Tozwaka mbongo ya kotambwisa misala na biso wapi?

Mbula nyonso, tobimisaka mpe tokabolaka ebele ya Babiblia mpe mikanda oyo elimbolaka yango. Totongaka mpe totambwisaka misala ya bafiliale mpe ya ba-imprimeri na mokili mobimba. Ebele ya masangá na biso eyanganaka na makita ya losambo na bandako moko oyo ezalaka mindɔndɔ te kasi ya kitoko, oyo tobengaka Bandako ya Bokonzi. Nani abimisaka mbongo mpo na misala wana nyonso?

Mbongo oyo etambwisaka misala na biso eutaka na makabo oyo bato bapesaka na bolingo na bango moko. (2 Bakorinti 9:7) Na 1879, nimero ya mibale ya Linɔ́ngi ya Mosɛnzɛli ya Siona, [ndenge bazalaki kobenga zulunalo oyo na ntango wana] elobaki boye: “Tondimi ete YEHOVA moto azali kopesa mbongo mpo na kobimisa ‘Linɔ́ngi ya Mosɛnzɛli ya Siona,’ mpe lokola ezali bongo, tokoki te kosɛnga to koluka mbongo epai ya bato mpo na kobimisa yango.” Tii lelo tokangamaka kaka na ekateli yango.

Totindaka makabo yango mbala moko na babiro ya filiale na biso to totyaka yango na bakɛsi ya makabo oyo ezalaka na Bandako ya Bokonzi. Tosɛngaka dime te mpe tokɔngɔlaka mabonza te, tofutisaka mpe bato mbongo te mpo na mosala to mikanda na biso. Bafutaka biso te mpo na mosala ya kosakola, koteya na lisangá to kopesa mabɔkɔ na mosala ya kotonga bisika na biso ya losambo. Kutu, Yesu alobaki boye: “Bozwi ofele, bópesa ofele.” (Matai 10:8) Bandeko nyonso oyo basalaka na babiro ya filiale na biso mpe na biro monene ya Batatoli ya Yehova, ata mpe bandeko oyo batambwisaka misala ya Batatoli ya Yehova na mokili mobimba bafutamaka te.

Makabo oyo bapesaka esalelamaka mpe mpo na kosunga bandeko oyo bazwi makama. Bakristo ya liboso basungaki bandeko na bango oyo makama ekwelaki bango. (Baroma 15:26) Biso mpe tosungaka bandeko oyo bazwi makama na ndenge totongelaka bango lisusu bandako mpe bisika ya losambo, topesaka bango bilei, bilamba mpe lisalisi ya monganga.