‘Tófungwama’
1. Mokumba nini biso nyonso tozali na yango?
1 Biso nyonso oyo tozali na lisangá ya bandeko baklisto na mokili mobimba, tozali na mokumba ya kosala ete lisangá ezala na esengo. (1 Pet. 1:22; 2:17) Lisangá ekozala na esengo soki tozali ‘kofungwama’ na bolingo na biso ya motema epai ya basusu. (2 Kol. 6:12, 13) Mpo na nini ezali na ntina koyeba malamu bandeko na biso ya mibali mpe ya basi?
2. Mpo na nini ezali na ntina tókolisa boninga elongo na baninga na biso bandimi?
2 Boninga ekómaka makasi: Soki toyebi baninga na biso bandimi malamumalamu, tokomona lisusu malamu mpenza motuya ya kondima na bango, ya mpiko na bango mpe ya bizaleli na bango mosusu ya malamu. Tokolandela mabunga na bango te mpe boyokani na biso ná bango ekokóma lisusu makasi koleka. Soki toyebani malamumalamu, tokoki mpenza kolendisana mpe kobɔndisana malamu koleka. (1 Tes. 5:11) Tokoki kokóma “lisalisi oyo ezali kopesa makasi” epai ya basusu mpo na kotɛmɛla bopusi mabe ya mokili ya Satana. (Kols. 4:11) Na kotalela mikakatano ya ntango ya nsuka oyo tozali na yango, tozali na botɔndi mpenza ndenge tozali na baninga malamu na libota ya Yehova.—Mas. 18:24.
3. Ndenge nini tokoki kozala lisalisi oyo ezali kopesa basusu makasi?
3 Baninga na biso ya motema bakoki mpenza kopesa biso makasi mpe kolendisa biso ntango tokutani na mikakatano makasi. (Mas. 17:17) Ndeko mwasi moko oyo azalaki kobundana na mayoki ete azali na ntina te, alobaki boye: “Baninga na ngai mosusu bazalaki koyebisa ngai makambo malamu oyo nasalaka mpo na kosalisa ngai nalongola makanisi ya mabe oyo nazalaki na yango.” Baninga ya ndenge wana bazali mpenza lipamboli oyo euti na Yehova.—Mas. 27:9.
4. Nini ekoki kosalisa biso tóyeba basusu malamumalamu kati na lisangá?
4 Sepelaká na basusu: Ndenge nini tokoki kofungwama na bolingo na biso ya motema mpo na baninga na biso bandimi? Longolá kopesa basusu mbote na makita, tosengeli mpe kosala makasi kosololaka na bango masolo ya kolendisa. Monisá basusu ete osepelaka na bango, kasi komikɔtisa te na makambo oyo etali mpenza yo te. (Filp. 2:4; 1 Pet. 4:15) Lolenge moko oyo okoki komonisa basusu ete osepelaka na bango ezali ya kobenga bango bólya elongo. (Luka 14:12-14) To mpe bokoki koyokana mpo na kobima na mosala ya kosakola. (Luka 10:1) Soki tozali kosala makasi ya koyeba bandeko na biso malamumalamu, tozali kopesa nzela ete lisangá ezala na bomoko.—Kols. 3:14.
5. Likambo nini oyo tokoki kosala mpo na kokóma na baninga mingi?
5 Ntango tozali kopɔna baninga, toponaka kaka baoyo tozali na bango mbula moko to baoyo basepelaka na makambo oyo biso mpe tosepelaka na yango? Tosengeli kotika makambo ya ndenge wana te epekisa biso kosala boninga na bandeko mingi ya lisangá. Davidi ná Yonatana mpe Luta ná Naomi, basalaki boninga ya makasi atako bakesanaki na mbula mpe na ndenge oyo bakolaki. (Luta 4:15; 1 Sam. 18:1) Okoki nde kosala milende mpo na kokóma na baninga mingi? Soki osali yango, okozwa mapamboli mingi koleka kutu oyo okoki kokanisa.
6. Wapi mwa matomba tokozwa soki tozali kofungwama na bolingo na biso ya motema mpo na bandeko na biso?
6 Soki tozali kofungwama na bolingo na biso ya motema epai ya basusu, tokopesana makasi mpe yango ekosala ete kimya ezala na kati ya lisanga. Lisusu, soki tozali kolinga bandeko na biso, Yehova ye moko akopambola biso. (Nz. 41:1, 2; Ebe. 6:10) Mpo na nini te komityela mokano ya koyeba malamu bandeko mingi?