ya kozala na bomoi na ezaleli ya kokangama na Nzambe na kati ya boyokani elongo na Klisto Yesu bango mpe bakonyokwama.” (2 Timote 3:12) Bato mingi balingaka baklisto ya solo te. Mpo na nini? Ntoma Yoane ayebisaki baninga na ye baklisto ete: “Toyebi ete touti na Nzambe, kasi mokili mobimba ezali kolala na kati ya nguya ya moto mabe.” Biblia elobi mpe ete Satana Zabolo azali lokola ‘nkɔsi oyo ezali konguluma, koluka kolya moto.’ (1 Yoane 5:19; 1 Petelo 5:8) Kobanga bato ezali moko ya mitambo minene oyo Satana asalelaka.

Ata Yesu Klisto oyo asalaki makambo mingi ya malamu mpe asalaki lisumu te, atyolamaki mpe anyokolamaki. Alobaki boye: “Bayinaki ngai kaka mpamba.” (Yoane 15:25) Na butu ya nsuka liboso akufa, ayebisaki bayekoli na ye ete: “Soki mokili eyini bino, boyebi ete eyinaki ngai liboso ya koyina bino. Bóbosana te liloba oyo nalobaki na bino ete, Moombo aleki nkolo na ye te. Soki banyokolaki ngai, bakonyokola mpe bino.”​—Yoane 15:18, 20.

Mpo na maloba wana, bato mingi bakakatanaki kondima losambo ya solo. Na ntina na bato oyo bayaki mpo na kokanga Yesu na libaku moko, Biblia elobi boye: “Moto moko te azalaki koloba polelepolele na ntina etali ye mpo bazalaki kobanga Bayuda.” (Yoane 7:13; 12:42) Bakonzi ya mangomba ya ntango wana bazalaki koloba ete bakobengana na sinagoga moto nyonso oyo akondimela Klisto. Yango wana, kobanga bato epekisaki bato mingi bákóma baklisto.​—Misala 5:13.

Na nsima, ntango lisangá ya boklisto esalemaki, Biblia elobi ete “monyoko moko monene” ebimelaki lisangá oyo ezalaki na Yelusaleme. (Misala 8:1) Na Ampire ya Loma mobimba, baklisto banyokwamaki. Bato minene ya Loma bayebisaki ntoma Paulo ete: “Na oyo etali mwa lingomba wana biso toyebi ete bipai nyonso bato bazali kolobela yango mabe.” (Misala 28:22) Na ntembe te, baklisto ya solo bakutanaki mpenza na botɛmɛli.

Tii lelo, kobanga bato ezali motambo oyo Satana azali kosalela mpo na kokanga bato mpo bákóma te bayekoli ya solo ya Klisto. Bato ya mitema sembo oyo bazali koyekola Biblia na Batatoli ya Yehova bazali kokutana na botɛmɛli to kotyolama na biteyelo, na mosala, na kartye, to epai ya baninga na bango. Bakoki kobanga ete bábungisa lokumu, baninga, to lisungi oyo bazalaki kozwa. Na bisika mosusu, basali-bilanga babangaka ete bato ya mboka bakoki koboya kosalisa bango na kobuka milona na bango to kobatela bibwɛlɛ na bango. Atako bongo, bamilio ya bato bazali kotyela Nzambe motema mpe kotosa Biblia na bomoi na bango, na ndakisa ya Yesu Klisto. Mpo na yango, Yehova azali kopambola bango.

Mpo na nini kobanga Nzambe kasi bato te?

Biblia elendisi biso ete tóbangaka Nzambe, kasi bato te. Elobi boye: “Kobanga [Yehova] ezali ebandeli ya mayele.” (Nzembo 111:10) Kobanga yango elimboli te kozala na nsɔmɔ, kasi ezali nde koboya kosala makambo oyo ekosepelisa te moto oyo apesá biso bomoi. Kobanga Nzambe ezali na boyokani na kolinga ye. Kasi, mpo na nini tosengeli kobanga Nzambe kasi bato te? Tótalela ntina mitano.

1 Yehova azali Mozwi-ya-Nguya-Nyonso. Yehova aleki bato nyonso na nguya. Soki tozali kobanga Nzambe, tokomonisa ete tozali na ngámbo ya Mozwi-ya-Nguya-Nyonso, oyo na miso na ye “mabota bazali lokola litangá moko kati na katini.” (Yisaya 40:15) Lokola Nzambe azali Mozwi-ya-Nguya-Nyonso, azali na nguya ya kobebisa “ebundeli na ebundeli oyo esalami mpo na kotɛmɛla” bato oyo bazali sembo epai na ye. (Yisaya 54:17) Mpe lokola ye nde akokata soki nani abongi kozwa bomoi ya seko, tosengeli kotika ata eloko moko te epekisa biso koyeba makambo etali ye mpe kosala mokano na ye.​—Emoniseli 14:6, 7.

2 Nzambe akosunga mpe akobatela biso. Na Masese 29:25, Biblia elobi ete: “Kobanga bato ekoyeisa motambo; nde oyo akotalela [Yehova] akotombolama.” Kobanga bato ezali motambo mpo ekoki kopekisa biso tóyebisa bindimeli na biso polele. Mpo na komonisa ete akoki kobikisa biso, Nzambe alobi ete: “Bangá te, zambi ngai nazali na yo; yoká nsɔmɔ te mpo ete ngai nazali Nzambe na yo. Nakokembisa yo, nakosunga yo, nakotombola mpe yo na lobɔkɔ na ngai ya boyengebene.”​—Yisaya 41:10.

