Omipesa mobimba mpo na kosalisa bayekoli ya Biblia
1. Esɛngaka nini mpo na kosalisa moyekoli ya Biblia akola na elimo?
1 Kosalisa moyekoli ya Biblia tii azwa batisimo esuki kaka te na koyekola na ye mbala na mbala. Ntoma Paulo akokanisaki boyokani na ye ná bato oyo azalaki koteya na bolingo ya mama mpo na bana na ye. Biso mpe tosengeli komipesa mobimba mpo na kosalisa bayekoli ya Biblia bákola na elimo.—1 Tes. 2:7-9.
2. Mpo na nini tosengeli komibanzabanza mpo na moyekoli, mpe ndenge nini tokoki kosala yango?
2 Monisá moyekoli ete omibanzabanzaka mpo na ye: Ntango moyekoli ya Biblia abandi kosalela makambo oyo azali koyekola, lisosoli na ye ekotinda ye akata boninga na bato oyo batosaka mitinda ya Biblia te. (1 Pet. 4:4) Bato ya libota na ye bakoki kosundola ye. (Mat. 10:34-36) Soki tozali komibanzabanza mpo na ye, yango ekosalisa ye amiyoka ete asundolami te. Ndeko moko oyo aumeli mingi na mosala ya misionɛrɛ apesi toli oyo: “Kokende mbala moko te soki bosilisi koyekola. Soki likoki ezali, fandá mwa moke mpe sololá na ye.” Zalá pene ya kosalisa moyekoli. Na ndakisa, okoki kobenga ye na telefone to kokende kotala ye soki abɛli. Okoki kofanda na ye esika moko na makita mpe soki azali na bana, kosalisa ye na kobatela bango.
3. Ndenge nini tokoki kosalisa moyekoli ya Biblia azwa bilendiseli ya bandeko ya lisangá?
3 Lisalisi ya bandeko ya lisangá: Soki ozali kosakola pembeni ya esika oyo moto oyo oyekolaka na ye Biblia afandaka, mpo na nini te kobwakela ye mwa liso mpo na kolakisa ye ndeko oyo obimi na ye? Soki likoki ezali, ntango okei koyekola na ye, bimáká na basakoli ndenge na ndenge, ata mpe bankulutu. Lisusu, mwa moke kaka nsima ya kobanda koyekola Biblia ná moto, lendisá ye abanda koyangana na makita na Ndako ya Bokonzi. Yango ekopesa ye libaku ya kozwa bilendiseli ya bandeko ya lisangá, oyo bakoki kokóma libota na ye ya elimo.—Mrk. 10:29, 30; Ebr. 10:24, 25.
4. Molende na biso ekoki kobimisa matomba nini?
4 Moboti oyo alɛmbaka te kosalisa bana na ye bákola na elimo, atondaka na esengo soki bana yango bamipesi na Yehova mpe bazali kotambola na kati ya solo. (3 Yoa. 4) Biso mpe tokoki koyoka esengo ya ndenge wana soki tozali komipesa mobimba mpo na kosalisa bayekoli ya Biblia.