Pusaná penepene na Nzambe

“Ee, Nzambe na ngai, kanisá ngai mpe salelá ngai bolamu”

NDEKO mwasi moko oyo azalaki sembo, oyo azalaki komimona ete azali na ntina te, akomaki boye: “Nazalaki kokanisa ete Yehova, oyo ayebi ngai malamu mpenza, akokaki te kolinga to kondima ngai.” Ekómelá yo naino te okóma na makanisi ya ndenge wana, okanisa ete obongi te ete Nzambe atyela yo likebi, to andima yo? Soki ezali bongo, maloba oyo ezali na Nehemia 13:31, ekolendisa yo.

Nehemia, guvɛrnɛrɛ ya Bayuda na siɛklɛ ya mitano liboso ya ntango na biso, asalaki nyonso oyo akoki mpo na kosepelisa Nzambe. Atambwisaki mosala ya kotonga lisusu bifelo ya Yerusaleme atako banguna bazalaki kotɛmɛla bango. Asɛnzɛlaki ete bato bátosa mibeko ya Nzambe, azalaki komibanzabanza mpo na baoyo bazalaki konyokwama, mpe alukaki kolendisa kondima ya bandeko na ye Bayisraele. Nzambe, amonaki bolamu oyo moto wana ya sembo asalaki? Yehova andimaki Nehemia? Tokozwa eyano na maloba ya nsuka ya mokanda oyo ezali na nkombo na ye.

Nehemia abondelaki boye: “Ee Nzambe na ngai, kanisá ngai mpe salelá ngai bolamu.”a Nehemia azalaki nde kobanga ete Nzambe akomona te makambo ya malamu oyo asalaki to akobosana ye? Te. Na ntembe te, Nehemia ayebaki oyo bato oyo bakomaki Biblia liboso na ye balobaki na ntina na ndenge oyo Yehova atyelaka basambeli na ye ya sembo likebi mpe abosanaka te misala na bango ya malamu. (Kobima 32:32, 33; Nzembo 56:8) Na yango, alingaki mpenza Nzambe asala nini? Buku moko elobi ete, liloba ya Ebre oyo ebongolami na “kokanisa” elimboli “kosepela na likambo mpe kosala makambo oyo emonisi ete osepeli na likambo yango.” Lokola azalaki na kondima makasi na nguya oyo libondeli ezali na yango, Nehemia asɛngaki Nzambe akanisa ye mpenza mpe apambola ye.​—Nehemia 2:4.

Yehova ayanolaki libondeli yango? Tokoki koloba ete asilaki koyanola yango. Lokola amonaki malamu libondeli ya Nehemia ezala na kati ya Makomami oyo ekomamaki na litambwisi ya elimo santu, yango endimisi biso ete akanisaki Nehemia na bolingo mpenza. Kasi, “Moyoki ya libondeli” akosala lisusu mingi koleka mpo na koyanola na libondeli ya Nehemia oyo eutaki mpenza na motema.​—Nzembo 65:2.

Nzambe akopesa lisusu Nehemia mbano mpo na malamu nyonso oyo asalaki mpo na losambo ya solo. (Baebre 11:6) Na mokili ya sika ya bosembo oyo Yehova alaki, akopambola Nehemia na ndenge akosekwisa ye.b (2 Petro 3:13; Emoniseli 21:3, 4) Kuna, na elikya ya bomoi ya seko na mabele, Nehemia akomona ete Yehova akanisaki ye mpenza mpe asalelaki ye bolamu.

Libondeli ya Nehemia emonisi bosolo ya maloba oyo ya Mokonzi Davidi: “Yo moko okopambola moto nyonso oyo azali moyengebene, Ee Yehova; Okozinga bango na kondimama lokola na nguba ya monene.” (Nzembo 5:12) Ya solo, Nzambe amonaka mpe azwaka na motuya milende oyo tosalaka mpenza mpo na kosepelisa ye. Ntango ozali kosala nyonso mpo na kosalela ye, okoki kotya motema ete akokanisa yo na bolingo mpe akopambola yo mpenza.

Botángi ya Biblia mpo na Febwali:

◼ Nehemia 1-13

[Maloba na nse ya lokasa]