Teyá bato ya komikitisa bátambola na nzela ya Nzambe
1. Tosengeli kosala lisusu nini ntango tozali kokómisa bato bayekoli?
1 Bato bazalaki koloba ete bayekoli ya Klisto na ekeke ya liboso bazali bato ya “Nzela.” (Mis. 9:2) Boklisto ya solo etaleli makambo nyonso ya bomoi ya moto. (Mas. 3:5, 6) Na bongo, ntango tozali koyekola na bato Biblia, tosengeli kosuka kaka te na koteya bango mateya ya solo ya Biblia. Tosengeli mpe kosalisa bango bátambola na nzela ya Yehova.—Nz. 25:8, 9.
2. Nini ekoki kotinda moyekoli ya Biblia atosa mibeko ya Nzambe?
2 Kolinga Yehova ná Yesu: Ezalaka pɛtɛɛ te mpo bato ya kozanga kokoka bákóma na makanisi, ndenge ya kotalela makambo, maloba, mpe etamboli oyo eyokani na mokano ya Nzambe! (Lom. 7:21-23; Ef. 4:22-24) Nzokande, bolingo mpo na Nzambe mpe mpo na Mwana na ye etindaka bato ya komikitisa básala yango, atako ezali pɛtɛɛ te. (Yoa. 14:15; 1 Yoa. 5:3) Ndenge nini tokoki kosalisa bato oyo toyekolaka na bango Biblia bákóma na bolingo yango?
3. Ndenge nini tokoki kosalisa bayekoli bálinga Yehova ná Yesu?
3 Salisá moto oyo oyekolaka na ye Biblia ayeba bomoto ya Yehova. Ndeko mobali moko alobi boye: “Bato bakoki te kolinga moto oyo bango bayebi te, yango wana, soki nabandi koyekola na moto, nateyaka ye nkombo ya Nzambe na Biblia, mpe nalukaka ndenge ya kobenda likebi na ye na bizaleli ya Yehova.” Lolenge ya malamu ya kosala yango ezali ya kolobela mingi ndakisa ya Yesu. (Yoa. 1:14; 14:9) Lisusu, salelá etanda ya bozongeli oyo ezali na nsuka ya mokapo mokomoko ya buku Biblia eteyaka mpo na kosalisa moyekoli akanisa na bizaleli ya Nzambe mpe ya Mwana na ye.
4. (a) Mpo na nini bayekoli mingi bakokaka te kosakola? (b) Ndenge nini tokoki kosalisa bato oyo toyekolaka na bango Biblia ntango babandi kobima na mosala ya kosakola?
4 Teyá na nzela ya ndakisa: Lokola toteyaka basusu mpe tolakisaka bango nzela, tomonisaka bango na nzela ya misala na biso, nini elimboli kotambola na nzela ya Nzambe. (1 Kol. 11:1) Na ndakisa, bayekoli mingi ya Biblia bakokaka te koyebisa bato oyo bayebani na bango te mateya ya Biblia oyo bandimaka. Na bongo, mbala mosusu ekosɛnga tózala na motema molai mpe na mayele mpo na kosalisa bango bákóma na bolingo, kondima, mpe mpiko oyo esengeli mpo na kosakola mpe kokómisa bato bayekoli. (2 Kol. 4:13; 1 Tes. 2:2) Soki tozali na mposa ya kosalisa bato oyo toyekolaka na bango Biblia, tokosalisa bango ntango babandi kobima na mosala ya kosakola.
5. Ndenge nini ndakisa ya malamu ekoki kosalisa bayekoli na kosala makambo oyo eyokani na mibeko ya Nzambe?
5 Ndakisa na yo ekoki koteya bato oyo oyekolaka na bango Biblia makambo mosusu oyo ezali na ntina mingi na bomoi ya moklisto. Ntango ozali kotala bandeko oyo bazali na maladi to kopesa bandeko mbote na esengo nyonso na makita, bazali komona bolingo oyo ozali na yango. (Yoa. 15:12) Ntango ozali kopesa mabɔkɔ mpo na kotya bopɛto na Ndako ya Bokonzi to kosala makambo mosusu mpo na kosalisa bandeko, ozali koteya bango ndenge ya kosalela basusu. (Yoa. 13:12-15) Ntango bazali komona yo ozali kosala nyonso mpo ozala na bomoi ya mindɔndɔ te, bazali koyeba nini elimboli ‘kokoba koluka liboso Bokonzi.’—Mat. 6:33.
6. Matomba nini tozwaka ntango tozali kosalisa bato ya komikitisa básalela Yehova?
6 Mosala ya koteya basusu Liloba ya Nzambe mpe kokómisa bango bayekoli esɛngaka milende. Kasi, ezalaka mpenza esengo komona bato ya komikitisa “bazali kokoba kotambola na kati ya solo.”—3 Yoa. 4.