Makambo nini bana basengeli koyekola?

“Makomami nyonso ekomami na litambwisi ya elimo ya Nzambe mpe ezali na litomba mpo na koteya, kopamela, kosembola makambo, mpo na kopesa disiplini na boyengebene.”​—2 TIMOTE 3:16.

ESENGELI koteya bana makambo ya Nzambe. Epai wapi bakoki koyekola makambo yango? Na Biblia, mokanda ya Nzambe oyo bato mingi bamemyaka.

Biblia ezali lokola mokanda oyo euti epai ya Nzambe. Na mokanda yango, Nzambe amonisi bizaleli na ye mpe apesi mibeko oyo bana na ye nyonso basengeli kotosa, bázala bilenge to mikóló. Tótalela ndambo ya mateya ya Biblia mpe makambo oyo ata bana bakoki koyekola.

Nzambe alingi tóyeba nini na ntina na ye?

◼ Oyo Biblia eteyaka: “Yo, oyo nkombo na yo ezali Yehova, Yo moko nde Oyo-Aleki-Likoló na mabele mobimba.”​—Nzembo 83:18.

Liteya: Nzambe azali te nguya moko boye, kasi azali mpenza, mpe azali na nkombo.

◼ Oyo Biblia eteyaka: “Yehova azali kotalatala mitema nyonso, mpe asosolaka mposa nyonso ya makanisi. Soki oluki ye, akosala ete omona ye.”​—1 Ntango 28:9.

Liteya: Yehova Nzambe akipaka biso nyonso, ata mpe bana mike. (Nzembo 10:14; 146:9) Alingi ete biso tóyekola makambo na ye.

◼ Oyo Biblia eteyaka: “Mwana mobali oyo tata akufá, bosengeli komonisa ye mpasi te. Soki omonisi ye mpasi ata moke, mpe soki aleleli ngai ata moke, nakoyoka solo kolela na ye.”​—Kobima 22:22-24.

Liteya: Yehova ayokaka ata mabondeli ya bana mike. Tokoki kobondela Nzambe mbala na mbala mpe koyebisa ye oyo ezali mpenza na motema na biso.

◼ Oyo Biblia eteyaka: “Mbala na mbala bamekaki Nzambe, mpe bayokisaki Mosantu ya Yisraele motema mpasi.”​—Nzembo 78:41.

Liteya: Maloba mpe misala na biso ekoki koyokisa Yehova mawa to kopesa ye esengo; na yango, tosengeli kokanisa liboso ya koloba to kosala likambo.

Ndenge nini tosengeli kotalela bato oyo bakeseni na biso?

◼ Oyo Biblia eteyaka: “Nzambe aponaka bilongi te, kasi na ekólo nyonso moto oyo azali kobanga ye mpe azali kosala makambo ya boyengebene andimami na ye.”​—Misala 10:34, 35.

Liteya: Soki Nzambe andimaka bato ya lolenge nyonso, tosengeli te koboya bato mosusu kaka mpo tokeseni na bango mposo to makambo mosusu.

◼ Oyo Biblia eteyaka: “Bómibongisa ntango nyonso mpo na koloba liboso ya moto nyonso oyo atuni bino ntina ya elikya oyo bozali na yango, kasi bósalaka bongo na boboto mpe na limemya makasi.”​—1 Petro 3:15.

Liteya: Ntango tozali kosolola na bato makambo ya Nzambe, tosengeli komonisa ete tondimaka mpenza makambo yango, kasi tóloba na bango na boboto. Tosengeli mpe komemya baoyo mateya na bango ekeseni na oyo ya biso.

Bizaleli nini tosengeli komonisela bato ya libota na biso?

◼ Oyo Biblia eteyaka: “Bana, bótosaka baboti na bino na makambo nyonso, mpo yango ezali malamu mingi na kati ya Nkolo.”​—Bakolose 3:20.

Liteya: Bana ya botosi bamonisaka kaka te ete balingaka baboti na bango, kasi mpe balingaka kosepelisa Nzambe.

◼ Oyo Biblia eteyaka: “Bókoba kokanga motema moto na moto na makambo ya mosusu mpe kolimbisana na motema moko soki moko na bino azali na likambo ná mosusu. Kaka ndenge Yehova alimbisaki bino na motema moko, bino mpe bósala bongo.”​—Bakolose 3:13.

Liteya: Na bantango mosusu, bato mosusu, ata mpe bato ya libota na biso bakoki kosilikisa biso. Kasi, soki tolingi ete Nzambe alimbisa biso, tosengeli kolimbisaka basusu.​—Matai 6:14, 15.

Mpo na nini kozala sembo mpe boboto?

◼ Oyo Biblia eteyaka: ‘Bólongola lokuta, [mpe] bólobaka solo mokomoko na bino na mozalani na ye.’​—Baefese 4:25.

Liteya: Ntango tozali koloba solo, tozali komekola Nzambe mpe kosepelisa ye. Soki tokómi na ezaleli ya kobuka lokuta, tokokóma lokola Zabolo, “tata ya lokuta” mpe monguna ya Nzambe.​—Yoane 8:44; Tito 1:2.

◼ Oyo Biblia eteyaka: “Makambo nyonso oyo bolingaka bato básalela bino, bino mpe bósalela bango kaka bongo.”​—Matai 7:12.

Liteya: Tosengeli komityaka na esika ya bato ya libota na biso mpe ya bato mosusu na esika tofandi mpe kotalela makanisi mpe bamposa na bango. Ntango tozali ‘komitya na esika ya basusu,’ na ntembe te, bango mpe bakosalela biso makambo na boboto.​—1 Petro 3:8; Luka 6:38.

Ndenge bandakisa oyo emonisi yango, mateya ya Biblia ekoki kosalisa bana bákóma mikóló oyo bazali na botɔndi, bazali na limemya mpe bamityaka na esika ya basusu. Kasi, nani asengeli koteya bana makambo yango?