“Okopesa eyano nini?”
1. Mokakatano nini mingi na biso tozalaka na yango?
1 Olingaka Liloba ya Nzambe, kasi okokaka te komikundola masolo mosusu ya Biblia to koyeba bisika oyo yango elobelami na Makomami? Olingi ete bana na yo báyeba masolo mpe mateya ya Biblia malamumalamu? Lisolo “Okopesa eyano nini?” oyo ebimaka na Lamuká! na lokasa 31 ekoki kosalisa bilenge mpe mikóló báyeba Liloba ya Nzambe malamumalamu.—Mis. 17:11.
2. Ndenge nini tokoki kosalela biteni ndenge na ndenge ya lisolo “Okopesa eyano nini?”
2 Ndenge nini okoki kosalela lisolo yango malamu? Lamuká! ya Yanuali 2006 epesaki makanisi oyo: “Meká naino kotala makambo oyo ezali na lokasa 31 . . . Makambo mosusu oyo ezali na lokasa yango ebongi na batángi oyo bazali bana mike; mosusu ekosalisa bato oyo bameseni na Biblia mpo bámeka mayele na bango. Motó moke ya likambo ‘Esalemaki ntango nini?’ ekosalisa yo omonisa ntango nini bato oyo Biblia elobeli bazalaki na bomoi mpe ntango oyo makambo mosusu ya ntina esalemaki. Mpo na mituna oyo ezali na nse ya motó moke ya likambo ‘Ezali na zulunalo oyo,’ ekosɛnga kotánga masolo ya Lamuká! yango mpo na kozwa biyano, nzokande biyano ya mituna mosusu ekobima kaka na Lamuká! oyo mituna ezali, mpe bakomonisa lokasa oyo yango ezali, epai bakokoma yango motó na nse makolo likoló. Mpo na nini te koluka biyano yo moko liboso ya kotánga biyano yango mpe kolobela makambo oyo otángi elongo na basusu? Okoki ata kosalela lisolo yango ya sika, ‘Okopesa eyano nini?’ mpo na kosolola na libota to na baninga.”
3. Ndenge nini lisolo yango esalisi mabota mosusu, mpe biteni nini olingaka mingi?
3 Kutu, mabota mingi basepelaka kosalela lisolo yango na boyekoli na bango ya libota. Mama moko akomi boye: “Ngai ná mobali na ngai tomonaki ete ekozala malamu mpenza tókɔtisa eteni oyo elobi ‘Bana báluka bafɔtɔ oyo’ na boyekoli na biso ya libota mpo na kosalisa mwana na biso ya mwasi ya mbula misato asepela lisusu mingi na boyekoli. Esepelisaka biso mingi komona ye asimbi Lamuká! na ye mpe na esengo nyonso, azali kofungola lokasa mokomoko tii akomona fɔtɔ oyo azali koluka.” Tata moko ya ekólo Brésil alobi boye: “Ngai ná mwana na ngai ya mobali ya mbula nsambo tosepelaka mingi na lisolo wana ya Lamuká! Esalisi Moize alandaka boyekoli na likebi, ayeba koluka bavɛrsɛ, ayeba ndimbola ya bililingi, mpe akanga ntina ya badati.” Ashley, elenge mwasi ya mbula mwambe, akomi boye: “Matɔndi mingi mpo na lisolo ‘Okopesa eyano nini,’ oyo ezali na lokasa ya nsuka ya Lamuká! esalisi ngai nayeba Biblia malamu.”
4. Ndenge nini libota ekoki kosalela lisolo wana na boyekoli na bango ya libota?
4 Mpo na nini te kotalela lisolo “Okopesa eyano nini” mikolo mosusu na boyekoli na bino ya libota? Bokoki koluka biyano ya mituna mosusu oyo eleki makasi na Index to na CD-ROM Watchtower Library. Soki ozali kosala bongo, okoteya bana na yo ndenge ya kolukaluka na mikanda. Soki ozali na bana oyo bakoli, mpo na nini te kopesa bango mokumba ya koluka biyano ya eteni oyo elobi, “Ngai nani?” to “Esalemaki ntango nini” liboso boyekoli ya libota esalema? Mpe bakolobela makambo oyo bamonaki na bolukiluki na bango na ntango ya boyekoli. Soki baboti bazali kosalela lisolo wana malamumalamu, bakokɔtisa Liloba ya Nzambe na mitema ya bana na bango, mpe bakosalisa bango báyeba “makomi mosantu” banda bomwana.—2 Tim. 3: 15; Det. 6:7.