Mituna ya batángi . . .

Mabele ekozala kaka nsima ya 2012?

▪ “Ebele ya bato oyo bazali kokanisa ete nsuka ya mokili ekómi pene bazali kotondana na mboka moko ya ekólo France. . . . Bato yango bazali kokanisa ete mokili ekokufa mokolo ya 21 Desɛmbɛ 2012, oyo ekosukisa eleko ya mbula 5 125 na kalandriye ya kala ya Ba-Maya.”​—BBC News.

Atako bato ya ndenge na ndenge oyo tozali komona na siɛklɛ oyo ya 21, na ndakisa bakonzi ya mangomba, bato ya siansi, mpe bato oyo basakolaka makambo ekoya bazali koloba ete mabele ekokufa, mabele ekokufa te. Mabele ekozala kaka nsima ya 2012; kutu, ekozala ata na bambula nyonso oyo ekoya nsima.

Biblia elobi na biso boye: “Libota oyo eleki, mpe libota mosusu eyei; kasi mabele ezali koumela seko.” (Mosakoli 1:4) Tótalela mpe maloba oyo ezali na Yisaya 45:18: “Talá oyo Yehova alobi, . . . Moto oyo asalaki mabele mpe Moto oyo akelaki yango, Moto oyo atɛlɛmisaki yango ngwi, azalisaki yango mpamba te, asalaki yango mpo bato báfanda wana: ‘Nazali Yehova, mpe mosusu azali te.’”

Tokanisi mpenza ete tata oyo alingaka mwana na ye akolekisa ebele ya bangonga na kosalela mwana na ye mwana-popi, bongo na nsima, ntango mwana asakani na yango kaka moke, abɔtɔli yango mpe apanzi yango nyonso? Tokoloba ete azali tata moko mabe! Ndenge moko mpe, Nzambe akelaki mabele libosoliboso mpo bato básepela na yango. Alobaki na Adama ná Eva ete: “Bóbota mpe bókóma mingi mpe bótondisa mabele mpe bótya yango na nse na bino.” Na nsima, “Nzambe amonaki eloko nyonso oyo asalaki mpe, talá! ezalaki malamu mingi.” (Ebandeli 1:27, 28, 31) Nzambe abongoli te makanisi oyo azalaki na yango na ebandeli; akotika nzela te ete mabele ebebisama. Yehova alobi boye mpo na makambo nyonso oyo alaki: “Ekozongela ngai te soki ekokisi naino likambo na yango te, kasi ekosala mpenza oyo nasepeli na yango, mpe ekolonga mpenza na likambo oyo natindaki yango.”​—Yisaya 55:11.

Kasi, Yehova akani ‘kobebisa baoyo bazali kobebisa mabele.’ (Emoniseli 11:18) Na Liloba na ye, alaki boye: “Bato ya kolongobana nde bakofanda na mabele, mpe bato oyo bazangi mbeba nde bakotikala na yango. Kasi bato mabe bakolongolama na mabele; mpe bato ya bokosi bakopikolama wana.”​—Masese 2:21, 22.

Yango ekosalema ntango nini? Moto moko te ayebi. Yesu alobaki boye: “Mpo na mokolo yango to ngonga yango moto moko ayebi te, ezala baanzelu na likoló, ezala Mwana, kaka Tata.” (Marko 13:32) Batatoli ya Yehova balukaka te koyeba mokolo oyo Nzambe akoboma bato mabe. Atako balandaka na likebi “elembo” ya ntango ya nsuka mpe bandimaka ete tozali sikoyo na eleko oyo Biblia ebengi “mikolo ya nsuka”; bayebi te mokolo nini mpenza “nsuka” yango ekoya. (Marko 13:4-8, 33; 2 Timote 3:1) Batiki likambo yango na mabɔkɔ ya Nzambe ná Mwana na ye.

Liboso nsuka yango eya, Batatoli ya Yehova bamipesi na kosakola nsango malamu ya Bokonzi ya Nzambe, guvɛrnema oyo ekoyangela mabele mobimba mpe ekokómisa yango paradiso, esika oyo kimya ekozala. “Bayengebene bakozwa mabele [yango] mpe bakofanda wana seko.”​—Nzembo 37:29.

[Eutelo ya bafɔtɔ na lokasa 10]

Image Science and Analysis Laboratory, NASA-Johnson Space Center