Nsango malamu na minɔkɔ 500

NTANGO bitumba ezalaki na Rwanda, mwa etuluku ya bandeko oyo babongolaka mikanda bakimaki bandako na bango, batikaki biloko na bango nyonso. Kasi, basalaki nyonso bázwa baordinatɛrɛ na bango ya mabɔkɔ mpe bamemaki yango na kaa ya bato bakimá mboka, esika bakimaki. Mpo na nini? Mpo bákoba kobongola mikanda oyo elimbolaka Biblia na monɔkɔ ya Kinyarwanda.

Mwana mwasi moko na Azia ya Sudi-Ɛsti azali kobɛta ordinatɛrɛ na ye butubutu, atako alɛmbi to molunge ezali, mpe atako mosala na ye ya kobongola ezali kokatana mpo kura ezali kokende mingi. Mokano na ye ezali nini? Ezali ya kosilisa kobongola liboso ya mokolo oyo esengelaki kotinda mokanda yango na imprimerie.

Babongoli wana bazali na kati ya ekipi monene ya bandeko 2 300 oyo basalaka mosala ya kobongola mikanda na mokili mobimba, na bamboka koleka 190. Babongoli yango, oyo bambula na bango ya kobotama ebandi na 20 tii na 90, basalaka mosala makasi mpo ete bato báyoka nsango ya kobɔndisa oyo euti na Biblia na minɔkɔ 500.​—Emoniseli 7:9.

Kosakola epai ya bato ya minɔkɔ ndenge na ndenge

Na bambula oyo euti koleka, mosala ya kobongola mikanda ya Batatoli ya Yehova ekoli na ndenge oyo esalemá naino te. Na ndakisa, na 1985, Linɔ́ngi ya Mosɛnzɛli ezalaki kobimisama mbala moko na minɔkɔ 23​—na ntango wana ezalaki likambo monene. Lelo oyo, Linɔ́ngi ya Mosɛnzɛli ezali kobimisama na minɔkɔ 176, mpe minɔkɔ nyonso ezali kobima nzela moko, mpo batángi nyonso na mokili mobimba bákoka koyekola makambo moko, nzela moko.

Na minɔkɔ soki 50, Linɔ́ngi ya Mosɛnzɛli ezali zulunalo kaka moko oyo ebimaka sanza na sanza. Mpo na nini? Bakompanyi oyo ebimisaka mikanda ya kotɛka ekipaka mpenza te kobimisa yango na minɔkɔ ya mboka na bango. Kasi Batatoli ya Yehova na mokili mobimba bapesaka makabo mingi mpo Biblia mpe mikanda oyo elimbolaka Biblia ekóma na bisika oyo bato bazali babola.​—2 Bakorinti 8:14.

Bato basepelaka mingi koyoka nsango ya Biblia na monɔkɔ na bango. Na ndakisa, eumeli te, mikanda oyo elimbolaka Biblia ebandaki kobima na Miskito, monɔkɔ oyo elobamaka na bato soki 200 000 na Nicaragua. Mwasi moko asɛngaki buku Mokanda mpo na masolo ya Bibliaa na monɔkɔ ya Miskito, mpe pastɛrɛ moko azalaki wana ntango bapesaki ye yango. Lokola amonaki ete buku yango ezali kitoko, pastɛrɛ alingaki kozwa yango. Mwasi yango aboyaki kopesa ye buku yango, ata ntango pastɛrɛ alakaki kopesa ye kilo 20 ya kafe mpo azwa buku yango!

Na boumeli ya mbula zomi oyo eleki, mikanda oyo elimbolaka Biblia ebongolami na minɔkɔ koleka zomi na mibale ya mboka Mexique, na ndakisa Maya, Nahuatl, mpe Tzotzil. Ekokaki ata mbula zomi te, masangá ya minɔkɔ ya mboka mpe ya elobeli ya bajɛstɛ na Mexique elongwaki na 72 mpe sikoyo eleki 1 200. Batatoli ya Yehova balonaka nsango ya Biblia na mitema ya bato, kasi batikaka ete Nzambe akolisa yango.​—1 Bakorinti 3:5-7.

Biblia na elobeli ya mikolo oyo na minɔkɔ 80

Na bambula oyo euti koleka, Batatoli ya Yehova basalaki mosala makasi mpo bábimisa Biblia​—Libongoli ya Mokili ya Sika na mobimba to na ndambo na minɔkɔ 80. Yango eboti mbuma nini? Motatoli moko ya Afrika ya Sudi alobaki mpo na Biblia na monɔkɔ ya Tswana ete: “Ezali esaleli moko kitoko. Ekosalisa ngai nasepela lisusu mingi na Liloba ya Nzambe. Elobeli oyo basaleli ezali pɛtɛɛ na kotánga mpe ezali kitoko.” Mobali moko ya Mozambique oyo alobaka monɔkɔ ya Tsonga akomaki boye: “Atako tozalaki na mikanda mingi oyo elimbolaka Biblia, kozanga Biblia ezalaki lokola nkanke ná mikalikali ezangá mbula! Kasi, mbula enɔkaki ntango Biblia Libongoli ya Mokili ya Sika ebimaki na monɔkɔ ya Tsonga.”

Bato oyo bazali kobongola Biblia mpo na kosalisa bato mosusu báyoka nsango malamu oyo ezali kati na yango bazali kokokisa esakweli moko ya kala na ndenge ya kokamwa. Yesu Kristo ye moko nde alobaki boye: “Nsango malamu oyo ya bokonzi ekosakolama na mabele mobimba esika bato bafandi mpo ezala litatoli na bikólo nyonso; bongo nsuka ekoya.”​—Matai 24:14.

[Maloba na nse ya lokasa]

[Etanda na lokasa 25]

(Mpo na komona yango, talá mokanda)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

MOTÁNGO YA MINƆKƆ

[Bililingi na lokasa 24, 25]

Bato soki 2 300 bamipesi na mosala ya kobongola mikanda oyo elimbolaka Biblia na minɔkɔ 500

BÉNINN

SLOVÉNIE

ÉTHIOPIE

GRANDE-BRETAGNE