3 Nzambe alingaka baoyo bapusanaka penepene na ye. Ntoma Paulo akomaki maloba oyo ya kosimba motema: “Nandimi solo ete ezala liwa to bomoi to baanzelu to baguvɛrnema to makambo ya sikoyo to makambo oyo ekoya to banguya to bosanda to bozindo to ekelamu nini mosusu ekokoka te kokabola biso na bolingo ya Nzambe oyo ezali na kati ya Klisto Yesu Nkolo na biso.” (Baloma 8:37-39) Soki tozali kotyela Nkolo Mokonzi ya molɔ́ngɔ́ mobimba motema mpe kotosa ye, tokomona bolingo monene na ye. Oyo nde libaku kitoko!

4 Tozalaka na botɔndi mpo na makambo nyonso oyo Nzambe asaleli biso. Yehova azali Mozalisi na biso, ye oyo apesá biso bomoi. Lisusu, apesi biso kaka biloko oyo tosengeli na yango te, kasi mpe oyo ekoki kosala ete tósepelaka na bomoi. Ya solo, azali Mopesi ya makabo nyonso ya malamu. (Yakobo 1:17) Davidi, moto ya sembo oyo azalaki na botɔndi mpo na boboto monene ya Nzambe, akomaki boye: “Ee [Yehova], Nzambe na ngai, yo osali makambo mingi, misala na yo ya kokamwa mpe mikano na yo ezali mpo na biso . . . ekoleka oyo ekoki kotángama.”​—Nzembo 40:5.

5 Batɛmɛli na biso mosusu bakoki kobongwana. Okoki kosalisa bato oyo bazali kotɛmɛla yo soki ozali na ekateli makasi ya kotosa Nzambe mpe kolinga ye. Tózwa ndakisa ya baleki ya Yesu. Na ebandeli, baboyaki kondimela ye, mpe balobaki ete: “Abɛli motó.” (Malako 3:21; Yoane 7:5) Kasi, nsima ya liwa mpe lisekwa ya Yesu, mingi kati na bango bakómaki bandimi. Kutu, bandeko ya Yesu Yakobo ná Yuda bazali na kati ya bato oyo bakomaki Biblia. Saulo mpe, oyo azalaki monyokoli monene, akómaki ntoma Paulo. Bato mosusu oyo bazali konyokola biso lelo bakoki komona ete tozali na lingomba ya solo mpo tozali na mpiko ya kotikala sembo.​—1 Timote 1:13.

Tózwa ndakisa ya Aberash, mwasi moko ya Afrika oyo abondelaki mpo ayeba solo ya Nzambe. Nsima ya kobanda koyekola Biblia na Batatoli ya Yehova, libota na ye mpe bakonzi ya lingomba batɛmɛlaki ye makasi. Bandeko na ye mosusu, oyo babandaki mpe koyekola Biblia batikaki mpo babangaki bato. Kasi mwasi wana abondelaki Nzambe apesa ye makasi mpe mpiko mpe nsukansuka azwaki batisimo. Esukaki ndenge nini? Ndakisa na ye elendisaki bato mwambe ya libota na ye bázongela koyekola Biblia, mpe bazali kokende liboso.

Okoki kolonga motambo ya kobanga bato

Mpo na kokwea te na motambo ya kobanga bato, salá nyonso mpo na kolinga Nzambe mingi. Okoki kosala yango na nzela ya koyekola Biblia mpe komanyola mikapo lokola Baebele 13:6, oyo elobi boye: “Yehova azali mosungi na ngai; nakobanga te. Moto akoki kosala ngai nini?” Kobosana te ntina oyo emonisi ete kobanga Nzambe kasi bato te ezali likambo eleki malamu.

Kobosana mpe te mapamboli ebele oyo okoki kozwa soki ozali kosalela makambo oyo ozali koyekola na Biblia. Okoki kozwa biyano ya solosolo na mituna ya ntina mingi ya bomoi. Okozwa bwanya oyo ekoki kosalisa yo oyeba oyo okoki kosala ntango okutani na mikakatano. Okozala na elikya kitoko ata na mokili oyo etondi na yikiyiki. Mpe okobanda kobondela Nzambe Mozwi-ya-Nguya-Nyonso ntango nyonso olingi.

Ntoma Yoane akomaki boye: “Mokili ezali koleka mpe ndenge moko mposa na yango, kasi moto oyo azali kosala mokano ya Nzambe azali kotikala libela na libela.” (1 Yoane 2:17) Sikoyo nde ntango ya kotikala sembo mpe kobanga Nzambe. Na esika ya kotika ete kobanga bato elɛmbisa kondima na yo, okoki kosalela toli ya Nzambe oyo: “Mwana na ngai, zalá na mayele mpe sepelisá motema na ngai, ete nazongisela ye monɔkɔ oyo akopamela ngai.” (Masese 27:11) Ezali malamu mpenza kotosa toli yango!

Kobosana te, ata moto moko te akoki kopesa yo oyo Nzambe akopesa bato oyo babangaka ye: “Kosɔkɛma mpe kotosa [Yehova] ezali nzela ya bozwi mpe lokumu mpe bomoi.”​—Masese 22:4.

[Elilingi na lokasa 14]

Mpo na mpiko ya Aberash, bandeko na ye mwambe bazongeli koyekola Biblia