Ndenge nini tokoki kosalisa?

¹ Mbala mingi, ntango Batatoli ya Yehova bayokaka ete likama esalemi na esika moko, batunaka: “Ndenge nini tokoki kosalisa?” Ndenge lisolo oyo ezali na Misala 11:​27-30 emonisi yango, baklisto ya ekeke ya liboso basalisaki bandeko oyo bazalaki kofanda na Yudea mpo nzala ekɔtelaki bango.

² Na mikolo na biso, malako oyo etambwisaka ebongiseli na biso epesi nzela ete mbongo esalelamaka mpo na kosalisa bandeko ntango bakeleli mpo na makama oyo euti na mpela, mipɛpɛ makasi, koningana ya mabelé to makama mosusu oyo euti na bato, to mpo na makambo mosusu.

³ Na ndakisa, na mbula eleki, bandeko mingi bapesaki makabo mpo na kosalisa bandeko oyo bazwaki likama na mai oyo ezindisaki bamboka, ntango mabelé eninganaki na nse ya mai (tsunami) na Azia ya Sudi. Ebongiseli ya Yehova esepelaki mpenza ndenge bandeko wana bamonisaki ete bazali komibanzabanza mpo na bandeko oyo bazali na mikakatano, ndenge batindaki makabo mpo na kosalisa bango. Nzokande, soki makabo etindami mpenzampenza mpo na kosalisa bato oyo bazwi likama moko boye, mibeko ya bikólo mosusu esɛngaka ete mbongo yango esalelama kaka mpo na likambo wana ndenge moto oyo apesaki yango akomi mpe kaka mpo na mwa ntango moko boye, ata soki bosɛnga ya bandeko ekokisami na makabo oyo euti na ekólo na bango to te.

⁴ Yango wana, esɛngisami ete makabo oyo ezali kopesama mpo na kosalisa bandeko oyo bazali kokelela, etyamaka na makabo mpo na mosala ya kosakola na mokili mobimba. Mbongo yango esalelamaka mpo na kosalisa bandeko oyo bazali kokelela to mpo na kokokisa bamposa ya elimo ya bandeko na biso na mokili mobimba. Nzokande, soki moto moko asepeli kopesa likabo mpo na kosalisa bandeko oyo bazali kokelela, kasi alingi kotya yango te na makabo mpo na mosala ya kosakola na mokili mobimba, likabo na ye ekondimama mpe ekosalelama na bisika nyonso oyo bandeko bazali kokelela. Kasi, ekozala malamu koleka ete moto oyo apesi likabo ndenge wana amonisa mpenzampenza te ete esengeli kosalela likabo yango kaka na esika moko boye mpe na lolenge moko ya sikisiki.

⁵ Soki tozali kopesa makabo libosoliboso mpo na kosimba mosala ya kosakola na mokili mobimba, yango ekosala ete ebongiseli na biso ezala na mbongo mingi mpo na misala nyonso ya Bokonzi na esika ebomba mbongo wana kaka mpo na kosalisa bandeko oyo bakokutana na mikakatano na nsima. Yango ezali na boyokani na likanisi oyo ezali na Baefese 4:​16, wana tozali kosala na bomoko mpo na kopesa oyo esengeli mpo “na bokoli ya nzoto mpo na kotongama na yango moko na kati ya bolingo.”