Lolenge bato ya libota moko bakoki kopesana mabɔkɔ—Mpo na kozwa matomba na makita ya lisangá
1 Mabota ya baklisto masengeli kolanda etinda ya koyangana esika moko na makita ya lisangá. (Ebe. 10:24, 25) Soki bazali kosala na bomoko, moto mokomoko ya libota akozala na likoki ya kobongisa makita malamu, ya koyangana, mpe ya kopesa biyano na makita yango. Ezalela ya mabota ekeseni, kasi ezali na makambo oyo mobali moklisto, mwasi oyo azali mondimi, to moboti oyo azali kobɔkɔla bana ye moko akoki kosala mpo na kopesa nzela ete libota ezala na bomoko na makambo ya elimo, ata soki bazali na bana mingi mpe bana yango bazali mikóló to mike.—Mas. 1:8.
2 Zwá ntango ya komibongisa: Bato ya libota bapesanaka mabɔkɔ mpo ete moto mokomoko ya libota amibongisa malamu mpo na makita. Mingi batalelaka elongo lisolo oyo ebongisami mpo na boyekoli ya Linɔ́ngi ya Mosɛnzɛli. Basusu babongisaka elongo boyekoli ya mokanda mpo na lisangá to basalaka elongo botángi ya Biblia oyo ebongisami pɔsɔ na pɔsɔ. Mokano ezali ya koyeba liboso makambo ya ntina oyo ekolobelama na makita. Na lolenge yango, moto mokomoko ya libota akozwa matomba na makambo oyo bakoyekola mpe akomibongisa malamu mpo na kopesa biyano soki libaku emonani.—1 Tim. 4:15.
3 Bózala na mokano ya kopesaka biyano: Moto nyonso kati na libota asengeli kozala na mokano ya kosala eyambweli ya elikya na ye liboso ya bato mosusu na kopesáká biyano na makita. (Ebe. 10:23) Ezali na moto moko kati na libota oyo azali na mposa ya lisungi to bilendiseli mpo na kosala yango? Lisungi nini moto oyo azali kobongisa mokumba ya Eteyelo ya mosala ya Teokrasi asengeli na yango? Basi basepelaka ntango mibali na bango basalisaka bango mpe mbala mosusu bapesaka bango makanisi mpo na kobongisa lisese moko to ndakisa moko kitoko oyo eyokani na lisolo na bango. Baboti basengeli te kobongisa mikumba mpo na bana na bango. Kosala bongo ekoki kobebisa makoki ya bana. Kasi baboti bakoki nde kosalisa bana na bango mpe koyoka bango wana bazali kobongisa mikumba na bango na mongongo makasi.—Ef. 6:4.
4 Bózwa bibongiseli mpo na koyangana na makita: Baboti bakoki koteya bana na bango komibongisa mpe kokende na makita na ngonga malamu uta ntango bazali naino mike mpenza. Bato ya libota basengeli kopesana mabɔkɔ mpo na kosala misala ya ndako na boye ete bákóma na makita na nsima ya ngonga te.—Talá makanisi mapesami na buku Bolamu na libota, lokasa 112, mpe Mituna oyo bilenge batunaka, lokasa 316 kino 317.
5 Baboti mpe bana bakoki komanyola maloba ya Yosua oyo elobaki ete: “Kasi mpo na ngai mpe ndako na ngai, biso tokosalela Yehova.” Na yango, moto mokomoko ya libota asengeli kopesa mabɔkɔ mpo na kozwa matomba na makita ya lisangá.—Yos. 24:15.