Tóyanganisa bato ya minɔkɔ nyonso

¹ Liloba ya Nzambe ezali mpenza kokokisama! Bato “ya minɔkɔ nyonso ya bikólo” bazali koyamba losambo ya solo. (Zek. 8:​23, NW) Ndenge nini Batatoli ya Yehova bazali kosalisa bato ya ‘mabota nyonso, mikili nyonso mpe minɔkɔ nyonso’ mpo bákóma pɛto na miso ya Yehova mpe bákóma na elikya ya kobika na “bolɔzi monene”?​​—⁠Emon. 7:​9, 14, NW.

² Lisalisi oyo ebongiseli ya Nzambe ezali kopesa: Lisangani ya Mikóló-Bakambi ezwi bibongiseli ete mikanda oyo elimbolaka Biblia ebongolama na minɔkɔ soki 380 mpo bato ya mokili mobimba bákoka kokanga mpenza ntina ya nsango malamu. Kolɛngɛla mikanda yango mpe kobimisa yango na minɔkɔ ebele ndenge wana ezali lisɛki te. Esɛngaka liboso koyanganisa bituluku ya babongoli oyo bayebi mosala malamu mpe kopesa bango lisalisi oyo basengeli na yango mpo bábongola mikanda na biso na minɔkɔ wana nyonso, na nsima konyata yango mpe kotinda yango na masangá. Kasi, mosala ya ntina mpenza ezali nde oyo mosakoli mokomoko ya Bokonzi asalaka: komemela bato nsango ya Biblia oyo epesaka bomoi.

³ Mokakatano oyo tosengeli kolonga: Lelo oyo, na bisika mingi, okoki kokuta bapaya ebele oyo balobaka minɔkɔ ya mboka na bango. Mpo na kosakola nsango malamu epai ya bato wana, ebele ya basaleli ya Nzambe bazali kosala makasi mpo na koyekola Chinois, Espagnol, Russe to minɔkɔ mosusu oyo bapaya mingi ya teritware na bango balobaka. Bamosusu bazali koyekola Elobeli ya Bikela ya Amerika. Na Congo-Brazzaville mpe Congo-Kinshasa, ezali na masangá soki 2489 mpe bituluku 63 oyo ezali kosakola mpe kosalela mikanda na minɔkɔ 17 soki tolongoli Lifalanse. Bato mosusu, oyo bayokaki naino te mateya ya Yehova to bayebaki eloko moko te na Biblia, bazali kondima solo ya Liloba ya Nzambe.​​—⁠Lom. 15:⁠21.

⁴ Mokomoko na biso akoki nde kosala lisusu makasi koleka mpo na koyebisa nsango malamu epai ya bato ya teritware na biso oyo bautá bamboka mosusu? (Kols. 1:25) Masangá mingi emibongisaka mpo na kosakola epai ya bato ya teritware na bango oyo bautá mboka mopaya. Liboso, basakoli bayekolaka mwa maloba ya monɔkɔ ya bato yango mpo bákoka kopesa litatoli moko ya mokuse, na maloba lokola oyo: “Mbote. Talá nsango malamu oyo namemeli yo. [Na nsima, bapesaka trakte to mwa buku oyo esili kobongolama na monɔkɔ ya moto yango.] Tikalá malamu.” Yehova azali mpenza kopambola milende mikemike wana ya ebandeli!

⁵ Nsango ya Bokonzi ebendaka bato ya lolenge nyonso mpe ya minɔkɔ nyonso. Tiká ete tósimba libaku oyo tozali na yango ya koyebisa bango nsango yango.