Bomoi ekozala ndenge nini na mikolo ekoya?

Osí omituna ndenge oyo bomoi ekozala na mikolo ekoya? Biblia elobi ete mosika te makambo ya minene ekosalema na mabele.

Yesu alobelaki makambo oyo ekosalisa biso ‘tóyeba ete bokonzi ya Nzambe ekómi pene.’ (Luka 21:31) Alobaki ete, bitumba, koningana ya mabele, nzala mpe bamaladi mabe ekozala; yango nde makambo oyo tozali komona lelo.—Luka 21:10-17.

Lisusu, Biblia elobi ete bato bakokóma na bizaleli ya mabe mpe yango ekomonisa ete tozali na “mikolo ya nsuka” ya baguvɛrnema ya bato. Okoki komona bizaleli yango na 2 Timote 3:1-5. Ntango ozali komona bizaleli ya bato mpe makambo bazali kosala lelo oyo, ozali kondima mpenza ete bisakweli wana ya Biblia ezali mpenza kokokisama.

Yango emonisi nini? Etikali moke Bokonzi ya Nzambe ebongola makambo mpo bomoi ya bato ekóma malamu mingi koleka. (Luka 21:36) Biblia elobi ete Nzambe akosala makambo ya malamu mpo na mabele mpe mpo na bato oyo bakofanda kuna. Talá mwa bandakisa.

GUVERNƐMA YA MALAMU

“Mpe bapesaki [Yesu] boyangeli, lokumu ná bokonzi, mpo bato ya bikólo, bituluku ya bato ya bikólo mpe minɔkɔ nyonso básalela ye. Boyangeli na ye ezali boyangeli oyo ekoumela seko, oyo ekoleka te, mpe bokonzi na ye ezali bokonzi oyo ekobebisama te.”—DANYELE 7:14.

Elimboli nini? Okosepela na bomoi na nse ya bokonzi oyo Nzambe atye; ekotambwisa mabele mobimba elongo na Mwana na ye, oyo azali Mokonzi na yango.

SANTE MALAMU

Elenge mwasi moko atiki kiti na ye ya bibɔsɔnɔ mpe abandi kotambola

“Moto moko te oyo afandi kuna akoloba: ‘Nazali na maladi.’”—YISAYA 33:24.

Elimboli nini? Okobɛla soki moke te; okozala na bomoi libela na libela.

KIMYA YA SOLOSOLO

“Ye azali kosilisa bitumba tii na nsuka ya mabele.”—NZEMBO 46:9.

Elimboli nini? Bitumba mpe bampasi nyonso oyo bitumba ebimisaka ekozala lisusu te.

MABELE EKOTONDA NA BATO YA MALAMU

“Moto mabe akozala lisusu te . . . Bato ya komikitisa bakozwa mabele.”—NZEMBO 37:10, 11.

Elimboli nini? Bato mabe bakozala lisusu te, kaka baoyo balingaka kotosa Nzambe.

MABELE MOBIMBA EKOKÓMA PARADISO

“Bakotonga bandako mpe bakofanda kuna; mpe ya solo, bakolona bilanga ya vinyo mpe bakolya mbuma na yango.”—YISAYA 65:21, 22.

Elimboli nini? Mabele mobimba ekokóma kitoko. Nzambe akokokisa oyo tosɛngaka na libondeli ete mokano na ye esalema “na mabele.”—Matai 6:10.