Eyano na likambo yango ezali na ntina?

“Nakómaki kobima ná mibali ntango nazalaki naino na mbula zomi. Na ebandeli, tozalaki kaka kosimbana na mabɔkɔ mpe kopesana babizi. Kasi, na nsima, tokómaki kosimbanasimbana na nzoto mpe kosala makambo mosusu ya mabe. Ntango nakómaki na mbula 15, nazwaki mosala mpe bana mibali oyo bazalaki baninga na ngai ya mosala bakómaki koluka ete tósangisaka nzoto. Nalingaki bámona ngai yuma te mpe nazalaki kosala makambo nyonso oyo baninga na ngai bazalaki kosala. Nalingaki bándima ngai, mpe yango etindaki ngai namipesa mpenza na makambo ya kosangisa nzoto.”​—SARAH,a AUSTRALIE.

OKOKAMWA soki oyoki ete Sarah akolá na libota oyo basambelaka? Baboti na ye bateyaki ye mibeko ya Biblia. Kasi, Sarah aponaki nzela mosusu.

Bato mingi bamonaka ete likambo oyo Sarah asalaki ezali mabe te. Bamonaka ete makambo oyo Biblia epekisi na oyo etali kosangisa nzoto ezali makambo ya kala. Bamosusu mpe bamonaka mabe te ete moto oyo asambelaka azala na bamakango.

Ezali na ntina oyeba mpe otosa oyo Biblia elobi na likambo ya kosangisa nzoto? Biblia yango moko elobi ete “ekomami na litambwisi ya elimo ya Nzambe mpe ezali na litomba mpo na koteya.” (2 Timote 3:16) Soki ondimaka ete Nzambe akelaki bato mpe ete Biblia ezali Liloba na ye, ezali na ntina oyeba oyo yango elobi na oyo etali kosangisa nzoto.

Nzokande, bato mingi bazali na mobulu na motó mpo na oyo Biblia elobi na likambo etali kosangisa nzoto. Basango ná bapastɛrɛ bateyaka makambo ndenge na ndenge na likambo etali kosangisa nzoto mpe balobaka ete mateya yango eutaka na Biblia. Kutu, likambo yango ekabolá mangomba mingi ya minene.

Na esika ondima kaka maloba ya bato mosusu, ezali malamu ozwa ntango ya kotalela likambo yango yo moko. Lisolo oyo elandi epesi biyano na mituna zomi oyo bato batunaka mingi mpo na oyo Biblia elobi na likambo etali kosangisa nzoto. Na lisolo yango, okomona biyano ya polele oyo euti na Biblia. Lisolo ya nsuka ekomonisa mpo na nini ekateli na biso na likambo yango ezali na ntina.

[Maloba na nse ya lokasa]