Mosala ya kotonga Bandako ya Bokonzi na mokili mobimba ndenge ezali kosalema na bikólo mosusu ya Mpoto
1 Eleki sikoyo bambula ebele, mosala ya Batatoli ya Yehova epekisamaki na bikólo mingi ya Mpoto, bakisa mpe na Mpoto ya Ɛsti. Na bisika mingi, bipekiseli ezalaki mpenza makasi. Ezalaki mpasi mpo na kosala makita na polele, mpe bandeko bakokaki kosalela Bandako ya Bokonzi te. Nzokande, na bambula oyo euti koleka, “[Yehova] asalaki makambo mineneminene mpo na biso; biso mpe tosepeli na yango.”—Nz. 126:3.
2 Kobanda na 1983, bakómaki kolɛmbisa mokemoke bipekiseli makasi oyo batyelaki Batatoli ya Yehova. Na 1989, ekólo Pologne ná ekólo Hongrie endimaki mosala ya Batatoli ya Yehova na boyokani ya mibeko ya Leta. Na 1991, ekólo Russie endimaki mosala ya Batatoli ya Yehova. Kobanda wana, mosala ya kosakola epalangani na Russie mpe na bikólo mosusu oyo ezalaki kala na URSS. Kobanda na sanza ya Marsi 1996 tii sanza ya Ɔkɔtɔbɛ 1998, Lisangani ya Mikólo-Bakambi bandimaki ete bafiliale oyo ekambaka mosala ya kosakola na bikólo 11 ya Mpoto edefa mbongo mpo na kotonga Bandako ya Bokonzi 359.
3 Ntango ozali kotala bafoto oyo ezali na siplema oyo, kanisá likólo ya makambo minene mpe ya kokamwa oyo Yehova asali mpo na bato na ye. (Nz. 136:4) Okosepela na koyeba ete makabo ya bandeko na biso ya mokili mobimba ezali kosalelama na ndenge ya malamu, mpe yango emonisi maloba ya Yesu oyo ezali na Yoane 13:35: “Na ndenge wana bato nyonso bakoyeba ete bozali bayekoli na ngai, soki bozali na bolingo na kati na bino.”
4 Moko ya bikólo ya Mpoto oyo ezali na bozwi mingi te, oyo esengelaki kozwa lisalisi mpo na kotonga Bandako ya Bokonzi, ezali Roumanie, epai batongi Bandako ya Bokonzi 36 kobanda na sanza ya Yuli 2000. Lokola bandeko ya Ukraine basalelaki baplan ndenge moko mpo na Bandako ya Bokonzi pene na nyonso, batongaki Bandako ya Bokonzi 61 na mobu 2001, mpe mosusu 76 na 2002. Na lisalisi ya makabo mpo na kotonga Bandako ya Bokonzi, bikólo Bulgarie, Croatie, Macédoine, Moldavie, Russie mpe Serbie mpe Monténégro etongi bankama ya Bandako ya Bokonzi.
5 Na bikólo mosusu, kotonga Bandako ya Bokonzi ezalaki likambo ya pɛtɛɛ te, mpe esengelaki kosala milende mingi mpo mosala mpenza ya botongi ebanda. Mbala mingi, kobongisa makambo mosusu nde ezalaki kozwa ntango mingi mpenza. Lisusu, na mikili wana ya Mpoto kotonga Ndako ya Bokonzi ezali kosɛnga mbongo mingi koleka na bisika mosusu ya Afrika mpe ya Amerika ya Sudi. Nzokande, lokola basaleli ya Yehova bazali se kokóma mingi, esengeli lisusu kotonga bankama ya Bandako ya Bokonzi na bikólo ya Mpoto oyo ezali ya bozwi mingi te.
6 Oyo nde likambo ya esengo komona ndenge mosala ya kotonga Bandako ya Bokonzi yango ezali kosalema mbangumbangu! Makambo mingi emonisi ete litatoli ya malamu mpenza epesami na bisika oyo batongi Bandako yango ya Bokonzi. Na bisika mosusu, bakonzi bakamwaki na komona ndenge bandeko bazalaki kolanda na motema moko malako ya botongi.
7 Yisaya asakolaki mpenza bokoli ya losambo ya solo oyo ezali kosalema na mikolo na biso. Nzambe alobaki na monɔkɔ ya mosakoli yango ete: “Ngai nazali [Yehova]; na ntango yango, nakoyeisa yango mbangu.” (Yis. 60:22) Ya solo, bambula zomi oyo euti koleka ezalaki mpenza ntango ya Yehova ya kokolisa mosala na Mpoto ya Ɛsti. Tiká ete Yehova alanda kosopa mapambola na ye likoló ya milende oyo tozali kosala ya kotonga nokinoki Bandako ya Bokonzi na bikólo mingi wana tozali kopesa makabo mpo na mosala yango ya kotonga Bandako ya Bokonzi. Yango ekosala ete tótonga lisusu Bandako ya Bokonzi mingi na bikólo oyo ezali na bozwi mingi te. Ekotombola losambo ya solo na bikólo mingi ya Mpoto mpe litatoli monene ekopesama “tii na nsukansuka ya mabelé.”—Mis. 13:47.
[Bililingi na lokasa 3]
Bandako ya Bokonzi na kati ya ndako moko, na Moscou, Russie
[Bililingi na lokasa 4-6]
Bandako ya Bokonzi ya sika na Mpoto ya Ɛsti
Strumica, Macédoine
Daruvar, Croatie
Bitola, Macédoine
Sokal, na etúká ya Lviv, Ukraine
Sofia, Bulgarie
Na engumba Krasnooktyabrskiy, Maykop, Russie
Bački Petrovac, Serbie mpe Monténégro
Plovdiv, Bulgarie
Tlumach, na etúká ya Ivano-Frankivsk, Ukraine
Rava-Ruska, na etúká ya Lviv, Ukraine
Stara Pazova, Serbie na Monténégro
Zenica, Bosnie-Herzégovine
Sokal na etúká ya Lviv, Ukraine
Zhydachiv, na etúká ya Lviv, Ukraine