Sekele 4
Poná baninga na yo na bwanya
BIBLIA ETEYAKA NINI? “Ye oyo atambolaka na bato ya bwanya akokóma na bwanya.”—Masese 13:20.
MOKAKATANO EZALI WAPI? Baninga na biso bakoki kosala ete tósepela lisusu mingi na oyo tozali na yango to te. Bizaleli mpe masolo na bango ekoki kobongola ndenge oyo totalelaka bomoi.—1 Bakorinti 15:33.
Na ndakisa, tótalela lisolo ya mibali 12 oyo bautaki kotala to konɔnga mokili ya Kanana. Mingi na bango “bazalaki kaka kopesa bana ya Yisraele nsango ya mabe mpo na mokili oyo banɔngaki.” Atako bongo, mibali mibale balobaki malamu mpo na mokili ya Kanana, balobaki ete ezali “mokili moko ya malamu mingi, mingi mpenza.” Kasi, makanisi mabe ya banɔngi zomi epalanganaki na kati ya bato. Biblia elobi ete: “Liyangani mobimba etombolaki mongongo, . . . mpe bana nyonso ya Yisraele babandaki koimaima.”—Mitángo 13:30–14:9.
Ndenge moko lelo, bato mingi ‘baimaimaka, bamilelalelaka mpo na bomoi na bango.’ (Yuda 16) Ezali mpasi kokoba kosepela na oyo ozali na yango ntango ozali na baninga oyo basepelaka ata moke te na oyo bazali na yango.
OKOKI KOSALA NINI? Talelá masolo oyo obɛtaka na baninga na yo. Baninga na yo batutaka ntolo mpo na biloko oyo bazali na yango, to bamilelalelaka ntango nyonso mpo na biloko oyo bazali na yango te? Mpe yo ozali moninga ya ndenge nini mpo na bango? Otindaka baninga na yo bálula biloko oyo ozali na yango, to olendisaka bango básepela na oyo bazali na yango?
Talelá ndakisa ya Davidi, oyo alingaki kokóma mokonzi, mpe ya Yonatana, mwana ya Mokonzi Saulo. Davidi azalaki kokimakima na esobe. Mokonzi Saulo azalaki kobanga Davidi mpe alingaki ete Davidi akufa. Atako Yonatana asengelaki kokóma mokonzi nsima ya Saulo, akómaki moko ya baninga ya motema ya Davidi. Yonatana andimaki ete Nzambe aponaki Davidi mpo akóma mokonzi nsima ya Saulo mpe asepelaki kopesa ye mabɔkɔ.—1 Samwele 19:1, 2; 20:30-33; 23:14-18.
Osengeli na baninga ya ndenge wana, baoyo basepelaka na oyo bazali na yango, baoyo balingaka bolamu na yo. (Masese 17:17) Ya solo, mpo na kozwa baninga oyo bazali na bizaleli ya ndenge wana, osengeli mpe komonisa bizaleli yango.—Bafilipi 2:3, 4.
[Elilingi na lokasa 7]
Baninga na yo basalaka ete osepela lisusu na oyo ozali na yango to te?