Monisá ete osepelaka na bato—Na kosakweláká bango kozanga kopona bilongi
1 Na emonaneli moko, ntoma Yoane amonaki anzelu moko azali kopumbwa na katikati ya likoló, mpe azalaki kosakola nsango malamu ya seko epai na bato ya “bikólo nyonso mpe mabota nyonso mpe minɔkɔ nyonso mpe mikili nyonso.” (Emon. 14:6) Tolandaka ndakisa ya anzelu mpe tosakwelaka bato nyonso kozanga kopona bilongi? Mbala mosusu, kozanga ete tóyeba yango, tokoki kokanisela bato mosusu mabe. Makambo oyo tokanisaka mpo na bato ekoki kobongola ndenge na biso ya koyebisa bango nsango malamu. Yango wana, ntango tozali kosakwela bato oyo bazali na makambo mpe mimeseno oyo ekeseni na oyo ya biso, tosengeli kosala nyonso mpo tólinga bango mpenza.
2 Yebá teritware na yo: Ezali nde na bapaya mpe na bato oyo bakimá-mboka, oyo bafandi na teritware na yo? Ezali pɛtɛɛ tózanga kotyela bato yango likebi. Luká kokutana na bato ya ndenge wana, mpe koyeba bango malamu. Luká koyeba soki bazali na mposa ya nini mpe makambo nini etungisaka bango, makambo nini esepelisaka bango mpe nini esepelisaka bango te; makambo nini ebangisaka bango mpe nini bakanisaka mpo na bato mosusu. Salá makasi ndenge na yo ya koyebisa bango nsango malamu eyokana na makambo yango. (1 Kol. 9:19-23) Lokola ntoma Paulo, tosengeli komonaka ete tozali na mokumba monene ya koyebisa bato nyonso ya teritware na biso nsango malamu, bakisá mpe bato oyo bautá bikolo mosusu, baoyo bazali na mimeseno oyo ekeseni na oyo ya biso, baoyo balobaka monɔkɔ mosusu, to baoyo bazali na bozwi mingi.—Lom. 1:14.
3 Kasi, ndenge nini okoki kosakwela moto oyo alobaka monɔkɔ mosusu? Salelá malamu mwa buku Nsango malamu mpo na bato ya bikólo nyonso (na Lifalanse). Okoki mpe komema mwa batrakte to mwa babuku ya minɔkɔ oyo elobamaka mingi na teritware na bino. (Talá Mosala na biso ya Bokonzi ya Yuli 2003, lok. 4, par. 2-3.) Longolá yango, basakoli mosusu basali makasi báyekola ndenge ya kopesa mbote mpe kosolola na moto ata mwa moke na minɔkɔ mosusu. Bato basepelaka mingi soki bamoni moto azali kosala makasi asolola na bango, ata mwa moke, na monɔkɔ na bango ya mboka, mpe yango ekoki kotinda bango bándima nsango malamu.
4 Landá ndakisa ya Yehova: Ntango tozali kosala makasi tósakwela bato oyo bazali na makambo mpe mimeseno oyo ekeseni na oyo ya biso, tozali kolanda ndakisa ya Yehova mpo ye aponaka bilongi te mpe “mokano na ye ezali ete bato ya ndenge nyonso bábika mpe bákóma na boyebi ya sikisiki ya solo.”—1 Tim. 2:3, 4.