Tozali kokweisa biloko oyo epikamá makasi

¹ Na boumeli ya bankama ya bambula, Satana asaleli mateya ya lokuta mpe bokosi mpo na kozipa mitema mpe makanisi ya bato mingi. Apalanganisi mateya lokola Bosato, molimo ekufaka te, mpe lifelo ya mɔtɔ. Atindi bato báboya kondima ete Mozalisi azali mpenza mpe bákanisa ete Biblia euti na Nzambe te. Kolinga ekólo mpe koyina bato ya mposo mosusu ezali likambo mosusu oyo ezali mpenza kopekisa bato bámona pole ya solo. (2 Kol. 4:⁠4) Ndenge nini tokoki kokweisa bindimeli wana oyo epikamá makasi?​—⁠2 Kol. 10:​4, 5.

² Etaleli mpe mayoki ya moto: Ekoki kozala ete mateya mosusu oyo mangomba eteyaka banda kala ekɔtelá mpenza moto. Basusu bakangamá na mateya ya lokuta banda bomwana. Mpo na kosalisa bato ya ndenge wana, tosengeli kosolola na bango na ndenge oyo ezali komonisa ete tozali komemya makanisi na bango.​—⁠1 Pet. 3:⁠15.

³ Tokopesa bato ya ndenge wana limemya soki totiki bango bálimbola makambo oyo bandimaka mpe ntina oyo bandimaka yango. (Yak. 1:19) Ntango mosusu, bandimaka na motema mobimba liteya oyo elobi ete molimo ekufaka te mpo bandeko to baninga na bango bakufá mpe bazali na mposa makasi ya komona bango lisusu. To basalaka bafɛti oyo bato mingi basalaka mpo basepelaka ndenge epesaka bango libaku ya kolekisa ntango elongo na mabota na bango. Soki toyoki bango, tokoyeba ndenge oyo bazali komiyoka mpe tokosalisa bango na ndenge ebongi.​—⁠Mas. 16:⁠23.

⁴ Tólanda ndakisa ya Yesu: Yesu apesaki ndakisa malamu ntango ayanolaki na mituna ya moto moko oyo ayebaki malamu Mibeko ya Moize. Yesu ayebisaki moto yango mbala moko te makambo oyo asengeli kosala, mpamba te lokola akangamaki makasi na bindimeli na ye, akokaki mpe koboya makambo yango. Na esika ya kosala bongo, Yesu alobelaki nde Makomami, asɛngaki moto yango amonisa likanisi na ye, mpe apesaki ye ndakisa moko mpo na kosalisa ye amanyola.​—⁠Luka 10:​25-37.

⁵ Mateya ya solo oyo ezali na Liloba ya Nzambe ezali na nguya koleka mateya ya lokuta oyo bato bakangamá na yango. (Ebe. 4:12) Soki tozali na motema molai, tokosimba mitema ya bato, mpe tokoki kosalisa bango bátika mateya ya lokuta mpe bándima mateya ya solo oyo ekoki kosikola bango.​—⁠Yoa. 8:⁠32.