Tóteya basusu mpo na litomba na bango

¹ Yehova alingi ete bato nyonso bázwa litomba. (Yis. 48:17) Ayebi nini ekoki kopesa biso esengo ya solosolo. Mposa na ye ezali ete bato bápɛngola makama mpe básepela na bomoi na kotosáká mibeko na ye. Tozali kozwa matomba mingi wana tozali kotambwisa bomoi na biso na ndenge oyo Nzambe alingi. (Nz. 34:8) Ndenge nini tokoki koteya basusu básala lokola biso?

² Makambo nini bato balingaka mingi? Na esika ofandi bato bamibanzabanzaka na makambo nini? Bamibanzabanzaka mpo na kimya ya ndako na bango, mpo libala na bango ezala malamu, mpo bomoi ya bana na bango ezala malamu mpe bongo na bongo, boye te? Ntango bazali kokutana na mikakatano, balukaka lisalisi epai wapi? Bakoki mbala mosusu kotya motema na mayele na bango moko, to kotya motema na toli oyo bazali kotánga na mikanda, to na toli ya bato mosusu. Na nsima, mingi kati na bango bayebaka te eloko nini bakosala na makanisi wana oyo ezali malamu te mpe ezali na litomba moko te mpo na bango. Tosengeli kondimisa bango ete toli oyo Liloba ya Nzambe ezali kopesa eleki toli nyonso na malamu. (Nz. 119:98) Ndenge nini? Na kolakisáká bango lolenge oyo bakoki kobongisa bomoi na bango ata sikoyo soki basali milende mpo na koyekola Biblia mpe kosalela makambo oyo Biblia ezali koloba.​—2 Tim. 3:16, 17.

³ Ndenge nini libota ekoki kozala malamu: Bobele bato moke mpenza nde bayebi ete toli euti na Nzambe oyo ezali na Baefese 5:22–6:4 ebongi mpo na kosilisa mikakatano ya libota. Likambo yango emonanaki epai na babalani mibale oyo balingaki kokabwana nsima ya mbula zomi ya libala. Nzokande, mwasi akómaki koyekola Biblia, mpe ayekolaki mibeko ya Makomami mpo na bomoi ya libota. Eumelaki te, mobali na ye amonaki ete mwasi na ye abongwani mpo azali kosalela toli ya Biblia, ye mpe abandaki koyekola. Na nsima alobaki ete: “Sikoyo tomoni eloko oyo esalisaka mpenza mpo libota ezala na esengo.”

⁴ Mokano ya solo na bomoi: Elenge moko oyo azalaki momɛli bangi, akendaki koluka lisalisi epai na Batatoli, bateyaki ye ete Yehova amibanzabanzaka mpenza mpo na ye. Alobaki ete: ‘Nayekolaki ete Mozalisi azali na mokano mpo na bato mpe ete alaki bomoi ya seko epai na baoyo nyonso bazali kosala mokano na ye. Bokoki koyeba te esengo oyo nazwaki ntango nayokaki makambo oyo nyonso. Lelo oyo nzoto na ngai ezali kolɔngɔnɔ, makanisi na ngai efandi kimya, mpe nazali na boyokani malamu elongo na Nzambe.’

⁵ Moto nyonso akoki kozwa matomba na toli malamu oyo ezali kouta na Liloba ya Nzambe. Soki totiki toli yango etambwisa biso, tokomonisa ete nzela ya Yehova eleki banzela nyonso ya mokili na malamu. (Nz. 116:12) Tozali na libaku malamu ya koyebisa nsango oyo epai ya bato mosusu, koteya bango ete bázwa litomba. Soki tosali bongo tokozwa matomba mingi.