4 Luká kosilisa bantembe na yo

“Yo moto ya kondima moke, mpo na nini opesi ntembe nzela?”​—Matai 14:31.

MOKAKATANO EZALI NINI? Ezalaki mpe kokóma ete bayekoli ya Yesu bátya ntembe. (Matai 14:30; Luka 24:36-39; Yoane 20:24, 25) Kutu, Biblia elobi ete kozanga kondima ezali “lisumu oyo ezali kokanga biso kozanga mpasi.” (Baebele 12:1) Ntoma Paulo akomaki boye: “Kondima ezali te eloko oyo bato nyonso bazalaka na yango.” (2 Batesaloniki 3:2) Tomoni ete bato mosusu bakokaka komonisa ezaleli yango te. Kutu, bato mingi basalaka eloko te mpo bákóma na ezaleli yango. Nzambe apambolaka milende ya baoyo balukaka kokóma na ezaleli yango.

NDENGE NINI OKOKI KOLONGA MOKAKATANO YANGO? Luká koyeba makambo oyo otyelaka ntembe. Na Ndakisa, moyekoli Toma atyaki ntembe ete Yesu asekwaki, atako bayekoli mosusu bayebisaki ye ete bamoni ye. Toma alingaki komona elembeteli. Nini esalemaki na nsima? Yesu apesaki ye elembeteli oyo azalaki koluka mpo akóma na kondima makasi.​—Yoane 20:24-29.

Na nzela ya Biblia, Yehova Nzambe apesi biso biyano oyo tosengeli na yango mpo tólongola bantembe oyo tozali na yango. Na ndakisa, bato mingi batikaka kondimela Nzambe mpo bakanisaka ete ye nde alingaka to atindaka bitumba, mobulu, mpe bampasi oyo ezali konyokola bato. Biblia elobi nini na likambo yango?

Nzambe azali koyangela na nzela ya baguvɛrnema ya bato te. Yesu abengaki Satana, ekelamu oyo amonanaka te, ete “moyangeli ya mokili oyo.” (Yoane 14:30) Satana alakaki kopesa Yesu bikonzi nyonso ya mabelé soki asambeli ye; alobaki boye: “Nakopesa yo bokonzi oyo nyonso mpe nkembo na yango, mpamba te bapesá ngai yango, mpe napesaka yango na nani oyo nalingi.” Yesu awanganaki te ete Satana azali na bokonzi ya ndenge wana. Kasi, alobaki boye: “Ekomamá ete, ‘Ezali Yehova Nzambe na yo nde osengeli kosambela, mpe ezali kaka ye moko nde osengeli kosalela mosala mosantu.’” (Luka 4:5-8) Makambo nyonso ya mabe oyo ezali na mokili ezali nde mpo na foti ya Satana mpe ya baguvɛrnema ya bato, kasi ezali foti ya Nzambe te.​—Emoniseli 12:9, 12.

Etikali moke Yehova Nzambe alongola makambo nyonso oyo ebimiselaka bato mpasi. Asili kobongisa Bokonzi, to guvɛrnema moko, mpo na koyangela bato na nzela ya Mwana na ye Yesu Klisto. (Matai 6:9, 10; 1 Bakolinti 15:20-28) Ndenge Biblia esakolaki yango, nsango malamu ya Bokonzi yango ezali kosakolama lelo oyo na mabelé mobimba. (Matai 24:14) Mosika te, Bokonzi yango ekoboma banguna na yango nyonso mpe ekolongola makambo nyonso oyo ezali kobimisela bato mpasi.​—Danyele 2:44; Matai 25:31-33, 46; Emoniseli 21:3, 4.

MBANO NINI OKOZWA? Biblia elobi ete bato oyo bazali na ntembe bazali lokola mbonge oyo ezali komemama “na mopɛpɛ nyonso ya mateya na nzela ya bokosi ya bato.” (Baefese 4:14; 2 Petelo 2:1) Kasi, baoyo bazali kozwa biyano ya malamu na mituna na bango bazali ‘kotɛlɛma ngwi na kati ya kondima.’​—1 Bakolinti 16:13.

Batatoli ya Yehova, babimisi ya zulunalo oyo, bakosepela kosalisa yo ozwa biyano na mituna oyo ekoki kopekisa yo ozala na kondima makasi. Bazali kosɛnga yo osangana na bango mpe otalela mateya na bango yo moko. Soki osali bongo, okokóma na kondima makasi epai ya Nzambe.

Mpo na koyeba makambo mosusu, talá mokapo 8, “Bokonzi ya Nzambe ezali nini?,” mpe mokapo 11, “Mpo na nini Nzambe atiki bampasi ezala?,” na buku Biblia eteyaka mpenza nini?a

[Maloba na nse ya lokasa]

[Elilingi na lokasa 9]

Baoyo bazali kozwa biyano ya malamu na mituna na bango bazali kokómisa kondima na bango makasi