Otalaka bobele oyo emonanaka na miso?

¹ Ntango tobimaka na mosala na biso ya kosakola, mayoki ya liboso oyo tozalaka na yango epai ya bato mosusu, ekoki kosala ete tókakatana mpo na kosakola nsango malamu epai na bango. Na ndakisa, okosala nini soki mobali moko oyo azali komonana lokola moto ya matata atalaka yo na miso ya mabe ntango nyonso oyo okendaka kotala moto moko oyo azali kosepela na solo mpe afandi penepene na ye? Ndeko mwasi moko mobongisi-nzela oyo akutanaki na likambo yango, azwaki ekateli ya kokende epai ya mobali yango mpo na kosolola na ye. Mobali yango apesaki ye mbote na esengo te. Kasi, na kokamwa nyonso, ayokaki nsango ya Biblia mpe asepelaki koyekola. Lokola ndeko mwasi atalaki bobele ndenge mobali yango azalaki komonana na libanda te, yango epesaki nzela na mobali yango mpe mwasi na ye ete bayekola solo.

² Ndeko mwasi mosusu abangaki mbala ya liboso oyo amonaki elenge mobali moko ya nsuki milai, kasi apesaki ye litatoli mpe alandaki kosala bongo mbala na mbala wana elenge yango azalaki koya na magazini epai azalaki kosala. Milende na ye ebotaki mbuma malamu, lelo oyo, elenge mobali yango azali motatoli oyo azwi batisimo. Nini ekosalisa biso tózwa ekateli nokinoki te ete bato ya ndenge wana bakondima solo te?

³ Tómekola ndakisa ya Yesu: Yesu ayebaki ete akopesa bomoi na ye mpo na moto nyonso. Yango wana, azalaki kobanga bato te ndenge bazalaki komonana na miso. Ayebaki ete ata bato oyo bayebanaki lokola bato mabe bakoki kobongwana soki basalisi bango malamu mpe balendisi bango. (Mat. 9:9-13) Amekaki kosalisa moto nyonso, azala mozwi to mobola. (Mat. 11:5; Mko. 10:17-22) Tótala bato oyo tozali kokutana na bango na mosala ya kosakola bobele ndenge bazali komonana na miso te. Mpamba te yango ekoki mbala mosusu kopekisa biso ete tósosola te ezalela malamu ya motema ya bato mosusu. (Mat. 7:1; Yoa. 7:24) Nini ekoki kosalisa biso na kolanda ndakisa kitoko ya Yesu?

⁴ Na nzela ya boyekoli na biso ya Biblia, tosili komona ete Liloba ya Nzambe ezali na nguya ya kobongola makanisi ya moto, etamboli na ye, mpe bomoto na ye. (Ef. 4:22-24; Ebe. 4:12) Na yango, tosengeli komipekisa te na kopesa moto nyonso litatoli mpe kotika makambo nyonso mosusu na mabɔkɔ ya Yehova, ye oyo azali na likoki ya kotala mitema ya bato.​—1 Sam. 16:7; Mis. 10:34, 35.

⁵ Tiká ete ezaleli na biso ya kozanga koponapona ntango tozali kosakwela bato nyonso nsango malamu, kozanga kotala lolenge bazali komonana na miso, ekolisa mosala monene ya kobuka mbuma oyo ezali kosalema na mikolo oyo ya nsuka.​—1 Tim. 2:3, 4.