Mikano na biso mizali nini mpo na eleko ya bopemi ya kelasi?

Ntango tokanisaka mpo na sanza ya Yulí, Augústo mpe Sɛtɛ́mbɛ, tokanisaka bibongiseli ya kokamata mpo na koyangana na liyangani ya etúká, tokanisaka mpe mikano na biso: mikolo ya bopemi na esengo nyonso kokende kotala biboto to baninga. Talá mwa makundweli oyo makoki kosunga biso ete tótya matomba ya Bokonzi na esika ya liboso wana tozali kobongisa eleko yango:

◼ Tókamata bibongiseli ya sikisiki mpo na koyangana na liyangani ya etúká. Mpo na kopɛngola mikakatano nyonso, tólɛngɛla liboso mpenza transport na biso mpe esika ya kofanda.

◼ Soki tokei epai mosusu na mikolo ya bopemi, tómibongisa mpo na koyangana na makita na lisangá oyo lizwami esika tofandi mpe tósangana na mosala ya kosakola. Tósɛnzɛla ete tótinda lapólo na biso ya mosala ya kosakola; soki esengeli, tótinda yango epai ya mokomeli ya lisangá na mwango ya nokinoki mpe ya kotyela motema.

◼ Kokende kotala biboto oyo bazali kati na solo te ekozala mbala mosusu libaku ya kopesa litatoli oyo ekoki kobota mbuma. Tósɛnzɛla ete tómema Biblia na biso mpe mikanda misusu mingi.

◼ Tokoloba nini mpo na kopesa mabɔkɔ na lisangá moko ya pembeni oyo lizali na mposa ya lisungi mpo na kokokisa mosala ya kosakola na teritware na yango? Bankulutu to mokɛngɛli ya zongazonga bakoki koyebisa biso bamposa oyo ezali kati na etúká na biso.

◼ Bopemi ya banakelasi ezali libaku moko kitoko mpo na bilenge ete bákólisa mosala na bango ya kosakola. Bilenge, bokoki kozala babongisi-nzela basungi?

◼ Lokola ezali ntango moko kitoko, na ntembe te, tokomona ete tokozwa matomba kitoko soki tozali kosakola na mpokwa, ntango bato mingi bazalaka na bandako na bango.

◼ Bankulutu basengeli mpenza kosɛnzɛla ete misala nyonso ya lisangá milanda kotambola malamu, na kozwáká bibongiseli mpo ete misala oyo misalemaka epai na baoyo bakokenda bopemi mísalema na bandeko mosusu na eleko yango.

Tómikundola ete “moto akosala mosala na molende, akozwa litomba.” (Mas. 21:5, Liloba lya Nzambe) Tóbongisa ntango na biso na boye ete tósimba mpenza mabaku nyonso ya kosalela matomba ya Teokrasi.